�Kanal-13�ün rəhbəri həbs edildi (YENİLƏNİB)

Nəsimi rayon məhkəməsi Əziz Orucov barəsində 4 ay müddətinə həbs qəti imkan tədbiri secib.

Bu barədə Turan-a vəkil Elçin Sadıqov bildirib. Jurnalist özünü təqsirli bilmir. Qərardan apelyasiya şikayəti veriləcək.

* * *

2017 İyun 01 (Cümə axşamı) 21:54:40

"Kanal-13"ün rəhbərinə qarşı cinayət ittihamları irəli sürülüb

Bakı/01.06.17/Turan: "Kanal-13" internet televiziyasının icraçı direktoru Əziz Orucovun 30 günlük inzibati həbs müddəti başa çatdıqdan sonra ona qarşı qanunsuz sahibkarlıq və vəzifə səlahiyyətlərindən sui-istifadə ittihamları irəli sürülüb. Bu barədə Turan-a vəkil Elçin Sadıqov bildirib.

Onun sözlərinə görə, Baş Prokurorluğun Ağır Cinayətlər üzrə İstintaq İdarəsi Orucovu CM-in 192.2.2-ci (böyük gəlir əldə etməklə qanunsuz sahibkarlıq) və 308.2-ci (vəzifə səlahiyyətlərindən sui-istifadə, ağır nəticələrə səbəb olduqda) maddələri ilə ittiham edir.

Sadıqov qeyd edib ki, Orucova qarşı iş 2014-cü ilin yazında onlarla QHT-yə qarşı açılmış ümumi işdən ayrıca icraata ayrılıb.

İttihamlar "Kanal-13"ün və "Qafqaz Media Araşdırmaları Mərkəzi" QHT-nin fəaliyyəti ilə bağlıdır.

Prokurorluq Nəsimi rayon məhkəməsinə Orucovun 4 ay müddətinə həbs edilməsi haqqında təqdimat göndərib.

Xatırladaq ki, Orucov mayın 2-də polisə tabe olmama ittihamı ilə həbs edilib. -06D-