Kəlbəcərlilərin məhkəməsində

Yerevan/ 30.10.14/Turan-Armİnfo: Qarabağda Kəlbəcər rayonunun keçmiş sakinləri Dilqəm Əsgərovla Şahbaz Quliyevin məhkəməsi davam edir. Ermənistan KİV-nin məlumatına görə, oktyabrın 29-da D.Əsgərov bildirib ki, 1993-cü ildə Kəlbəcərin işğalından sonra müntəzəm olaraq oraya gedib. Əsasən 1998, 2005 və 2007-ci illərdə həm tək, həm də yoldaşları ilə birlikdə cəbhə xəttini keçib.

Bu ilin yayında Ş.Quliyev və H.Həsənovla birlikdə son gedişinə dair vəziyyətə toxunaraq deyib ki, məqsəd bu rayonda gizlədilmiş qızılı tapmaq və qohumlarının məzarını ziyarət etmək olub.

D.Əsgərovun sözlərinə görə, onlar ermənilərin nəzarətində olan ərazidə olarkən videokamera ilə çəkilişlər aparıblar. Çəkilişin səbəbləri ilə bağlı sualın cavabında deyiblər ki, bunları öz gələcək kafelərində nümayiş etdirmək niyyətində olublar.

D.Əsgərov yerli sakin, 17 yaşlı Smbat Sakanyanın qətlində iştirakını inkar edib. O deyib ki qətli qrupun üçüncü üzvü Həsən Həsənov törədib.

Sonra Ş.Quliyev analoji ifadə verərək qətldə əli olmadığını bildirib.

Erməni tərəfi bildirib ki, H.Həsənov Kəlbəcərdə avtomobildə olan kişi və qadına atəş açdıqdan sonra güllələnib.  -02D-