Maşallah Əhmədov məhkəmə zalında həbs olundu
Bakı/30.01.17/TuranDələduzluqda suçlanan veteran futbolçu Maşallah Əhmədov həbs olunub. Hadisə yanvarın 30-da Bakı Ağır Cinayətlər Məhkəməsində baş verib. İstintaq və məhkəmə dövründə ev dustağı olan futbolçu məhkəmənin hökmü ilə 8 il azadlıqdan məhrum edilib.
Hökmdən öncə Maşallah Əhmədov məhkəmədə son sözünü deyib, AzadlıqRadiosu xəbər verir.
O, Yusif Əzizovla İrandan satmağa mərmər daş gətirdiklərini, amma sözləri düz gəlmədiyindən işlərinin alınmadığını deyib. İş alınmadığına görə Y.Əzizova özünün torpaq sahəsini verdiyini deyən M.Əhmədovla şəriki yenə razılaşmayıb: «Sonra gəldi ki, torpağı istəmirəm. Gətirdiyimiz daşları istədi. Şantaj elədi ki, guya daşları oğurlamışam. Halbuki qarşılığında torpağı vermişdim. Yusif nə istəyir, bilmirəm. Bunu kimlər öyrədir, nə etmək istəyir, bilmirəm. Ev istəyirdi, verdim, amma istəmədi. Dirənib ki, 128 mini verməlisən. Daşları verdim, ev də verdim. Deyirdi ki, mənə kompensasiya da verməlisən. 20 min də kompensasiya verdim. Məni tutdurmaq istəyir? 57 yaşımda başıma ilk dəfədir belə bir iş gəlir. Məni şantaj edirlər».
M.Əhmədov çıxışının sonunda Y.Əzizova 30 min pul və 70 min dəyəri olan ev təklif edib. Amma zərərçəkmiş bu təkliflə razılaşmayıb.
Bundan sonra Maşallah Əhmədov məhkəmədən ədalətli qərar çıxarılmasını istəyib, həbsinin isə sifariş olduğunu bildirib: «Bu, kimlərinsə sifarişidir. Mən sona qədər savaşacam. Oğluma da deyirəm ki, narahat olmasın. Allahdan başqa heç kimdən qorxmuram. Allah bilir ki, bu şər və böhtandır».
Bundan sonra Mirzə Xankişiyevin sədrlik etdiyi hakimlər heyəti müşavirəyə gedib. Qısa müşavirədən sonra Maşallah Əhmədova 8 il həbs cəzası verilməsi haqda hökm elan olunub. Zərərçəkmişlərə dəyən ziyanın bir qisminin ödənilməsi yüngülləşdirici hal kimi nəzərə alınıb.
Cinayət Məcəlləsinin 178.3.2-ci (külli miqdarda ziyan vurmaqla dələduzluq) maddəsi ilə təqsirləndirilən M.Əhmədov 2015-ci il dekabrın 14-də saxlanılıb və Binəqədi rayon Məhkəməsinin qərarı ilə barəsində ilkin istintaq müddəti üçün üç aylıq həbs-qətimkan tədbiri seçilib. Sonradan məhkəmə qətimkan tədbirini dəyişib və həbs ev dustaqlığı ilə əvəzlənib.
Zərərçəkmişlər futbolçunu işə düzəltmək, şərikli biznes qurmaq və s. adlarla pul alıb aldatmaqda günahlandırır.
Maşallah Əhmədov isə ittihamları qəbul etmir, deyilənlərin yalan olduğunu bildirir.
Prokuror veteran futbolçuya 9 il həbs cəzası istəmişdi.
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz