Prezident İlham Əliyev: «Biz özümüz üçün gözəl həyat qurmuşuq»

Ölkə iqtisadiyyatı inkişaf edir, bütün iqtisadi vəzifələr yerinə yetirilib. Bu barədə prezident İlham Əliyev bu gün “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının üçüncü ilinin yekunlarına həsr olunan konfransda bildirib.

Onun sözlərinə görə, neftin qiymətinin aşağı düşməsinə baxmayaraq, əvvəlki illərdə görülmüş işlər və keçən il aparılan dərin islahatlar nəticəsində bu inkişaf təmin edilib.

Dünyada bu gün də davam edən iqtisadi və maliyyə böhranı Azərbaycana da öz mənfi təsirini göstərib. “Ancaq hesab edirəm ki, Azərbaycan digər ölkələrlə müqayisədə bu ağır vəziyyətdən minimum itkilərlə çıxa bilib. Keçən il yüz mindən çox daimi iş yeri yaradılıb”, - o vurğulayıb.

İ.Əliyevin sözlərinə görə, görülən işlərə dünyanın mötəbər beynəlxalq iqtisadi qurumları da yüksək qiymət verirlər: “Bu gün Azərbaycan üçün istənilən layihəyə kredit almaq artıq çoxdan problem deyil. Hətta indiki siyasət ondan ibarətdir ki, biz xarici kreditlərə o qədər də böyük meyil göstərmirik. Çalışmalıyıq ki, bundan sonra da bütün işləri daxili imkanlar hesabına görək”.

“Çünki xarici borcun artması müsbət hal deyil. Bizdə isə bu göstərici də çox yaxşı səviyyədədir, təqribən 20 faiz səviyyəsindədir. Bu da əvvəlki illərlə müqayisədə daha da böyük rəqəmdir. Bunun da səbəbi manatın devalvasiyaya uğramasıdır. Ondan əvvəlki dövrdə bizim xarici borcumuz 10 faiz həddini keçməyib”, - prezident qeyd edib.

Dövlət başçısı biznes üçün əlverişli şərait yaratmağa çağırıb. “Əgər iş görmək istəyən hansısa investor görsə ki, işıq, qaz, su yoxdur, heç vaxt investisiya qoymaz”, - o vurğulayıb.

Regional layihələrə toxunan dövlət başçısı Azərbaycanın liderliyi sayəsində gerçəkləşdirlən “Cənub” qaz dəhlizinin xüsusi rolunu qeyd edib.

O, neft strategiyasından danışarkən deyib: “Ancaq biz bu təbii sərvətimizdən maksimum dərəcədə səmərəli istifadə edə bilmişik, ölkəmizi möhkəmləndirmişik, möhkəm dövlət qurmuşuq və 25 ildir ki, müstəqil ölkə kimi yaşayırıq. Şəhərlərimizi qurmuşuq, özümüz üçün gözəl həyat yaratmışıq”.

“Əlbəttə ki, bütün bu işlərin mərkəzində Azərbaycan vətəndaşı dayanır. Əgər xalq bizə dəstək verməsə idi, biz bütün bu işləri görə bilməzdik”, - o qeyd edib.

Sonra o, “mütəmadi qaydada qarayaxma, böhtan, təhqir kampaniyaları aparan” xarici düşmənlərdən şikayətlənib.

“Biz bilirik ki, bunlar haradan qaynaqlanır, bunun arxasında kimlər dayanırlar, onların məqsədi nədən ibarətdir. Ona görə öz yolumuzla gedirik və həyat hər şeyi öz yerinə qoyur. Bizə qarşı o çirkin kampaniyaları təşkil edənlərin özləri də artıq siyasi səhnədən kənarlaşdırılıblar”, - o bildirib.-02D-