![Məcburi köçkünlər Yasamalda sayğac quraşdırılmasına imkan vermədilər](https://turan.az/resized/media/2017/main/020200182124-750-500-resize.webp)
Məcburi köçkünlər Yasamalda sayğac quraşdırılmasına imkan vermədilər
Bu gün, fevralın 2-də Yasamal rayonunda məskunlaşan bir qrup məcburi köçkün sayğacların quraşdırılmasına etiraz ediblər.
Azərqaz” və “Azərışıq”ın nümayəndələri günorta saatlarında rayonun məcburi köçkünlərin məskunlaşdığı Zahid Xəlilov 85, bina 14 ünvanda sayğac quraşdırmaq istəyiblər.
Bu zaman onlarla sakinlər arasında mübahisə yaranıb. Məcburi köçkün xanımlardan birinin özünü yandırmaq istədiyi bildirilir.
Əraziyə gələn polis əməkdaşları buna imkan verməyiblər.
Məcburi köçkünlər “Qaçqınkom”dan narazılıq ediblər.
Onların deməsinə görə, “Qaçqınkom” illərdir ki, onları evlə təmin edəcəyinə söz verib.
“Ancaq əməl etmirlər. Burda həyat şəraiti dözülməzdir, bir otaqlı mənzillərin çoxunda 2 ailə məskunlaşıb. Mənzillər bəs deyilmiş kimi, ümumi istifadədə olan hamam və mətbəxlərə də sayğac quraşdırmaq istəyirlər. Necə müəyyən edəcəyik ki, orda qazdan, işıqdan kim nə qədər istifadə edib? Bizə artıq bir şey lazım deyil, ya bizi torpaqlarımıza qaytarsınlar, ya da mənzillə təmin etsinlər”, məcburi köçkünlər bildiriblər.
Etiraz nəticəsində binada sayğacların quraşdırılması təxirə düşüb.
Qeyd edək ki, Pirşağı qəsəbəsində məskunlaşan məcburi köçkünlər də fevralın 1-də eyni məzmunlu aksiya keçirmişdilər.
Sabunçu rayonu Pirşağı qəsəbəsindəki Qızılqum, Gilavar, Məşəl, Tonqal, Lalə və başqa düşərgələrdə məskunlaşan məcburi köçkünlər sayğac quraşdşrılmasına imkan verməmişdilər.
Prezident İlham Əliyev yanvarın 23-də «Məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi haqqında» fərman imzalayıb.
Həmin sənədə əsasən, məcburi köçkünlərə, onlara bərabər tutulan şəxslərə yemək xərci müavinəti, kommunal və digər xidmətlər üzrə dövlət büdcəsindən ödənişlər dayandırılır.
Bunun əvəzinə onlara hər ay 36 manat məbləğində vahid aylıq müavinət veriləcək.
Sərəncamda həmçinin, məcburi köçkünlərin məskunlaşdığı tikililərin sayğaclaşdırılması da nəzərdə tutulub.
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz