Media-icmal 03.09.20

Qalmaqala səbəb olan açıqlama, müştərinin badamlı alıb dezinfeksiya məhlulu çıxması iddiaları, koronavirus əleyhinə testlərin özəl klinikalarda keçirilməsi barədə təkliflər  və s. medianın aparıcı mövzuları sırasındadır...  

BNA şöbə müdiri qalmaqal yaratdı

“Yenisabah.az” “Nəqliyyat Agentliyinin taksi qalmaqalı böyüyür: Elə bil kosmos turizmidir... sərlövhəli məqalədə bu məsələ müzakirə edilir.

Müəllif  deyir ki,  qalmaqala Bakı Nəqliyyat Agentliyinin (BNA) şöbə müdiri Hikmət Babayevin  “Taksidən istifadə etmək müəyyən imkanlara bağlı olmalıdır və taksiləri gündəlik nəqliyyat vasitəsinə çevirmək düzgün deyil”  bəyanatı səbəb olub.

Məsələ ilə bağlı açıqlama verən iqtisadçı ekspert Natiq Cəfərli deyir ki,   Hikmət Babayevin açıqlaması həm məntiqə ziddir, həm də vətəndaşların aşağılanmasına yönəlib.

“Əvvəla, taksi xidməti kosmos turizmi deyil ki, ancaq varlı insanların imkanı çatacaq xidmət kimi təqdim olunsun. İkincisi, ictimai nəqliyyat normal işləsəydi, sıxlıq olmasaydı, taksi xidmətindən istifadə edənlərin də sayı çox olmazdı”.

Ekspert həm də bu sırada metronun da fəaliyyət göstərməməsini diqqətə çatdırır.

Ekspertin sözlərinə görə, Azərbaycanda taksi xidməti yeganə sahədir ki, burada rəqabət mühiti var: “İki devalvasiyaya və benzinin bahalaşmasına baxmayaraq, taksilərin qiyməti ucuzlaşıb. Çünki bu sahədə rəqabət mühiti var. Onlarla şirkət, minlərlə sahibkar bu sahədə rəqabət mühitində çalışır”.

N.Cəfərli əlavə edib ki, dövlət bu sahəyə müdaxilə etsə bahalaşma başlayacaq, vahid tarif sisteminin tətbiqi və vahid dispetçer mərkəzinin yaradılması ilə bu sahəni tənzimləmək mümkün olmayacaq.

Badamlı aldı dezinfeksiya məhlulu çıxdı

“Oxu.az” saytı “Marketdən “Badamlı” aldı, içindən dezinfeksiya məhlulu çıxdı –  sərlövhəli məqalədə müştərinin üzləşdiyi gözləniməzlik barədə yazır.

Müştəri Nərmin Adil öz Facebook səhifəsində yazıb ki, Bakıda fəaliyyət göstərən “Al Market”dən üzərində “Badamlı” etiketi olan qazsız su alsa da içərkən onun spirt olduğunun fərqinə varıb.

Onun deməsinə görə, sentyabrın 2-də axşam saatlarında “Al Market”in Əhmədli filialında vitrindən “Badamlı” markalı sadə qazsız su götürüb: “Telefonla danışa-danışa gəlib həyətimizdə açdım və başıma çəkdim.

Bir saniyə sonra anladım ki, bu, su deyil, spirt kimi bir dadı var, ağzımı, boğazımı, mədəmi yandırdı. Qonşular su verdilər. Getdim marketə, dedilər ki, yanlış düşüb, firma dezinfeksiya məhlulu göndərib, onu da satıcılar yanlışlıqla su bilib vitrinə düzüblər. Durumu elə də ciddiyə almadılar”.

N.Adilin deməsinə görə, evə gələndən bir saat sonra artıq vəziyyəti ağırlaşıb: “Təcili yardım və polis çağırdıq. “Semaşko”nun toksikologiya şöbəsinə gətirildim.  Dünəndən vəziyyətim ağırdır, ekspertiza və qan analizi nəticəsində qanımda metil spirti aşkarlandı”.

Onun bildirdiyinə görə, baş verənlərlə bağlı “Al Market” şəbəkəsi tərəfindən nə  bir zəng edilib, nə də üzrxahlıq bildirilib.

Onun sözlərinə görə, hazırda bu kimyəvi məhlula görə gözlərində və sinir sistemimdə problem yaranıb.

İmkanı olan bütün klinikalar 

“Yeni avaz”" saytı isə “Məncə, indi bu qadağalara ehtiyac yoxdur" -   sərlövhəli məqalədə müəllif özəl klinikalarda koronavirus əleyhinə testdən keçirilmə məsələsini deputat Musa Quliyevlə müzakirə edir.

M.Quliyev hesab edir ki, koronavirusa görə test aparmaq şəraiti olan istənilən özəl klinikaya bu imkan verilməlidir.

Komitə sədri testlərin aparılması ilə bağlı hər hansı qadağanın qoyulmasını düzgün saymır: "Laboratoriyasında bu analizləri apara bilən istənilən özəl klinikaya koronavirusa görə test aparmaq imkanı verilməlidir. Bu məsələ ilə bağlı hər hansı qadağa, məhdudiyyət qoymaq başqa qeyri-qanuni əməllərin yaranmasına gətirib çıxarır. Əgər hər hansı sahədə sağlam rəqabət olarsa, orada şəffaflıq da olacaq”.

Deputat vurğulayıb ki, rəqabət olmayan yerdə şəffaflıq da olmur, orada təqdim edilən xidmətlərin qiymətləri isə baha olur və narazılıqlar yaranır.

M.Quliyev qeyd edib ki, əslində, ölkədə COVİD-19-a görə test apara biləcək kifayət qədər özəl klinika var.

Onun sözlərinə görə, laboratoriya analizləri aparmaq üçün lisenziyası olan istənilən klinika bu testi edə bilər: “Buna görə həmin klinikalara da bu testi aparmağa icazə vermək lazımdır”.