Prezident İlham Əliyev Yunanıstan səfirinə: “Şərqi Aralıq dənizində Azərbaycan Türkiyəni qətiyyətlə dəstəkləyir”

Bakı/03.09.20/Turan: Azərbaycan Ermənistan, Yunanıstan və Kipr arasında hərbi əməkdaşlıqdan narahatdır. Bu barədə Azərbaycan prezidenti İlham Əliyev sentyabrın 2-də Yunanıstanın yeni səfiri Nikolaos Piperiqkosun etimadnaməsini qəbul edərkən bildirib.

Prezident diqqəti ona yönəldib ki, Ermənistan Azərbaycan ərazilərini işğal etmiş ölkədir. Xocalıda soyqırım aktı törədib, bir milyon azərbaycanlını evlərindən didərgin salıb. Ermənistan beynəlxalq hüququ pozur, BMT Təhlükəsizlik Şurasının və başqa təşkilatların qətnamələrinə əməl etmir. “Yeri gəlmişkən, iki il əvvəl Avropa İttifaqı və Azərbaycan “Tərəfdaşlıq prioritetləri” adlı sənədi paraflayıblar. Orada Avropa İttifaqı Azərbaycanın ərazi bütövlüyünü, suverenliyini və beynəlxalq səviyyədə tanınmış sərhədlərinin toxunulmazlığını dəstəkləyir”, - dövlət başçısı xatırladıb.

Dövlət sərhəddində son gərginliklər Ermənistanın təxribatıdır. Sözsüz ki, Ermənistanın istənilən ölkə ilə sıx hərbi əməkdaşlığı narahatlıq doğurur.

Bu, Rusiyanın Ermənistana hərbi yük göndərməsinə də aiddir. “Aktiv toqquşmalar iyulun 16-da dayandırıldı və iyulun 17-dən başlayaraq dünənə qədər, - dünən sonuncu uçuş idi, - Rusiyadan Ermənistana Xəzəryanı dövlətlərin hava məkanı vasitəsilə çoxsaylı yük reysləri həyata keçirilib”, - o qeyd edib.  

Buna görə də üçtərəfli əməkdaşlıq formatı (Ermənistan-Yunanıstan-Kipr) Azərbaycanı narahat edir.

“Əlbəttə ki, hər bir ölkə nəyi doğru düşünürsə, onu da edir. Buna görə biz bunu bloklamaq və ya istənilən şəkildə qarşısını almaq mövqeyində deyilik. Lakin hesab edirəm ki, bunun bizi narahat edən məsələ olduğunu məndən eşitməyiniz yaxşıdır və bunun niyə görə baş verdiyini mən izah etdim. Ermənistanın torpaqlarını işğal edən Azərbaycan deyil, Ermənistan Azərbaycanın ərazisini işğal edib. Bu da bütün beynəlxalq təşkilatların sənədlərində öz əksini tapıb”, - İ.Əliyev bildirib.

O həmçinin Türkiyə və Yunanıstan arasında Şərqi Aralıq dənizi regionunda gərginliyin artmasına toxunub.

“Sizə deyə bilərəm və bu sirr deyil ki, Türkiyə təkcə bizim dost və tərəfdaşımız yox, bizim üçün qardaş ölkədir. Biz heç bir tərəddüd etmədən Türkiyəni dəstəkləyirik və bütün hallarda dəstəkləyəcəyik. Biz eyni dəstəyi türk qardaşlarımızdan da görürük. Onlar Azərbaycanı bütün məsələlərdə dəstəkləyirlər və biz onları bütün məsələlərdə dəstəkləyirik, o cümlədən Şərqi Aralıq dənizində kəşfiyyat məsələsi ilə bağlı. Mən istəyirəm ki, siz bizim mövqeyimizi biləsiniz. Bu mövqe mənim göstərişimlə artıq Azərbaycan hökuməti tərəfindən rəsmi açıqlanıb. Sizə bir daha deyə bilərəm ki, Türkiyə bizim üçün təkcə dost yox, qardaş ölkədir və türklər bizim qardaşlarımızdır. Beləliklə, bütün məsələlərdə biz onların yanında olacağıq”, - İ.Əliyev deyib.

Səfir Nikolaos Piperiqkos öz növbəsində qeyd edib ki, Azərbaycan kimi, Yunanıstan da beynəlxalq hüquqa sadiqdir.

“Biz həmişə beynəlxalq hüquqa tamamilə riayət edərək Azərbaycanla münasibətlərimizə zərər vurmamağa diqqət yetiririk və sizin tərəfinizdən bunun mümkün olduğu qədər qarşılığını görmək istərdik. Lakin düşünürəm ki, yeni hökumətimizə sizin hökumətinizlə münasibətlərimizi yaxşılaşdırmağa imkan tapmaq üçün vaxt verildiyini nəzərə alaraq əməkdaşlığımızın gələcəyi daha yaxşı ola bilər. Hazırda bu qədər söyləyə bilərəm”, - diplomat deyib.—06D-