Prezident İlham Əliyev: “Afinanın davranışı ikitərəfli münasibətlərə mənfi təsir göstərib”

Bakı/03.09.20/Turan: Son bir neçə ildə Azərbaycanla Yunanıstan arasında əməkdaşlıq çox aşağı səviyyədə olub. Bu barədə prezident İlham Əliyev sentyabrın 2-də Yunanıstanın yeni səfiri Nikolaos Piperiqkosun etimadnaməsini qəbul edərkən bildirib.

O, iki ölkə prezidentlərinin keçmişdə qarşılıqlı səfərlərini xatırladıb.

“Lakin Yunanıstanın əvvəlki hökuməti hakimiyyətə gələndən sonra bu təmaslar dayanıb və bu, Yunanıstan hökumətinin təşəbbüsü olub. Beləliklə, hazırda bizim faktiki olaraq aktiv təmaslarımız, nümayəndə heyətlərinin mübadiləsi yoxdur. Bizim gələcəkdə əməkdaşlığımızı necə planlaşdırmaq barədə düşünməyə ehtiyacımız var”, - İ.ƏLiyev deyib.

O, ikitərəfli münasibətlərə mənfi təsir göstərən məsələləri qeyd edib.

“Onlardan biri Yunanıstanın qaz şirkəti “DESFA” ilə əlaqədardır. Deyə bilərəm ki, bizim enerji şirkətimiz SOCAR Yunanıstan hökumətinin müraciəti əsasında DESFA-nı almaq üçün tenderə qoşuldu. SOCAR-ın tender prosedurunda iştirak etməsini Yunanıstanın sabiq baş naziri cənab Samaras şəxsən məndən xahiş etdi. Açıq tender proseduru nəticəsində SOCAR ən yaxşı təklifi etdi və DESFA-ya sahib olmaq hüququnu qazandı. Bu, bizim “Cənub” qaz dəhlizinin tikintisi ilə bağlı planlarımız baxımından da mühüm əhəmiyyət kəsb edirdi. Bu, təxminən 6 il bundan əvvəl olub. Həmin vaxt əlbəttə ki, biz Azərbaycanla Avropa arasında bağlantı inşa etməyi, sadəcə olaraq, planlaşdırırdıq və düşündük ki, əgər Azərbaycan Yunanıstanı qazla təchiz edəcəksə, bu qazı paylaşdıran şirkətə sahib olmaq da yaxşı olar. İstənilən halda biz qiymətin 10 faizini təşkil edən 40 milyon avro məbləğində avans ödənişi etdik və 4 il ərzində - 2014-cü ildən 2018-ci ilədək həmin vəsait Yunanıstan hökumətinin ixtiyarında olub”, - prezident bildirib.

Lakin onun sözlərinə görə, Yunanıstanın əvvəlki hökuməti siyasi səbəblərdən, Azərbaycana olan mənfi münasibəti səbəbindən SOCAR-ı bu legitim hüquqdan məhrum etdi.

Azərbaycan cavab tədbirləri görmədi, diplomatik demarş etmədi.

Lakinİ.Əliyev bu məsələni bir neçə dəfə Brüsseldə Avropa İttifaqının iki sabiq lideri ilə - cənab Barrozu və cənab Tuskla qaldırıb. Çünki bu, 4 il davam edib. “Mən dedim, bizə “yox” deyin, bizə “sizi istəmirik” deyin. Lakin bizi 4 il müddətində bu vəziyyətdə saxlamaq tərəfdaşlıq əlaməti deyil”, - İ.Əliyev qeyd edib.

Afina ilə SOCAR arasında razılaşmanın pozulmasına baxmayaraq, Bakı TAP-ın Yunanıstan marşrutu üzrə layihəsini dəstəkləyib.

“TAP Azərbaycan qazının nəqli üçün yeganə variant deyildi. Azərbaycan qazının Türkiyə ərazisinə çatandan sonra nəql olunması üçün bir neçə variant var idi. Fərqli istiqamətdə ola bilərdi. Lakin TAP-ın seçilməsi həm də investorlar, xarici neft şirkətləri və Azərbaycan tərəfindən verilmiş qərar idi. Başqa sözlə, biz öz tərəfimizdən Yunanıstana müsbət jest etdik. Lakin əvvəlki hökumət hakimiyyətə gələndən sonra, mən bunu xüsusilə vurğulamaq istəyirəm, çünki keçmiş Siriza hökuməti hakimiyyətə gəlməmişdən əvvəl bizim əvvəlki Yunanıstan hökumətləri ilə çox yaxşı münasibətlərimiz olub”, - İ.Əliyev deyib.

Səfir Piperiqkos öz növbəsində bildirib ki, yeni hökumət ikitərəfli əlaqələrin qurulması üçün daha yaxşı yollar tapmaq üçün əlindən gələni edəcək.—06D-