Media-İcmal 06.02.16

“Azərbaycan” qəzeti ölkənin dünyada müstəqil dövlət kimi uğurlu siyasət apardığını deyir. “Azərbaycan son illər özünün inkişaf nümunəsi, brendləri ilə dünyada qəbul edilən ölkəyə çevrilib” , - qəzet yazır.       

“Hakimiyyət özünü beynəlxalq aləmin hədəfinə gətirir”. Hüquqşünas Ələsgər Məmmədli Avropa Məhkəməsi qərarlarının qəbul edilməməsi haqda Milli Məclisin təşəbbüsünü “Azadlıq” qəzetinə şərhində belə dəyərləndirir.

“Belə təşəbbüs Konstitusiyanın 151-ci maddəsinə əsasən mümkün deyil, çünki bu maddə beynəlxalq aktların hüquqi qüvvəsinin qanunlardan üstün olduğunu təsbit edir, bu maddə dəyişməyincə hansısa qanunun qəbul edilməsi sadəcə mümkün deyil”, - hüquqşünas mövqeyini əsaslandırır.

Ə.Məmmədliyə görə, hakimiyyət ancaq belə məzmunlu Konstitusiya qanunu qəbul edə bilər və belə qanun qəbul oluna bilməsinin nəticələrinin ağır olacağını da xatırladır. “Belə qanunun qəbulu Azərbaycanın beynəlxalq aləmdən təcrid olunması, Azərbaycan vətəndaşlarının beynəlxalq arenada tanınan hüquqlarının inkar edilməsi deməkdir”, - hüquqşünas bunu geriyə addım adlandırır.

“Avropa Məhkəməsinin qərarlarının qəbulu, Avropa Şurasına qoşulma Azərbaycan xalqının ortaq maraqlarıdır və belə qanunun qəbulu hökumət və parlamentin beynəlxalq aləmdə çox sürətlə gözdən düşməsinə səbəb olacaq”, - qanun qəbul ediləcəyi halda mümkün nəticələrinə toxunur.

“Beynəlxalq neft bazarında qeyri-sabit duruma baxmayaraq, Azərbaycan hələ də neft “qara qızıl”in qiymətinin artacağına ümidini itirmir, hökumət üzvləri tezliklə neftin qiymətinin artacağı haqda açqılamalar verirlər”. “Novoe Vremya” belə yazır, arxasınca da belə optimizmin səbəbinin aydın olmadığını vurğulayır.

Qəzet bu sahədə hökumətin Avropanı qazla təchiz edəcək TAP və TANAP layihələrinə önəm verməsinı xüsusi qeyd edir, eyni zamanda bu layihələrin icra edilcəyi məkan yaxınlığnda savaş (Suriya) getməsi xatırladılır və bunun rentabelli ola biləcəyi məsələsinə şübhəni  gündəmə gətirilir.

“İndiyə qədər bir çox qaz kəmərləri rentabelli olmayıb, indi neftin qiyməti kəskin düşəndə daha çox vurğu qazın üzərinə qoyulur və bu da çox zaman siyasi xarakterli olur”, - qəzet qeyd edir. “Bir sözlə daha bir sual da yaranır ki, öz vasitələrimiz hesabına Avropanın enerji təhlükəsizliyini qorumaq beləmi zəruridir?”, - müəllif sual ünvanlayır.

“Əmanətlər banklardan kütləvi şəkildə çıxarılır” “Yeni Müsavat” belə yazır. Müəllifə görə, bunun səbəbi əhalinin banklara inanmamasıdır. Mərkəzi Bankın isə banklardan çıxarılan əmanətlərin həcmi barədə açıqlama vermədiyi vurğulanır.

“Ölkənin bank sisteminə inamın kəskin azalması əmanətlərlə bağlı təhlükəni daha da artırır və bu səbəbdən əhali əmanətlərini banklardan çıxarmağa üstünlük verir. 2015-ci ildə banklardan 3.1 milyard manat əmanət geri çəkilib, təkcə dekabr ayında bu rəqəm 540 milyon manat təşkil edib”, - ekspert Əkrəm Həsənov bildirib.   “Əmanətlərin kütləvi şəkildə geri çəkilməsi prosesi davam edəcək”, - o qeyd edib. “Bank sisteminə etimadın azalması, banklara səmərəsiz nəzarət, bankların bağlanması, sığortalanmayan əmanətlərin bata bilməsi bunu deməyə əsas verir”, - Ə.Həsənov öz mövqeyini əsaslandırır.

“Üç dövlət proqramı işsizliyi həll edə bilməyib, bölgələrə yatırılan milyardlar nəticə verməyib, hökumət çıxış yolu axtarır”, “Bizim Yol” bölgələrə yatırılan milyardların taleyinin belə başa çatdığını yazır.

“Ölkədə tüğyan edən korrupsiya, inhisar və rüşvət bütün islahatlara qalib gəlib, konkret olaraq dövlət proqramları qəbul edilib, bu istiqamətdə vəsait ayrılıb. Amma bu proqramlar regionlarda yeni iş yerlərinin açlışını təmin etməyib”, - ekspert Nemət Əliyev dövlət vəsaitlərinin səmərəsiuz xərcləndiyini deyir. O, Azərbaycanda ailələrin daha çox Rusiya və Türkiyədən gələn gəlirlərin hesabına dolandığını bildirir.  

“İş yerlərinin artması üçün sahibkarlıq mühiti şəffaflaşmalı, inhisar aradan qalxmalı, korrupsiyaya qarşı ciddi mübarizə getməldir”, - N.Əliyev çıxış yolunun harada olduğunu izah edir .