Media-icmal 15.04.21

Ölkədən “beyin köçü”nün qarşısını necə almalı, “Qarabağın statusu” məsələsini necə zərərsizləşdirmək olar, yoluxmanın artması sərt karantin rejiminin tətbiqinə səbəb ola bilərmi, mənzil alanda aldadılmamaq üçün nəyə diqqət yetirməli və s. məsələlər medianın aparıcı mövzuları sırasındadır.  

“Sfera.az” saytı  “ Beyin köçü”nü necə dayandırmalı?” sərlövhəli məqalədə bəhs edilən məsələni dəyərləndirir.

Müəllif deyir ki, adına “beyin köçü” verilən bu proses son illər daha da intensivləşib və narahatlıq doğurur: “Müşahidələrə görə, yüksək təhsil almış, öz ixtisası üzrə mütəxəssis hesab edilən şəxslər ölkəni tərk edərək inkişaf etmiş dövlətlərin tanınmış elm və istehsal şirkətlərində çaılışırlar.

Deputat Tahir Mirkişili deyir ki, çoxları bu şəxsləri yüksək maaşa, pula ölkədə saxlamanın mümkünlüyünü düşünürdülər.

Onun deməsinə görə, aparılan təhlillər göstərdi ki,  belə insanlar üçün yüksək maaş, pul sonuncu yerdə durur, onlar üçün böyük məsələ hədəfin müəyyən edilməsi, kollektivdə söz sahibi olması, onlara hörmət bəslənilməsi kimi çərçivə var.

Deputatın fikrincə, insan resurslarının insan kapitalına çevrilməsi üçün bu motivasiyaların təmin edilməsi olmasa olmazdır, mütləq şərtdir.

Deputat vurğulayır ki, əks halda bu “beyin köçü”nün qarşısını almaq mümkün olmayacaq.

“Yenisabah.az” saytı “Qarabağın statusu masaya gətirilir - Bakı, Sumqayıt və Gəncəyə ermənilərin qayıtması...” sərlövhəli məqalədə Azərbaycan-Ermənistan münasibətlərinin bundan sonrakı inkişafı iqtisadçı-ekspert Natiq Cəfərli ilə müzakirəyə çıxaırlır.

Onun fikrincə,  “Zəngəzur məsələsi”nin gündəmdə olması ərazi iddiası, aqressivlik deyil, siyasi təzyiq vasitəsidir. O deyir ki, Azərbaycan qonşuları ilə  sülh şəraitində yaşamaqda, iqtisadi və insani münasibətlərin yaranmasında, kommunikasiya xəttlərinin açılmasında, logistik əlaqələrin bərpasında maraqlıdır.

Ekspert həm də Qarabağın status məsələsinin qaldırıla biləcəyini də gözardı etmir, həm də  xəbərdarlıq edir ki, bunu tək rəsmi İrəvan yox, Moskva, Paris, Vaşinqton da qaldıra bilər.

Cəfərliyə görə, Minsk Qrupu formatı da, Moskvanın regionda təkbaşına söz sahibi olmaq istəməsi də ortadadır: “Biz işimizi doğru qursaq, Moskva ilə Qərb arasında olan münaqişə və fikir ayrılığından gözəl istifadə edə bilərik. Rusiyanın bu məsələdə tək söz sahibi olmaq istəməsi tək bizi yox, Qərbi də narahat edir”.

O hesab edir ki, Rusiya qoşunlarının Azərbaycandan çıxarılması məsələsində Paris və Vaşinqton Azərbaycana kömək edə bilər.

Cəfərli vurğulayır ki, Minsk Qrupunun təhlükəli yanları da var, bu da Qarabağın statusu məsələsidir: “Biz özümüzü aldatmayaq. Bu məsələ masaya gətiriləcək və bu təzyiqlərin qarşısını daxildə çoxsəsli parlament, həm də Zəngəzura qaşqınların qayıtması və buna zəmanət məsələsi ala bilər”.

“Oxu.az”  saytı “İnfeksionist: Yoluxma sayında artım olarsa, Ramazanda qapanma olacaq”  sərlövhəli məqalədə pandemiya ilə bağlı durum infeksionist Sadiqə Əliyeva ilə dəyərləndirilir.

Həkim  hesab edir ki, əgər yoluxma sayı indiki tendensiya ilə davam edərsə, Ramazanda müəyyən qapanmalara gedilməsi qaçılmazdır. Onun deməsinə görə, qapanmalara gedilməməsi üçün karantin davranış qaydalarına ciddi əməl olunmalıdır. 

İnfeksionistə görə, iftar süfrələrində toplaşmaların qarşısı alınmalıdır, əgər belə olarsa yoluxma sayında artım da olmaz.

Həkim yoluxma hallarının 30-39 yaş arasındakı şəxslərdə qeydə alınması ilə bağlı danışaraq deyib ki, bu yaş kateqoriyasından olanlar ictimai və iaşə obyektlərində daha çox bir yerə toplanırlar və ona görə də yoluxma onlarda özünü daha ox biruzə verir.

Əliyeva deyir ki, son vaxtlar müşahidə edilən yoluxma sayındakı artım vətəndaşların qaydalara əməl etməməsi ilə bağlıdır. İnfeksionist deyir ki, buna görə də yoluxma sayı bu tendensiya ilə davam edərsə Ramazanda müəyyən qapanmaların olması qaçılmazdır.

“Bizimyol.info.az”  saytı  “Evin “netto-brutto”su və ya yeni binalardan ev alanda nəyə diqqət etməli...” sərlövhəli məqalədə müştəri olaraq mənzil alarkən aldadılmamaq üçün  nələrə diqqət yetirməni gündəmin müzakirəsinə gətirir.

Müəllifin deməsinə görə, problemlərdən biri də alqı-satqı və söküntü zamanı satıcı ilə alıcı arasında yaranan anlaşılmazlıqların qalmasıdır.

Hüquqşünas Pərviz Qurbanov deyir ki, binanı tikən şirkət tikintini Mənzil Tikinti Kooperativi formasında aparır və bu Mənzil Tikinti kooperativləri tikilən binada pay hüququnu müəyyən şəxslərə satırdı. “O formada onlara sərf edirdi. Müqavilə əsasında alqı-satqı edilən bu mənzilləri sənədləşdirəndə, kupça alanda onlara fərqli kvadratura yazılırdı”, - hüquqşünas bildirir.

Yəni, şirkət sahibi evi satarkən mənzilin sahəsini özünə sərf edən kimi hesablayır.

Müəllifin deməsinə görə, tikinti şirkətləri deyirlər ki, dünya standartlarında mənzil tikintisində iki ölçü meyarı var: netto və brutto.

Müştərilər mənzil alarkən sənədin üzərində ölçünün netto və ya brutto olmasına diqqət yetirməlidir, bilməlidir ki,  ölçü meyarları məsələsi qanunla təsbit edilsə də buna Mənzil Tikinti kooperativləri tərəfindən əməl edilmir.

Qaydalara əsasən bina tikən şirkət binanın ətrafında yaşıllaşdırma işləri də aparmalıdır, çox şirkətlər yaşıllaşdırmaya aid olan zonanı da tikinti işləri üçün istifadə edirdilər. İndi bu tələb sərtləşdirilib. Bu isə o deməkdir ki, Mənzil Tikinti Kooperativinin əlindən tikinti sahəsi alınıbsa, mənzillərin qiyməti əvvəlkindən baha olacaq.