Media-icmal 15.08.20

Azərbaycan-Türkiyə münasibətləri, səfir Eldar Həsənovun həbsi, taksi fəaliyyəti sahəsində inhisarlaşma ehtimalı və s. məsələlər medianın aparıcı mövzuları sırasındadır...

"Azərbaycan" qəzeti "Birliyin və qardaşlığın parlaq təzahürü" sərlövhəli məqalədə Azərbaycan-Türkiyə münasibətlərini dəyərləndirir.

Müəllifə görə, Azərbaycan dövlət müstəqilliyini bərpa etdikdən sonra Azərbaycanın türk dövlətləri ilə əlaqələri formalaşıb, Türkiyə ilə əlaqələr xüsusilə qeyd olunmalıdır və bu əlaqələr həm də strateji xarakter daşıyır.

Diqqəti Azərbaycanın ərazi bütövlüyünə çəkən müəllif Türkiyənin Qarabağ probleminə münasibətdə Azərbaycanın mövqeyini birmənalı dəstəklədiyini vurğulayır.

Müəllif buna nümunə olaraq bu il iyulun 12-16-da Tovuz istiqamətində baş vermiş döyüşlərdə bu ölkənin tutduğu mövqeyi göstərir.

Yazıda vurğulanır ki, bu günlərdə Bakıda olan Türkiyə hərbi nümayəndə heyətilə görüşündə dövlət baçısı İlham Əliyev də bu dəstəyi xüsusi qeyd edib.

Müəllifə görə, qarşılıqlı etimada əsaslanan hərbi əlaqələr həm də bölgədə sülhün, sabitliyin, davamlı inkişafın və xalqlarımızın rifahının təmin olunması baxımından əhəmiyyət kəsb edir.

"İndi iki ölkənin hərbi əməkdaşlığı müdafiə sahəsinin, demək olar ki, bütün istiqamətlərini əhatə edir. Bu sırada hər il keçirilən birgə təlimlər xüsusən aktuallığı ilə diqqəti cəlb edir", deyə məqalədə qeyd olunur.

Müəllif deyir ki, bu il iyulun 29-dan avqustun 10-na kimi Azərbaycanın bir neçə bölgəsində davam etmiş birgə Türkiyə-Azərbaycan hərbi təlimləri yüksək səviyyədə keçib.

Müəllif vurğulayır ki, iki ölkənin müdafiə sahəsində uğurlu əməkdaşlığının növbəti göstəricisi olan bu təlim miqyasına və qarşıya qoyulan vəzifələrə görə əvvəlkilərdən əhəmiyyətli dərəcədə fərqləndi.

Yazı müəllifi deyir ki, Ermənistan tərəf bu təlimləri ciddi narahatlıqla qarşılayıb: "Bu təlim Tovuz döyüşlərindən sonra düşmənə verilən növbəti hərbi-siyasi mesaj oldu", deyə müəllif təlimlərin mahiyyətini xüsusi vurğulayır.

"Yenisabah.az" isə "Bu həbslər Eldar Həsənovla yekunlaşmayacaq - deputat" sərlövhəli məqalədə səfir Eldar Həsənovun həbsinin səbəbləri barədə deputat Fəzail Ağamalı ilə söhbətləşir. 

F.Ağamalı deyir ki, bu həbslər Eldar Həsənovla yekunlaşmayacaq: "Eldar Həsənovun tutulması ölkə prezidentinin həyata keçirdiyi islahatların tərkib hissəsidir və buna belə də yanaşmaq lazımdır".

Onun sözlərinə görə, Xarici İşlər Nazirliyi sistemində və ölkənin diplomatik korpusunda yeni həbslərin olacağı gözlənilir: "Başladılmış bu proses sistemli xarakter daşıyır və bundan sonra da davam edəcək. Əminəm ki, DTX-nın peşəkar istintaqçıları məsələni obyektiv şəkildə araşdıracaq, baş vermiş hadisənin bütün mahiyyəti üzə çıxarılacaq.

F.Ağamalı hesab edir ki, E.Həsənovun həbsi ətrafında irəli sürülən müxtəlif versiyalar o qədər də ciddi mahiyyət kəsb etmir. "Dediyim kimi, hər şey bəlli olacaq. Cəmiyyət də həqiqəti məhz DTX və Baş Prokurorluğun verəcəyi məlumatlardan öyrənəcək".

Deputat hesab edir ki, bu həbslər bununla yekunlaşmayacaq, istər Xarici İşlər Nazirliyində, istərsə də digər qurumlarda yeni-yeni faktlar üzə çıxacaq. 

"Arqument.az" isə taksi xidmətinin inhisarlaşa bilməsi ehtimalı barədə yazır və "Taksi Xidməti inhisarlaşır?" sualını gündəmə gətirir.

Yaxın zamanlarda Bakıda taksi xidməti göstərən avtomobillərlə bağlı yeni standartlar qəbul olunacaq .Demokratiya və Rifah Hərəkatının sədri, iqtisadçı Qubad İbadoğlu isə deyir ki, bu, taksi xidməti bazarının inhisara alınmasıdır:

"Ötən il müsahibələrimin birində inhisarçılıqdan bəhs edərkən "bəs ölkədə elə bir sahə varmı monopoliya olmasın", - sualına taksi xidmətləri bazarını misal göstərmişdim. Çünki ötən il taksi xidmətlərinin qiymətləri məhz rəqabətli bazar şəraitinə görə ucuzlaşmışdı".

Q.İbadoğlu hesab edir ki, amma son zamanlar baş verənlər göstərir ki, bu sahədəki xidmətlərdə inhisarçılıq meylləri yaranır.

Qubad İbadoğlu deyir ki, ötən il ərzində sərnişindaşıma fəaliyyəti xidmətindən istifadə edənlərin sayı 60-70 milyon nəfərə çatıb. Hər xidmətdən istifadə üçün orta hesabla 5 manat xərclənərsə, bu, təxminən 300-350 milyon manatlıq taksi xidmətləri dövriyyəsi deməkdir.