Media-icmal 20.10.20

"Yenisabah.az" saytında  "Ermənistanın daha bir iyrənc planı" sərlövhəli məqalədə Ermənistanın İranı münaqişəyə cəlb etmək üçün plan qurmasından bəhs edilir.

Müəllifin sözlərinə görə, Ermənistanın Səhiyyə Nazirliyi məlumat yayıb ki, döyüş meydanında qalan cəsədlər vəba kimi yoluxucu xəstəliklərə səbəb ola və Araz çayı vasitəsilə İranın sərhəd zonasına yaxın ərazilərinə yayıla bilər.

Müəllifin fikirncə, bunda Ermənistanın məqsədi heç də atəşkəs elan edərək cəsədlərin döyüş meydanından yığışdırılması deyil, əksinə, bu təxribatla İran-Azərbaycan münasibətlərini gərginləşdirmək və İranı Azərbaycanla münqişəyə cəlb etməkdir.

Yazı müəllifi yada salır ki, Azərbaycan tərəf iki dəfə humantar atəşkəsə razılıq verib, cəsədlərin müəyyən hissəsinin Ermənistanla həmsərhəd Tovuz rayonunda təhvil verilməsinin mümkünlüyünü bildirib, amma erməni tərəf hər hansı addım atmayıb.

Müəllif vurğulayır ki, Ermənistan rəhbərliyi işğal altında olan 7 rayonu boşaltmaq əvəzinə Dağlıq Qarabağın öz müqəddəratını həll etməsindən danışır, oktyabrın 11-də və 18-də atəşkəs elan oldunduqdan sonra  gecə Gəncəni raket atəşinə tutur.

"Ermənistan tərəf oktyabrın 12-də Gəncəni raket atəşinə tutub. Nəticədə 10 nəfər mülki şəxs həyatını itirib, 30 nəfər isə xəsarət alıb. İrəvanın növbəti hərbi cinayəti isə oktyabrın 17-də baş verib. Ermənistan növbəti dəfə Gəncəyə taktiki ballistik raket atıb. Bu dəfə 13 mülki şəxs həyatını itirb, 40 nəfərdən çox dinc sakin xəsarət alıb", deyə müəllif bildirir.  

Müəllifə görə, bu, Ermənistanın danışıqlara hələ də hazır olmadığının, işğal olunan ərazilərdən çıxmaq istəməməsinin göstəricisi, Azərbaycanın ərazi bütövlüyünü şübhə altına almaqdır və Bakı üçün qəbuledilməzdir.

Müəllif deyir ki, elə bundan da irəli gələrək, erməni tərəf münaqişənin miqyasını böyütməyə, Cənubi Qafqaz regionunu müharibə meydanına çevirməyə cəhd göstərir və onun "yoluxucu xəstəliklər"lə bağlı bəyanatı da buna xidmət edir.

"Redaktor.az" saytı "Ermənistan niyə Gəncəni hədəf alıb? - Türkiyəli ekspert açıqladı" sərlövhəli məqalədə müəllif Ermənistan tərəfdən oktyabrın 11-də və 18-də Gəncənin raket atəşinə tutulmasını Türkiyəli ekspert Həsən Oktayla şərh edir. 

Ekspertin fikrincə, Azərbaycan Dağlıq Qarabağda keçirdiyi antiterror əməliyyatlarını sürətləndirməlidir. Səbəb kimi də bunu göstərir ki, müharibə uzandıqca Ermənistan münaqişəyə başqa ölkələri də cəlb etməyə çalışacaq.

H.Oqtayın fikrincə, Ermənistan ilk olaraq Rusiyanı müharibəyə çəkmək niyyətindədir: "Ermənistanın Rusiyanı müharibəyə daxil etməsində əsas məqsəd isə Türkiyə ilə qarşı-qarşıya qoymaqdır. Yəni Rusiya və Türkiyəni qarşı-qarşıya qoyaraq, özü işin içindən çıxacaq. Bu, Ermənistanın tək çıxış yoludur. Bunun xaricində Ermənistanın bir yolu yoxdur".

Ekspert hesab edir ki, Gəncənin raket atəşinə tutulması təxribatı da Ermənistanın Rusiyaya verdiyi bir mesajdır:

"Ermənistan cəbhə xəttindən kənarda terror aktları törədərək, Rusiyaya bir mesaj verir ki, ya məni qurtarın, ya da bu müharibə genişlənəcək və Rusiyaya da ziyan vuracaq. Bu baxımdan, çox qısa zamanda bu terror ölkəsinin qarşısı alınmalı, Azərbaycanın torpaqlarının tamamı işğaldan azad edilməlidir. Yoxsa bu savaş çox uzun zaman davam edəcək", deyə ekspert bildirir.  

"Oxu.az"saytı "Prezidentin köməkçisi: Son təxribatlar Ermənistanın terrorçuluq mahiyyətini ortaya qoyur" sərlövhəli məqalədə Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Ermənistanın Azərbaycanda müki əhalini hədəfə almasının səbəblərini izah edir.

H.Hacıyev deyir ki, Azərbaycan Ermənistandan fərqli olaraq mülki əhalini hədəfə almır, yalnız hərbi hədəflərə istiqamətlənir.

"Azərbaycan humanitar atəşkəsə əməl etsə də, Ermənistanın təxribatlarına cavab vermək məcburiyyətində qalır. Ermənistanın bu hərəkətləri bütün konvensiya və qanunların kobud şəkildə pozulmasıdır".

O bildirib ki, bütün konvensiya və qanunlarda mülki əhali və infrastrukturun atəşə tutulmamasının vacibliyi qeyd edilir, amma Ermənistan büna əməl etməyərəkAzərbaycan xalqına qarşı müharibə cinayətləri törətməkdə davam edir.

H.Hacıyev vurğulayır ki, Ermənistan Azərbaycanın mülki əhalisini atəşə tutmaqda davam edir, hətta öz ərazisindən də Azərbaycanın mülki əhalisini atəşə tutmaqla münaqişəni genişləndirməyə çalışır: "Biz dünən bəyan etdik ki, müharibədə həlak olan ermənilərin cəsədlərini verməyə hazırıq, lakin bunun cavabında Ermənistan öz təxribatlarını davam etdirdi və mülki əhalini yenə də atəşə tutdu. Onlar bilərəkdən dinc vətəndaşları qətlə yetirmək üçün həmin əraziləri atəşə tutublar".

H.Hacıyev deyir ki, Onun fikrincə, Ermənistan Azərbaycanın digər şəhərlərini, o cümlədən sənaye şəhəri olan Mingəçeviri də atəşə tutub: "Onlar Gəncədə böyük vəhşilik törədib. Ermənistan dövlət səviyyəsində Azərbaycanın mülki əhalisinə qarşı terror aktları həyata keçirir. Bununla onlar xalqımızın iradəsini qıra bilməyib. Azərbaycan öz torpaqlarını işğaldan azad etməyə davam edir".

H.Hacıyev əlavə edir ki, oktyabrın 18-də ikinci dəfə humanitar atəşkəs razılaşmasına baxmayaraq, Ermənistan öz xislətini göstərərək yenidən mülki əhalini atəşə tutub, terrorçuluq mahiyyətini ortaya qoyub.