Media-icmal 25.02.21

“Yeni sabah.az” saytında “Rusiya Azərbaycana qarşı Qarabağda separatizmi körükləyir - Bu gedişlə Xankəndi, Ağdərə və Xocavənd...” sərlövhəli məqalədə müəllif Qarabağda Azərbaycan əleyhinə olan gedişləri politoloq Məhəmməd Əsədullazadə ilə dəyərləndirir.

Politoloq bildirir ki, Ermənistanın müdafiə naziri Vaqarşak Arutunyan həm Ermənistan, həm də “Artsax müdafiə ordusu”nun gücləndirilməsi barədə açıqlama verib. Bundan irəli gələrək, politoloq hesab edir ki, açıqlama reallığı əks etdirir və Azərbaycan buna qarşı qəti addımlar atmalıdır.

M.Əsədullazadəyə görə, faktiki olaraq bu silahlı birləşmələr Azərbaycana qarşı növbəti hərbi əməliyyatlara hazırlaşır və Azərbaycan iqtidarı Rusiyanın məsuliyyət zonasında ermənilərin separatçı fəaliyyətinin qarşısını almaq üçün ciddi tədbirlər görməlidir.

Politoloq vurğulayır ki, 2020-ci il 10 noyabr bəyanatını imzalamaqla Rusiya erməni birləşmələrinin Azərbaycandan çıxarılması öhdəliyi götürüb, amma buna əməl etmir, əksinə, Ermənistan Azərbaycanda sihahlı qüvvələr yaratmaq istəyir.  

M.Əsədullazadə hesab edir ki, Azərbaycan və Türkiyə Rusiyadan məlum Bəyannamənin 4-cü bəndinə əməl olunmasını tələb etməsə, silahlı erməni birləşmələrinin güclü şəkildə silahlanmasının şahidi olacağıq: “Artıq defakto separatçılar “bayraqları”nı dalğalandırır və Azərbaycanın suverenliyini qəbul etmirlər. Bu gedişlə azərbaycanlıların Xankəndi, Ağdərə və Xocavəndə qayıtması mümkün olmayacaq”, deyə politoloq bu işin perspektivini  yada salır.

Onun fikrincə, Azərbaycan Xocalı və ətraf ərazilərdə əməliyyat keçirməyi nəzərdə tutmalıdır. Çünki bu hərbi əməliyyatlar Azərbaycanın hüququdur.

Bu gün konkret olaraq Azərbaycana qarşı Qarabağda separatizmi Rusiya körükləyir və bu, 10 noyabr razılaşmalasına ziddir.

“Azpolitikainfo.az” saytında isə “Karantin rejimi yenidən sərtləşdirilə bilər?” sərlövhəli məqalədə müəllif COVİD-19 pandemiyası ilə bağlı karantin rejiminin sərtləşdirilə bilməsi ehtimalını deputatlarla dəyərləndirir.

Müəllif deyir ki, Azərbaycanda son sutkada yoluxma artır, sağalma göstəricisi isə azalır və bu faktdan irəli gələrək, yoluxma artarsa, martın ilk həftəsindən karantin rejiminin sərtləşdirilə biləcəyi kimi şayiələr dolaşır.

Deputat Kamilə Əliyeva hesab edir ki, son vaxtlar yoluxmada artım olsa da, rəqəm kritik deyil, vəziyyət nəzarət altındadır. Deputat vurğulayır ki, qaydalara əməl edilməsə, əhali vaksinasiya olunmasa rejim sərtləşdirilə bilər, amma ümid edirəm ki, buna ehtiyac qalmayacaq, bununla yanaşı, vaksinasiya hələ pandemiyanın bitməsi demək deyil.

Deputat İqbal Məmmədov da hesab edir ki, hələlik karantin rejiminin sərtləşdirilməsinə ehtiyac yoxdur və heç kim də bunu arzu etmir.

“Sfera.az” saytında isə “Əlində bel və süpürgə olan işçiləri küçələrə tökməklə... – Hanı texnikalar, hanı önləyici tədbirlər?” sərlövhəli məqalədə müəllif Bakıda qar yağdığını, kommunal təsərrüfatın isə öz işinin öhdəsindən gəlməməsi iddiasını yol nəqliyyatı eksperti Elməddin Muradlı ilə dəyərləndirir.  

Müəllifə görə, fevralın 23-də qar yağması ilə bir neçə saat ərzində Bakı qara təslim oldu, bunun günahkarı isə səriştəsiz məmurlardır.

Ekspert deyir ki, xəsarət alanlar olması, avtomobil toqquşmaları, göstərir ki, müvafiq qurumlar qışa hazır deyil, nəticədə insanlar əziyyət çəkir və bu sahədə çox ciddi işlər görülməlidir.

E.Muradlı 5 il idi ki, Bakıya belə qar yağmadığını, amma, bununla belə, ölkənin kommunal xidmət sahəsində inkişaf yox, geriləmə müşahidə edildiyini vurğulayır: “Düşünürəm ki, qurumlarla bağlı ciddi ölçü götürülməlidir və şəhər təsərrüfatına cavabdeh qurumlar suallara aydınlıq gətirməlidir”, deyə ekspert çıxış yolunu göstərir.

Ekspert əlavə edir ki, hər dəfə qar-yağış yağanda, şaxta olanda texnikanın kifayət qədər olmaması ucbatından hələ də kommunal təsərrüfat birliyinin əməkdaşlarının şaxtalı havalarda küçələrə tökülüb əllərində bellə, süpürgə ilə yol təmizləməsinin şahidi oluruq, bunlara son qoyulmalıdır.

Bakı Şəhər İcra Hakimiyyəti isə qarın və buzun təmizlənməsi üçün yollara kifayət qədər texnika çıxarıldığını bildirir.