Media icmalı- 10.08.2023

Ölkədə ixtisas seçimləri, Nazim Bəydəmirlinin prezidentə müraciəti, xarici ölkələrdə pul nağdlaşdırılması, Qubad İbadoğlunun vəkilinin verdiyi açıqlama bu gün (10.08.23) üçün əsas gündəm mövzulardan olub.

“525-ci qəzet” saytında yayımlanan “İxtisas seçimi: nədən başlamalı?”  sərlövhəli yazıda abituriyentlər üçün önəmli hissələrdən biri olan ixtisas seçiminin edilmə qaydası haqqında yazılıb. Müəllif qeyd edir ki, İxtisas seçərkən hər adamın yox, bu işin mütəxəssisi olan pedaqoq və təhsil ekspertlərinin məsləhətini dinləmək, analiz etmək, sonda isə konkret qərar vermək lazımdır. Müəllif vurğulayıb ki, İxtisas seçərkən ən çox müzakirə olunan hallardan biri valideynlərin övladlarının peşə seçiminə kəskin müdaxilə etməsidir. Bu, tamamilə yanlış davranışdır. Valideynlər bu prosesdə sadəcə məsləhət verməli, yol göstərməlidirlər. Bu haqda təhsil eksperti Adil Vəliyevin və  psixoloq Gülər Məmmədovanın fikirləri qeyd olunub.

“Düşünüb-daşınıb bir ixtisası seçməli və həmin hədəfə doğru addımlamalıdır. Valideynlərin atacağı addım isə övladları ilə bərabər, universitetləri və ixtisasları araşdırmaqdır. Nə qədər dərindən araşdırılarsa, gələcəkdə əmək bazarında iş tapmaq o qədər rahat olacaq". – Adil Vəliyev

"İxtisas seçərkən abituriyent öz bilik səviyyəsinə bələd olmayanda psixoloji məqamlara ortaya çıxır. Eyni zamanda valideyn təkidilə ixtisas seçməyə məcbur olduqda onlar seçim qarşısında qalırlar. Bu cür hallarda abituriyentlər çıxılmaz vəziyyətə düşür və  hansı ixtisası seçəcəyini bilmirlər. Ümumiyyətlə, məqsədi olmayan insan hər bir situasiyada çətinlik çəkir”. – Gülər Məmmədova

Anews.az saytında yayımlanan “Həbsdə olan Nazim Bəydəmirli prezidentə müraciət edərək günahsız olduğunu deyib” sərlövhəli Nazim Bəydəmirlinin vəkili Aqil Layıcın verdiyi açıqlaması haqqında yazılıb. “Ölkə başçısına müraciət edərək bəyan edir ki, onun Söyüdlü ilə bağlı hadisələrdə heç bir əlaqəsi olmayıb və ona verilən informasiya düzgün deyil".-  Aqil Layıc

Müəllif qeyd  edib ki, Bəydəmirli haqqında iyulun 5-də Nərimanov məhkəməsi 4 aylıq həbs qərarı çıxarıb. İyulun 10-da həbsdə olan Nazim Bəydəmirliyinin barəsində həbs qətimkan tədbirindən apellyasiya şikayətinə baxılıb. Apellyasiya Məhkəməsi şikayəti təmin etməyib və Bəydəmirlinin barəsində birinci instansiya məhkəməsinin qərarını qüvvədə saxlayıb.

Trend.az saytında yayımlanan “Xaricə gedənlərin NƏZƏRİNƏ - Nağdlaşdırmaya limit qoyuldu” sərlövhəli yazıda nağdlaşdırma ilə bağlı yeni qərar haqqında yazılıb. Bununla bağlı Milli Məclisin deputatı Vüqar Bayramov  açıqlama verib.

“Dünəndən qüvvəyə minmiş yeni qaydalara əsasən, Azərbaycanda emissiya olunmuş ödəniş kartları vasitəsilə rezident fiziki şəxslər tərəfindən ölkə hüdudlarından kənarda təqvim ayı ərzində 10 min dollar ekvivalentinədək məbləğdə pul vəsaitinin nağdlaşdırılması mümkün olacaq”. - Vüqar Bayramov 

Amerikanın səsi saytında yayımlanan “Vəkil: Qubad İbadoğlunun ailə üzvləri ilə görüşünə məhdudiyyət qoyulub” sərlövhəli yazıda vəkilinin Qubad İbadoğlunun hazırki vəziyyəti haqqında verdiyi açıqlama qeyd olunub. Müəllif qeyd edir ki, vəkil təcridxanada kamerada havalandırmanın olmaması Qubad İbadoğlunun səhhətinə mənfi təsir göstərir, Qubad İbadoğlunun ailə üzvləri ilə görüşü təyin edilməyib. “Ümumiyyətlə hər kəsə aydındır ki, Qubad İbadoğlu konkret ittihamlar üzrə təqsirləndirilir. Yəni onun ətrafında bəzi dairələrin iddia etdiyi kimi süni siyasi ittihamlar çənbəri formalaşdırmaq hökümət üçün lüzumsuz və maraqsızdır. Bunu belə dərk eləmək lazımdır. Azərbaycan hüquqi dövlətdir. Bu ölkədə cinayət təqibi siyasiləşə bilməz. Yalnız maddi və prosessual normalarla cinayət təqibi həllini tapır”- Milli Məclisinin deputatı Bəhruz Məhərrəmov