Media icmalı – 25.08.2023

Ölkədə DYP-nin müraciəti, neftin ucuzlaşması, Qarabağı tərk edənlər, Azərbaycan dilində olan cizgi filmlər, Rusiyada taxılın ixrac rüsumunun artırılması bu gün (25.08.2023) üçün müzakirə olunan əsas mövzulardan olub.

“525-ci qəzet” saytında yayımlanan “DYP piyadalara müraciət edib” sərlövhəli yazıda son zamanlarda baş verən yol nəqliyyat hadisələrinin səbəbləri haqqında yazılıb. Müəllif qeyd edir ki, cari ilin 7 ayı ərzində respublika üzrə piyadaların vurulması ilə nəticələnən 350 yol-nəqliyyat hadisəsi qeydə alınıb ki, bu da ümumi yol qəzalarının 37,3 faizi deməkdir. Bu haqda idarədən bildirilib ki, baxılan hesabat dövrü ərzində paytaxt ərazisində 133 piyada vurma hadisəsi qeydə alınıb ki, nəticədə 65 nəfər həyatını itirib, 77 nəfər isə yaralanıb.

"Təəssüf ki, hələ də yeraltı, yerüstü, eləcə də eynisəviyyəli piyada keçidlərinin yaxınlığında piyadaların vurulması yol hərəkəti prosesində şəxsi məsuliyyət məsələsinin aktuallığını bir daha gündəmə gətirir. Hansısa yol sahəsində piyada keçidlərinin olmaması barədə haqlı narazılıqlar səsləndirildiyi halda, digər bir ərazidə mövcud piyada keçidlərinin istifadəsiz qalması deməyə əsas verir ki, piyadaların təhlükəsizliyi məsələsi hərəkətin təşkili, infrastruktur və digər amillərə yanaşı, həm də onların şəxsi məsuliyyət hissinə, ictimai davranış vərdişlərinə bağlıdır".

“Azərbaycan nefti ucuzlaşıb” sərlövhəli yazıda neftin hazırki qiyməti haqqında yazılıb. Müəllifin sözlərinə görə dünya bazarlarında "Azeri Light" (CIF) markalı Azərbaycan nefti ucuzlaşıb. Müəllif qeyd edir ki,  Azərbaycan neftinin 1 bareli üzrə qiyməti ötən günlə müqayisədə 0.33% və ya 0.29 dollar azalaraq 87.36 ABŞ dolları təşkil edib.

“Jamnews.az” saytında yayımlanan ““Qarabağı tərk edən Rusiya vətəndaşları və tələbələrdir”. Bakıdan şərhlər” sərlövhəli yazıda Qarabağı tərk edən ruslarla bağlı məlumatlar qeyd olunub. Müəllif qeyd edir ki, son 3-4 gündə Dağlıq Qarabağdan Ermənistana keçənlərn sayı 300-dən çox olub. Sərhədi keçənlərin Rusiya pasportu daşıdığı və əksəriyyətinin gənclər və azyaşlılardan ibarət olduğu vurğulanıb. Müəllifin sözlərinə görə Ermənistanın Baş naziri Nikol Paşinyan isə bir neçə gün əvvəl hökumət iclasında rəsmi Bakını ittiham edərək bildirib ki, sərhəd yalnız gedənlər üçün açıqdır, nəticədə hər gün yüzlərlə erməni Qarabağı tərk edir. Baş nazir baş verənləri Azərbaycanın təzyiqi kimi izah edib. əlavə olaraq qeyd olunub ki, Azərbaycanın sabiq xarici işlər naziri Tofiq Zülfüqarov bu haqda müsahibə verib. Tofiq Zülfüqarovun bildirib ki, Nikol Paşinyanın söylədiklərini doğru deyil. Bundan əlavə müəllif  hüquqşunas Səməd Rəhimli, Konfliktoloq Arif Yunusla müsahibə aparıb.

“Bizim Yol” saytında yayımlanan “Uşaqlar niyə Azərbaycan dilində cizgi filmə baxmırlar?” sərlövhəli yazıda hazırda Azərbaycan dilində cizgi filmlərin izlənməsinin səbəbləri haqqında yazılıb. Bu haqda müəllif Loqoped-Defektoloq İlahə Fərzəliyevanın sosial media hesabındakı paylaşımını qeyd edib. Paylaşımda qeyd olunub ki, valideynlər uşaqların türkcə izləməyi sevdiyini deyib. Bunun səbəbini ekspert Azərbaycan dilində dublajlarda emosiyanın az olmasında görüb.

Trend.az saytında yayımlanan “Rusiyada taxılın ixrac rüsumunun artırılması Azərbaycan üçün faydalı deyil - Komitə sədri” sərlövhəli yazıda taxıl ixracı rüsumunun artırılmasının Azərbaycana təsirlərindən yazılıb. Müəllif qeyd edib ki, Azərbaycan Rusiyadan ən çox taxıl idxal edən ölkələrdən biridir. Müəllif bu haqda Milli Məclisin Aqrar siyasət komitəsinin sədri Tahir Rzayevdən müsahibə alınıb. Müəllifin sözlərinə görə  Azərbaycan ərzaqlıq buğda asılılığını aradan qaldırmaq üçün mütləq əlavə tədbirlər görməli, taxıl sahələrini genişləndirməli və ilk növbədə, məhsuldarlığın artırılmasına nail olunmasını Tahir Rzayev vurğulayıb.