Məhkəmə Bayram Məmmədovun həbs müddətini uzadıb (Video)

Bu gün Xətai Rayon Məhkəməsi həbsdə olan NİDA üzvü Bayram Məmmədovun barəsində həbs qətimkan tədbirinin müddətini 2 ay 1 gün (noyabrın 11-nə kimi) uzadıb. Bu barədə Turan-a onun vəkili Elçin Sadıqov bildirib. B.Məmmədov külli  miqdarda narkotik maddənin qanunsuz dövriyyəsində ittiham olunur.

Vəkil məhkəmənin qərarını əsassız adlandırıb. “İstintaq bunu istintaq hərəkətlərinin aparılmasının –  Məmmədovun əməliyyatçılarla, hal şahidlərilə üzləşdirilməsinin vacibliyi ilə əsaslandırıb”, - vəkil bilirib.

B.Məmmədov may ayından təcridxanada saxlanılır və istintaq hərəkətlərinin aparılması üçün yetərincə vaxt olub. Ancaq bunu etməyiblər.

Qiyas İbrahimov və Bayram Məmmədov külli  miqdarda narkotik maddənin qanunsuz dövriyyəsində ittiham olunurlar. Lakin onlar bu ittihamı rədd edərək bildirirlər ki, Heydər Əliyevin abidəsinin üzərinə “Gul bayramınız mübarək!” və s. yazdıqları üçün həbs olunublar.

Q.İbrahimovun barəsində iş məhkəməyə verilib. Fəallara  fərqli yanaşmasının səbəbləri barədə sualın cavabında vəkil bildirib ki, bu, hələ təcridxanada saxlanılan vaxt baş verib. B.Məmmədova uzun müddət görüş verməyiblər. Vəkil hesab edir ki, B.Məmmədova bu cür münasibət onunla əlaqədardır ki, o, təzyiqlərə tab gətirib və üzr istəməyib.-03B-