Məhkəmə Beynəlxalq Bankın keçmiş rəhbərinin Penitensiar Xidmətə qarşı iddiasını təmin etməyib

Bakı/29.11.17/Turan: 1 saylı Bakı İnzibati-İqtisadi Məhkəməsi Azərbaycan Beynəlxalq Bankının (ABB) keçmiş rəhbəri, həbsdə olan Cahangir Hacıyevin 13 saylı koloniya və Penitensiar Xidmətə qarşı şikayətini "məqbul" saymayıb. Bu barədə Turan-a vəkil Fəxrəddin Mehdiyev bildirib. O, məhkəmədə C.Hacıyevi həmkarı Aqil Layicovla birgə təmsil edib.

C.Hacıyev hüquqi və tibbi yardımdan məhrum olunmasından şikayət edib. Belə ki, vəkillərin sözlərinə görə, iki aydan çoxdur ki, onlar C.Hacıyevin yanına buraxılmır.

Həmçinin C.Hacıyevi doğmaları ilə görüşdən məhrum ediblər.

"Qərəzli münasibəti, hüquqlarının pozulmasını və əsassız olaraq karserə salınmasını nəzərə alaraq, Cahangir Hacıyev hüquqlarının pozulmasının tanınmasını və 13 saylı koloniyadan başqa koloniyaya köçürülməsini məhkəmədən xahiş edib", - vəkil bildirib. Ancaq məhkəmə iddianı məqbul saymayıb.

Vəkil qeyd edib ki, müdafiə tərəfi apellyasiya verəcək. Turan agentliyi Penitensiar Xidmətdən şərh ala bilməyib.

*2015-ci ildə ABB-də iri maliyyə pozuntularının və xaricə kapital axınının üstü açılıb. ABB-nin keçmiş rəhbəri Cahangir Hacıyev 15 il azadlıqdan məhrum edilib. O, özünü günahkar saymayaraq bildirib ki, bütün böyük kreditlər Müşahidə Şurasının razılığı ilə ayrılıb.

Onunla yanaşı ABB-nin bəzi filiallarının keçmiş rəhbərləri də azadlıqdan məhrum ediliblər. -06B-