Məhkəmə Xədicə İsmayılovanın vəkilinin şikayətini təmin etməyib

Çərşənbə günü Xətai rayon məhkəməsi vəkil Yalçın İmanovun 4 saylı cəzaçəkmə müəssisəsinə qarşı şikayətini təmin etməyib.

Şikayət məhkəmə nəzarəti qaydasında verilmişdi və hakim İbrahim İbrahimli tərəfindən baxılıb.

Şikayət 4 saylı cəzaçəkmə müəssisəsində saxlanan vicdan məhbusu Xədicə İsmayılın vəkillərinin və sənədlərinin girişdə və çıxışda axtarışa və qanunsuz senzuraya məruz qalmasının müdafiə hüququnun pozuntusu kimi tanınması, dəymiş ziyana görə maddi təzminat və sairlə bağlı idi.

4 saylı cəzaçəkmə müəssisisəsini məhkəmədə rəis müvaini Himət Kazımov və müəssisənin əməliyyət bölməsinin rəiis Vaqif Əyyubov təmsil edib.

Vəkilin sözlərinə görə, məhkəmə işə mahiyyəti üzrə baxıb, tərəfləri dinləyib, şikayəti araşdırsa da,  müşavirədən sonra elan etdiyi qərarda şikayətin icraata qəbul edilmnəsindən imtina etdiyini elan edib.

Vəkil Y.İmanov bunu, eləcə də Xədicə İsmayılovanın, digər vəkillər Fəxrəddin Mehdiyev və Fariz Namzlının, müəssisə əməkdaşının dindirilməsinə dair vəsatətlərin təmin edilməməsini qanunsuz hesab edir.

Əyyubov prosesdə bildirib ki, onlar vəkilləri və Xədicə İsmayılovanı əldə etdikləri əməliyyat məlumatları əsasında yoxlamaya məruz qoyurlar. Onun iddiasına görə, X.İsmayılovanın və vəkillərin yoxlanılmasıyla bağlı əməliyyat-axtraış tədbirinin keçrilməsinə dair qərar da var. Lakin Eyyubov bu sənədi “məxfi” olduğu üçün məhkəməyə verməkdən imtina edib.

Vəkil bu işdə hakimin şikayətə mahiyyəti üzrə baxdıqdan sonra işi icraata qəbul etməkdən imtina etməsini ən qəribə hal hesab edir. -06D-