Mehman Hüseynov Ali Məhkəməyə şikayət verib

Bakı/15.05.17/Turan: Bloger Mehman Hüseynov iki il müddətinə azadlıqdan məhrum edilməsi haqqında hökmdən Azərbaycan Ali Məhkəməsinə kassasiya şikayəti ilə müraciət edib.

Vəkil Elçin Sadıqovun Turan-a verdiyi məlumata görə, Hüseynov barəsində hökm həm milli qanunvericilik, həm də beynəlxalq konvensiyalar nöqteyi-nəzərdən əsassızdır.

Kassasiya şikayətində bəraətverici əsaslarla cinayət icraatına xitam verilməsi məsələsi qoyulub.

Polisdə blogerə verilən işgəncələrə gəlincə, ölkədə şikayət mexanizmləri artıq tükənib və hazırda Avropa Məhkəməsinə müraciət hazırlanır. Bu prosesə Britaniyalı vəkillər də cəlb olunub.

Xatırladaq ki, 3 mart 2017-ci il tarixində Suraxanı rayon məhkəməsinin qərarı ilə Hüseynov iki il azadlıqdan məhrumetmə cəzasına məhkum edilib.

Bundan əvvəl, yanvarın 9-da o, şəhərin mərkəzində polis tərəfindən oğurlanmışdı. O, Nəsimi rayon 22-ci polis bölməsində polisə tabe olmamaq ittihamı ilə saxlanılıb. Nəsimi rayon məhkəməsi onu 200 manat cərimə edib.

Polis bölməsindən çıxdıqdan sonra Hüseynov işgəncələr haqqında danışıb və prokurorluğa şikayətlə müraciət edib.

Bundan sonra Nəsimi rayon polis rəisi Musa Musayev blogeri böhtanda ittiham edib və məhkəmə iddiası qaldırıb. Məhz bu iddia əsasında bloger 2 il müddətinə azadlıqdan məhrum edilib

Müdafiə tərəfi məhkəməyə prokurorluğun işgəncə faktı üzrə cinayət işi açmadığı haqqında şikayət göndərib. Amma Səbail və Apellyasiya məhkəmələri şikayətə lazımi reaksiyanı verməyib.

Bu arada, blogerin həmkarları Mehmanın azadlıqdan məhrum edilməsinin əsl səbəbinin onun Mehriban Əliyevanın ölkənin vitse-prezidenti təyin edilməsini ələ salan videoreportajı olduğundan əmindirlər. -05B-