Mehman Hüseynovun məhkəməsinin təfərrüatları (YENİLƏNİB)

Reportyorların Azadlığı və Təhlükəsizliyi İnstitutunun (RATİ) rəhbəri, bloger Mehman Hüseynovun bugünkü məhkəmə prosesi çox sürətlə keçib.

Məhkəmə iclası saat 10.30-da başlayıb və iki saat yarım müddətində başa çatıb. Müdafiə tərəfinə hazırlıq üçün vaxt verilməyib.

Suraxanı məhkəməsinin hakimi Ceyhun Qədimov iclasın əvvəlində deyib: “Bizə təqdim edilmiş sübutlara əsasən siz Mehman Hüseynovsunuz. Bunu təsdiq edirsiniz?

M.Hüseynov cavabında deyib: “Mənim nə xarici pasportum, nə  qeydiyyat vəsiqəm, nə doğum şəhadətnaməm yoxdur. Adım və  şəxsiyyətim barədə məlumatları sistemdən pozublar. Bu səbəbdən heç xəstəxanalar da məni qəbul etmir”.

  Hakim blogerə bununla bağlı  inzibati-iqtisad məhkəməsinə  şikayət etməsini məsləhət görüb.

İddiaçının  vəkili Əlirza Əbilov bildirib ki, blogerin polisdə ona işgəncə verilməsi barədə dedikləri Bakı prokurorluğunda təhqiqat zamanı öz təsdiqini tapmayıb.

Öz növbəsində M.Hüseynov bildirib ki, ona qarşı məhkəmə iddiası və cinayət işi hakimiyyətin sifarişidir və o, jurnalist fəaliyyətinə görə təqib edilir.

O, polisin ünvanına böhtanla bağlı ittihamı rədd edib və özünü günahkar saymadığını bildirib.

“Əksinə, mənim xüsusi ittiham qaydasında məhkəməyə verilməyim mənə qarşı böhtandır. Mən həbsim zamanı başıma gətirilənlərin cəmi 10 faizi barədə danışmışam. 90 faizini də danışsaydım yəqin ki, məni sui-qəsddə ittiham edərdilər”, - o bildirib.

“Məni 2016-cı ilin dekabrından izləyirdilər. Dekabrın 26-da məni tutmaq istəyirdilər. O zaman onların əlindən qaçdım. Dedilər ki, səni onsuz da tutacağıq. O zaman media vasitəsilə bu barədə  məlumat yaydım. 2017-ci il yanvarın 5-dək evdən bayıra çıxmadım. Dostlarım məsləhət bildilər ki, bayıra çıxanda tək olmayım. Yanvarın 9-da dostlarımdam aralanıb 20 metr getməmiş mülki  geyimli şəxlər mənə hücum etdi. Bu küçədə olan 30-40 insanın gözü qarşısında baş verdi. 

Sonradan bildim ki, saxlanmağıma Bakı Şəhər Baş Polis İdarəsinin cinayət-axtarış şöbəsinin rəis müavini rəhbərlik edib. 

Məni saxlayan 7-8 nəfər şəxs yerə yıxdı və  ayaqlarımın keyməsi üçün nə isə poroşok vurdular.

Sonra başıma torba keçirib, qolumu və ağzımı bağlayıb avtomobilə mindirdilər. Bir saatadək avtomobildə məni gəzdirdilər. Bu zaman bir nəfər üzərimdə oturmuşdu, biri deyirdi “bandotdelə”, o birisi deyirdi başqa polis idarəsinə aparaq. Nəhayət, bir otağa gətirdilər. Orada da bir saat yarım yenə bir nəfər üzərimdə oturmuşdu, digərləri məni döyməklə  və təhqir etməklə məşğul idi. Nəhayət, gözlərimi açdılar və  bu zaman Kəngərli soyadlı  sahə müvəkkilini tanıdım. O, əvvəllər qardaşım Emin Hüseynova də işgəncə vermişdi.

İkinci  boyca uzun olan rəis mənə öz dediyi kimi bir neçə “ağsaqqal silləsi” vurdu.

Bu zaman huşumu itirdim və  üzümə  su vurub məni ayıltdılar. Açıq dedilər ki, məni blogerlik fəaliyyətimə, reportajlarıma və  statuslarıma görə saxlayıblar. Sonra başıma torba keçirib başqa yerə apardılar və əlimi, ağzımı yenə bağladılar. Biri üzərimdə oturmuşdu. Figərləri isə foto və video çəkib, deyirdilər ki, İnternetdə yayacaqlar.

Orada yetərincə  döydülər və yenə rəis dedikləri şəxsin otağına apardılar. Rəisin otağında yenidən huşumu  itirdim. Təcili tibbi yardım çağırdılar, həkim dedi ki, bunu kim bu günə salıb, xəstəxanaya aparmaq lazımdır. Ancaq ona rəis dedikləri şəxs icazə vermədi. Təcili tibbi yardımın həkimi mənə iki iynə  vurdu. Məni yuxu aparırdı, bu zaman yadımdadır ki, əlimdən tutaraq nəyəsə qol çəkdirdilər.

Səhər saat 11:00-da məni Nəsimi Rayon Məhkəməsinə apardılar. Məhkəmə saat 16:00-da başladı. Polisin qanuni tələbinə tabe olmadığıma görə 200 manat cərimə edib azad buraxdılar”, - M.Hüseynov bildirib.

M.Hüseynov məhkəmədən xahiş edib ki, dediklərini sübut üçün rəisin otağında olan videokameralardakı görüntülər məhkəməyə təqdim edilsin.

Hakim blogerin başına keçirilən torbanın hansı rəngdə olduğunu soruşub.

“Başıma torba salıblar. Torbanın ağ və ya qara olmasının nə dəxli var. Torba elə torbadır. Gözüm bağlı idi, görmədim”,   - bloger bildirib.

Vəkil Elçin Sadıqov bloger həbs edilməmişdən öncə  onunla birgə olmuş Ülvi Həsənli, Elçin Şərifov, Məsud Əsgər, Samir Əsədlinin şahid kimi dindirilməsi, Nəsimi Rayon Polis İdarəsinin rəisi Musa Musayevin, sahə müvəkkili Kəngərlinin, Bakı Baş Polis İdarəsinin cinayət-axtarış şöbəsinin rəis müavininin məhkəməyə  dəvət edilməsi, blogerə işgəncə verilən rəisin otağındakı, Nəsimi Rayon Polis İdarəsinin və idarənin ətrafındakı, M.Hüseynovun tutulma yerindəki videokameralarda yanvarın 9-da çəkilmiş görüntülərin məhkəməyə təqdim edilməsi, inzibat xəta törətmə, tutulma barədə protokolların məhkəməyə təqdim edilməsi barədə vəsasət qaldırıb. 

İddiaçının vəkili Ə. Əbilov vəsatətlərin əleyhinə çıxıb və M.Hüseynovun 3 il azadlıqdan məhrum olunmasını tələb edib.

Müdafiə tərəfi yekun çıxışa hazırlaşmaq üçün bir həftə vaxt istəyib. Hakim isə cəmi 30 dəqiqə vaxt verib, lakin 10 dəqiqədən sonra vəkilin dərhal çıxış etməsini və Mehman Hüseynovun son sözlə çıxış etməsini tələb edib.

Beş dəqiqədən sonra isə hökmü elan edərək M.Hüseynovu 2 il azadıqdan məhrum edib.

Vəkil Elçin Sadıqov məhkəmənin çəkişmə  prinsipinə əməl etmədiyini, hökmün isə qanunsuz və  əsassız olduğunu bildirib. Vəkil hökmdən apellyasiya şikayəti verəcək.   —06D--

2017 Mart 03 (Cümə) 13:23:26

Bloger Mehman Hüseynov barəsində hökm qanunsuzdur, bu barədə vəkil Elçin Sadıqov bildirib.

"Məhkəmə çəkişməlilik prinsipini pozub. Məhkəmə xüsusi ittihamçının iştirakını təmin etməyib, müdafiə tərəfin vəsaitlərinin heç birini təmin etməyib. Müdafiə tərəfin yekun çıxışına hazırlaşmaq üçün bir həftə vermək xahişilə cavabda hakim heç 30 dəqiqə belə verməyib, dərhal çıxış etməyi tələb edib. Hökm Mehman Hüseynovun son çıxışından 5 dəqiqə sonra çıxarılıb", deyə Sadıqov bildirib.

Məhkəmə Hüseynovu 147.2-ci (ağır cinayət törətmək barədə böhtan) maddə ilə təqsirli bilib və 2 il müddətinə azadlıqdan məhrum edib.

"Mehman Hüseynov ruh yüksəkliyini qoruyub saxlayır, çünki həbs olunacağını bilirdi", deyən vəkil əlavə edib ki, hökmdən şikayət veriləcək. -03D-

2017 Mart 03 (Cümə) 12:42:27

Suraxanı rayon məhkəməsi Nəsimi rayon polis rəisi Musa Musayevin iddiası əsasında məşhur bloger, Reportyorların Azadlıq və Təhlükəsizlik İnstitutunun direktoru Mehman Hüseynovu 2 il müddətinə azadlıqdan məhrum edib.

Məhkəmə Hüseynovun yanvarın 9-da polis işçilərinin onu oğurlayıb işgəncə verməsi haqqında bəyanatlarında böhtan olduğu qənaətinə gəlib.

Məhkəmə hətta müdafiə tərəfin yekun çıxışa hazırlaşmasına imkan verməyib.-03C-