Mehman Hüseynovun problemlərinin həll olunacağını vəd edirlər

Bakı/15.05.17/Turan: Həbsdə olan bloger Mehman Hüseynovun bu həftə müayinə və müalicəsi planlaşdırılır. Bu barədə mayın 13-də 14 saylı cəzaçəkmə müəssisəsində onunla görüşən vəkil Elçin Sadıqov bildirib.

Məlum olduğu kimi, blogerin damarında problem var, həbsxana şəraitində vəzyyəti daha da pisləşib və əməliyyat olunmalıdır.

5 ildir ki, şəxsiyyəti təsdiq edən sənədi olmayan M.Hüseynova həbsxanada şəxsiyyət vəsiqəsi veriləcək. 2012-ci ildə Səbayel Rayon Polis İdarəsi M. Hüseynovun şəxsiyyət vəsiqəsini alıb. Bloger dəfələrlə müraciət etsə də şəxsiyyət vəsiqəsini geri verməyiblər.

Xatırladaq ki, Mehman Hüseynov 2017-ci il martın 3-də Suraxanı Rayon Məhkəməsinin qərarı ilə 2 il azadlıqdan məhrum edilib. Buna qədərsə onun yanvarın 9-da oğurlandığı güman edilirdi.

Yanvarın 10-da məhkəmə önünə çıxarkən onun Nəsimi Rayon Polis İdarəsinin 22 saylı polis bölməsində saxlandığı məlum olub. Nəsimi Rayon Məhkəməsinin qərarı ilə M. Hüseynov polisə tabe olmamaqda təqsirli bilinərək 200 manat cərimə edilib.

Polisdən çıxdıqdan sonra bloger polisdə saxlandığı müddətdə işgəncələrə məruz qaldığını söyləyib. Vəkili isə işgəncə şikayətinin araşdırılmasından ötrü Bakı Şəhər Prokurorluğuna müraciət edib. Nəsimi Rayon Polis İdarəsinin rəisi Musa Musayev M.Hüseynovun işgəncə ilə bağlı dediklərini polisə böhtan sayaraq xüsusi ittiham qaydasında iddia qaldırıb. Həmin iddia əsasında M.Hüseynov 2 il azadlıqdan məhrum edilib.

Müdafiə tərəfi prokurorluğun işgəncə şikayəti ilə bağlı cinayət işi açmamasından məhkəməyə müraciət edib. Səbayel rayon və Bakı Apellyasiya məhkəmələri də müdafiə tərəfinin istəyini təmin etməyib.

Blogerin həmkarları əmindir ki, M.Hüseynovun həbsinin əsl səbəbi Mehriban Əliyevanın birinci vitse-prezident təyin edilməsi ilə videoreportaj hazırlamasıdır. -0-