Məmur özbaşınalığı şimal bölgəsində narazılığı və intiharı artırır

İnsan Haqlarını Müdafiə Təşkilatlarının Monitorinq Qrupu ölkənin şimalında (Quba, Xaçmaz, Qusar) əhalinin sosial vəziyyətinin monitorinqini aparıb. 

Monitorinqin nəticələri əhalinin sosial narazılığının artdığını aşkarlayıb. Belə ki, vətəndaşların qanuni haqları olan sosial yardımlar sahəsində ciddi problemlər var. Şikayətçilər deyiblər ki, bu rayonların sosial yardım mərkəzlərində çalışan məmurlar veriləcək illik sosial yardımın birinci 6 ayının pullarını özlərinə istəyirlər. Qalan 6 ayın pulu vətəndaşa verilir. İşsizlik səviyyəsi yüksəkdir, məmur özbaşınalığı hədd-hüdud tanımır. Bu ilin 12 fevral müşavirəsində dövlət başçısının məmurlara təpinməsinə baxmayaraq, ölkənin şimalında məmur özbaşınalığı, biganəliyi, laqeydliyi baş alıb gedir. 

Belə münasibətin nəticəsi olaraq ləyaqət və şərəfinin alçaldılmasını görən vətəndaşlar intihara cəhd edirlər. Bu ilin ötən dövrü ərzində şimal bölgəsində 12 belə fakt qeydə alınıb. İntihara cəhd edən 5 vətəndaş monitorinq qrupunun üzvlərilə görüşüb. Monitorinqi aparanlar görüşə gələn vətəndaşların yerli məmurların təzyiqlərinə məruz qalmamaq üçün adlarını çəkmək istəmədiklərini deyiblər. Sosial narazılıq, işsizlik, məmur özbaşınalığı əhalini dövlətdən narazı salır. 

Monitorinq qrupu bu bölgədə milli azlıqların yaşadığını qeyd edərək, “həssas bölgə” adlandırıblar. Buradakı istənilən narazılığı qonşu dövlətlərin Azərbaycan dövlətçiliyi əleyhinə yönəltməyə cəhd etdiyi xatırladılıb.

Qrup üzvləri bu şikayətlərlə bağlı aidiyyatı mərkəzi dövlət qurumlarına müraciət edəcəklərini, şikayətləri nəzarətdə saxlayacaqlarını və vətəndaşların problemlərinə yardımçı olacaqlarını deyiblər.

Eyni zamanda, qrup eyni məqsədlə Şəki, Zaqatala, Balakən və cənub rayonlarına belə səfərlər ediləcəyini bildirib. -05C-