Mətbuat İcmalı-05.02.13

Qəzetlərin baş məqalələri müxtəlif mövzulara həsr olunub. Rəsmi və iqtidaryönlü qəzetlər ənənələrinə sadiq qalaraq birinci səhifələrində prezident İlham Əliyevin qəbulları və imzaladığı sənədləri dərc edib. Müstəqil və müxalifətyönlü qəzetlər isə Xocalı aeroportuna Ermənistanın uçuşlar etmək niyyəti, Bakı məktəbləri, Ermənistan və Azərbaycan xarici işlər nazirlərinin Paris görüşü, İsmayıllı hadisələri, REAL Hərəkatının lideri İlqar Məmmədov və Müsavat başqanının müavini Tofiq Yaqublunun həbsi, Elşad Abdullayevin qohumlarına təzyiqlər, Tələbə Qəbulu üzrə Dövlət Komissiyası ilə Təhsil Nazirliyi arasındakı gərgin münasibətlər Bakı metropoliteninin rəisinin qəzet əməkdaşlarını təhqir etməsi və başqa mövzuları baş məqalə yerində dərc ediblər. 

“Azadlıq”

 Hüquq müdafiəçisi Leyla Yunus bildirib ki, AŞPA-da siyasi məhbuslarla bağlı məruzə qəbul edilmədikdən bir gün sonra AXCP sədri Əli Kərimlinin qaynı, “Texnikabank”ın əməkdaşı Elnur Seyidova yeni ittihamlar irəli sürülüb. “Elnur Seyidovu MTN-də girov saxlayırlar. Aydın məslədir ki, bu, Əli Kərimliyə təzyiq üçündür”, - o qeyd edib.

Facebook-da zorla “İlham Əliyevi bəyən” kampaniyası keçirilir. İqtisadi İnkişaf Nazirliyi bütün əməkdaşlarını  zorla “like” etdirir. 

“Azadlıq” qəzetinin İsmayıllı müxbiri Elçin İsmayılovun qardaşı Elşən İsmayıllı dünən həbs edilərək Bakıya gətirilib. MTN-in keçmiş əməkdaşı, təhlükəsizlik üzrə ekspert İlham İsmayıl bildirib ki, MTN-in YAPda da agentləri var. “YAP-ın hakimiyyətə gəlməsi o demək deyil ki, oradan xüsusi xidmət orqanlarına informasiya lazım deyil”.

“Hakimiyyət daxilində ordu uğrunda savaş” məqaləsində deyilir ki, ordunu ələ keçirmək üçün hakimiyyət daxilində amansız savaş gedir. Buna maraq göstərən hakimiyyətdaxili qruplardan ən güclüsü olan Paşayevlərdir.  Digər qruplar sırasında fövqəladə hallar naziri Kəmaləddin Heydərov, Prezident Administrasiyasının rəhbəri Ramiz Mehdiyev var. Kəmaləddin Heydərov qudası, Sərhəd Xidmətinin komandanı Elçin Quliyevin müdafiə naziri olmasını istəyir. 

İsmayıllıdan olan hüquqşünas Şükür Məmmədli İsmayıllı İcra Hakimiyyəti başçısının qanunsuz əməlləri barədə geniş məqalə ilə çıxış edib. Məqalədə rayon ərazisində  torpaqların qanunsuz satılması ilə bağlı geniş siyahı var. “Xalq ayağa qalxıb bunların cinayət məsuliyyətinə cəlb edilməsinə nail olmalıdır”, - hüquqşünas hesab edir. 

Türkiyənin baş naziri Rəcəb Tayyip Ərdoğan Heydər Əliyev Mərkəzini bəyənməyib. “Bu qədər israfçılıq ola bilməz”, - o qeyd edib. 

Fevralın 20-də  Şamaxı rayonunda etiraz mitinqi olacaq. Bununla bağlı yerli sakinlər İcra Hakimiyyətinə müraciət ediblər. Onlar hesab edirlər ki, büdcədən rayona ayrılan vəsait talan edilir, əksər sahələr korrupsiya içində boğulur. 

Facebook-da “Gülər Əhmədova olayı çözülsün” kampaniyası başlayıb. Kampaniyanın əsas tələbi Gülər Əhmədova ilə bağlı hadisələrin sona çatması, cinayətkarların cəzalandırılmasıdır. Kampaniya martın 1-dək davam edəcək və 200 min adamın tələb göndəriləcəyi qeyd edilir. 

“Yeni Müsavat” 

Qəzet Beynəlxalq Universitetin Fransada mühacirətdə olan sabiq rektoru Elşad Abdullayevin bütün qohumlarının təzyiq altında olduğunu bildirir. E.Abdullayevin bacısı oğlu deyib ki, bütün qohumların bank, əmlakına, avtomobillərinə, evlərinə həbs qoyulub. 

Elşad Abdullayev Prezident Administrasiyasının rəhbəri Ramiz Mehdiyevlə bağlı yeni video yayacaq. 

İsmayıllıda yeni təqib dalğası polisə həbs ediləcək adamların yeni siyahısı paylanıb. 

Naxçıvan MR Ali Məclisinin sədri Vasif Talıbov İstanbulda Memorial xəstəxanasında müalicə olunur. O, ürək-damar xəstəliyindən əziyyət çəkir. 

Qəzet Ridus.ru saytının müxbiri Stanislav Mudrıyın Ağdam xarabalıqlarından bəhs edən reportajını dərc edib: “Bu müharibədə heç kimə aman verməyiblər, nə uşaqlara, nə qadınlara, nə qocalara...” 

“Rövşən Lənkəranskinin Moskvada öldürülən adamı haqda sensasion xəbərlər” məqaləsi oğru qrupları arasındakı münasibətlərdən bəhs edir: “Rufo Gəncinski” ləqəbli “qanuni oğru” “Ded Xasan”ın qətlini təşkil edən əsas adamdır”. 

“Bizim Yol” 

Tələbə Qəbulu üzrə Dövlət Komissiyasının məlumatına görə, orta məktəblərdə tədris prosesi normal aparılmır, tələbkarlıq zəifdir, müəllimlərin çoxunun peşəkarlıq səviyyəsi aşağıdır: “Azərbaycanda orta statistik abituriyent məktəb proqramının maksimum 53 faizini mənimsəyir”. 

Əkrəm Əylislinin Dövlət Akademik Dram Teatrında səhnələşdirilmiş “Yazığam,  sevmə məni” tamaşasının premyerası ləğv edilib. 

Mindən çox gənc deputat Hadı Rəcəblinin televiziyanın efirində gənclərin ünvanına  söyüş işlətdiyinə görə  üzr istəməsi üçün sms göndərib. Gənclər onun söyüşünü özünə qaytarıb. SMS-lərdə “özünsən” yazıblar. 

Qəzet müdafiə naziri Səfər Əbiyevlə bağlı 14 korrupsiya faktını açıqlayıb. 

Bakı metropoliteninin rəisi  Tağı Əhmədov evləri uçurulmuş sakinləri təhqir edib. O, qəzet əməkdaşlarını və sakinləri “basın bayıra... Cəhənnəm olun...”   kimi ifadələrlə təhqir edib. 

Ölkənin bütün rayon və şəhər icra hakimiyyəti başçıları Prezident Administrasiyasına dəvət ediliblər. Qəzetin yazdığına görə, onlara “İsmayıllı dərsi” keçiləcək. 

“Ekspress” 

2012-ci ildə 447 ədliyyə işçisi inzibati məsuliyyətə cəlb olunub. 22 hakim inzibati məsuliyyətə cəlb edilib. 

“Yeni Azərbaycan” 

Qəzet iki səhifəsini Əkrəm Əylislinin “Dağ yuxular” romanının əleyhinə olan qazılar və şərhlərə həsr edib. Həmçinin Reuters,  Frans-Press və digər agentliklərlə bağlı tənqidi yazı dərc edib.