Mətbuat İcmalı- 16.08.12

Rəsmi və iqtidaryönlü qəzetlər birinci səhifələrində prezident İlham Əliyevin Qafqaz Müsəlmanları İdarəsinin təşkil etdiyi iftar süfrəsində etdiyi çıxışın tam mətnini birinci səhifələrində dərc ediblər. Digər səhifələrində də hökumətin fəaliyyətini tərifləyən böyük həcmli məqalələr dərc ediblər. Bu  qəzetlər həmçinin “Hürriyyət” qəzetinin müxbiri Fatih Çekirgenin İçərişəhər Dövlət Tarix-Memarlıq Qoruq İdarəsinin sədri Mikayıl Cabbarovla bağlı İstanbul-Barselona təyyarə reysində yaşanan problem barədə yazdığı məqalə tənqid edilib. Sadəcə, müxbir ermənilərə işləməkdə günahlandırılır.  

Bugünkü rəsmi qəzetlər başsağlığı ilə də zəngindir. “Azərbaycan” qəzeti 70 başsağlığı dərc edib. Ümumilikdə isə Bakı Metropoliteninin rəisi Tağı Əhmədovun qardaşının vəfatı ilə bağlı “Azərbaycan” qəzeti 43, “Xalq qəzeti” 13, “Respublika” qəzeti 5 başsağlığına səhifəsində yer ayırıb.   

Müstəqil və müxalifətyönlü qəzetlər manatın dizaynının dəyişiləcəyi, regionda müharibənin qaçılmazlığı, Amerikanın Azərbaycanda quraşdıracağı radarlar, Rusiya baş nazirinin müavinin səfərinin səbəbləri, Naxçıvanda hərbi hissədə insan orqanı alveri, Amerikanın Cənubi Qafqazda maraqları, hakimiyyətdaxili qrupların mübarizəsi kimi mövzularda baş məqalə dərc edib. 

  Bütün qəzetlər səhifələrində Rusiya baş nazirinin müavinin Azərbaycana səfəri, Şərqi Azərbaycanda zəlzələ və olimpiada mövzularına yer verib. 

“Azadlıq”     

  Dünən ölkədən məcburən mühacirət etmiş Loğman və Hurəddin Zülfüqarlı qardaşlarının Keşlə qəsəbəsindəki metal zavoduna idman cüssəli bir qrup şəxs hücum edib. Hücum edənlər “Baku Steel Company”-nin rəhbəri Rasim Məmmədovun adamları olub. Vəkil Aslanov hücumu şəxsi mülkiyyətə qəsd kimi qiymətləndirib və hökuməti qanuni şəxsi mülkiyyəti deyil, maraqları müdafiə etməkdə günahlandırıb. 

  Azərbaycan İslam Partiyasının üzvü, 1966-cı il təvəllüdlü Füzuli Novruzov 16 saylı cəzaçəkmə müəssisəsində ürək tutmasından vəfat edib. O, qanunsuz narkotik maddə saxlamaqla bağlı bir il azadlıqdan məhrum edilmişdi.    

  Azərbaycan Liberal Partiyasının sədri Əvəz Temirxan müsahibəsində bildirib ki, ölkədə harınlığa son qoymağın vaxtıdır. “48 milyard dolların ofşor zonalarda yerləşdirilməsi dövlətə xəyanətdir. Azərbaycan yaxın zamanlarda mütləq hakim rejimi dəyişəcək ölkələrdən biri olacaq”. 

  “Tanışlıq agentliyi, yoxsa qız alveri?” məqaləsində qızları aldadaraq qanunsuz pul qazanmaqdan bəhs edilir. Bəzən “xoşbəxt ailə” 20 min manata başa gəlir. 

  “Məmurlara iki mühüm qadağa” məqaləsində deyilir ki, məmurlara, deputatlara bank fəaliyyəti ilə məşğul olmaq və medianı maliyyələşdirmək qadağan olunub.  

  “Kəmaləddin Heydərov Səfər Əbiyevi  devirmək istəyir” yazısında fövqəladə hallar nazirinin Dövlət Sərhəd Xidmətinin komandanı Elçin Quliyevi müdafiə naziri postuna gətirmək istəyindən danışılır. 

  “Milyonlar havaya necə sovrulur?” məqaləsində yazılır ki, “Eurovizion” ərəfəsində açılan bulvar cəmi üç aydan sonra təmir olunur. 

“Bizim Yol” 

  Avqustun 14-də Bakıda tanınmış “avtoritet”lərin toplantısı olub. Toplantı oğru dünyasının “avtoritetlər”i Rövşən Lənkəranski ilə Qoca arasındakı insidentlə bağlı keçirilib. Mərdəkan kəndində keçirilən toplantıya Amin Mərdəkanski başçılıq edib. 

  Tanınmış iş adamı Hacı İbrahim Naxçıvanda yaşayış binası inşa etmək istəyib. Amma Naxçıvan Ali Məclisinin sədri Vasif Talıbov ona imkan verməyib və Naxçıvandan qovub. 

  Qəzet Müdafiə Nazirliyinin mətbuat xidmətinin rəhbəri Eldar Sabiroğlu ilə geniş müsahibə dərc edib. “Nazir Səfər Əbiyevin heç bir qohumu komandir deyil”, deyən mətbuat katibi ictimai  diqqətdə olan əsgər ölümü, əsgərin daxili orqanlarının satışı və rüşvət və başqa çoxsaylı suallara cavab verib. 

  Təbrizdə olan Mili Məclisin deputatı Qənirə Paşayevə ikiaylıq əmək haqqını Şərqi Azərbaycanda baş vermiş zəlzələ qurbanlarına verib və bütün deputatları bu addımı atmağa çağırıb. 

“Yeni Müsavat” 

  Nəqliyyat naziri Ziya Məmmədov Türkiyədə məhkəməyə verilib. Keçmiş Karl Marks dairəsi yaxınlığında tunelin tikintisini icra edən “Yapılar İnşaat-Ticarət LTD” Nəqliyyat Nazirliyindən pulunu ala bilmir. 

  “Araz Ağalarov metaləritmə bazarını monopoliyaya alır?” məqaləsində deyilir ki,  Bakıda fəaliyyət göstərən 21 metaləritmə şirkəti çökdürüləcək. 

  Açıq Cəmiyyət Partiyasının sədri Sülhəddin Əkbər müsahibəsində bildirib ki, partiyanın lideri Rəsul Quliyevin vətənə qayıdışı haqda suala cavab verməyə hazır deyil: “Mən sədr gələndən sonra partiya canlanıb, güclənib”.

  “Naxçıvanda hərbi hissədə orqan alveri” məqaləsində Naxçıvan hərbi prokurorunun əsgər olmuş keçmiş sürücüsü bildirir ki, orqan əməliyyatları ən çox Kəngərli rayonunda hərbi hissələrdən birinin tibb məntəqəsində aparılır.  Hazırda Fransada mühacirətdə olan keçmiş əsgər Rahim Namazov yazır ki, Naxçıvan hərbi hissələrində qətlə yetirilmiş əsgərlərin daxili orqanları çıxarılaraq satılır.

“Ekspress” 

 “İtirilmiş uşaqlar...” məqaləsində tərbiyə müəssisələrində həbsdə olan uşaqların reabilitasiya işlərində ciddi problemlərin olduğu bildirilir.  

 AMİP sədri Yusif Bağırzadə müsahibəsində bildirib ki, müxalifətin birliyi olmasa, ayrı blok yaradacaqlar. O, Müsavat Partiyasının nümayəndəsinin AMİP-in 10 siyasi partiya ilə birgə keçirdiyi tədbirə və partiyanın 20 illik yubileyinə gəlmədiyini deyib. 

“Exo” 

  Qəzet ekspertlərin fikirlərinə əsaslanaraq yazır ki, Ukrayna rəsmi təkzib versə də, Ermənistana silah satıb. 

“Bakı Xəbər” 

  İranda həbsdə olan azərbaycanlı şairlər Fərid Hüseyn və Şəhriyar Hacızadənin məhkəməsi yenə təxirə salınıb. Dünən şairlərə hökm oxunmalı idi.