Mətbuat icmali

Rəsmi qəzetlərin baş səhifəsində prezident İlham Əliyevin qəbullarından bəhs edən reportajlar  dərc edilib. Digər qəzetlər isə baş məqalə yerində manatın devalivasiyasının olmayacağı, Gürcüstanın Azərbaycanla müttəfiqliyi arxa plana keçirəcəyi, keçmiş müdafiə nazirinin barəsində istintaq, Avropa parlamentinin rəhbərinin Azərbaycanda insan hüquqlarının pozulmasına dair mesajları barədə məqalələrə yer veriblər.

Azadlıq

İlham Əliyevin nəvələrinin Xəzər sahillərində möhtəşəm sarayı var. Emin Ağalarov istirahət günlərində Bakıya gələrək oğulları ilə həmin sarayda vaxt keçirir. Qəzet Emin Ağalarovun “7days” qəzetinə müsahibəsindən seçmələr dərc edib.

Iranla uğursuz danışıqlardan sonra Azərbaycan İsraillə əməkdaşlığı genişləndirir. Azərbaycanın hərbi rəhbərliyi 2015-ci ilin iyununda İsraildə keçiriləcək silah sərgisində iştirak edəcək. “İsrail silah sənayesi üçün Azərbaycan böyük potensialı olan bazarlardan biri hesab olunur”.

Müsavat Partiyasının keçmiş başqanı İsa Qəmbər hökumətyönlü medialarda jurnalist  Əfqan Muxtarlıya qarşı aparılan kampaniyanı pisləyib. “Gənc yaşlarından vətən uğrunda döyüşlərdə iştirak edən, həyatını xalqa vəda etməyə hazır olan bir Qarabağ müharibəsi veteranını, cəsarətli bir jurnalisti  vətənə qarşı fəaliyyətdə günahlandırmaq üçün ciddi faktlar, arqumentlər lazımdır ki, onlar da yoxdur”, - İsa Qəmbər yazıb.

Milli Məclisin keçmiş deputatı İbrahim İbrahimli “İnsanları atalar, analar və övladlarla sınağa çəkən hakimiyyət...”  məqaləsində müxalifət və QHT fəallarının fəaliyyətinə görə onların övladlarının və qohumlarının istintaqa dəvət edilməsi, işdən azad edilməsi ilə bağlı problemlərə toxunur.  “Hacı Məmmədovun pul  üçün məmurlar üzərində “sınaqdan” keçirdiyi iyrənc üsul indi müxalifətə qarşı istifadə olunur”.

Keçmiş hakim Həsən Əliyevin məhkəməsi Gəncə Ağır Cinayətlər Məhkəməsində davam edib. Hakim rüşvət müqabilində bir şəxsi vəzifəyə düzəlmək istəyib.

Son günlər Batumidə Vətəndaş Cəmiyyəti Forumunda baş verən qalmaqal səngimir. “People İn Need”  təşkilatının koordinatoru İvana Skalova müsahibəsində bildirib ki, onların Azərbaycanda siyasi məhbuslarla və keçmiş prezident Heydər Əliyev və onun oğlu prezident İlham Əliyevin portretləri əks olunmuş “Ailə biznesi” yazılmış, həmçinin siyasi məhbusların plakatlarını Azərbaycan nümayəndə heyətinin  üzvü Səlim Babayev çırıb. Bir qadına qarşı fiziki qüvvə tətbiq edib.

Yeni Müsavat

İnsan Haqları üzrə İşçi Qrupu hüquq müdafiəçisi İntiqam Əliyevin ev dustaqlığına buraxılması üçün Baş Prokurorluğa müraciət edib.

“Səfər Əbiyev Milli Şuranın güdazına gedib?” məqaləsində deyilir ki, bu günlərdə həbs edilən müdafiə nazirinin sabiq müavini Mehman Səlimov Milli Şura rəhbərlərindən biri ilə təmaslarından sonra istintaq başlayıb. Mehman Səlimovun həbsini keçmiş müdafiə naziri Səfər Əbiyevlə də əlaqələndirirlər. Belə ki, onun ölkədən çıxmasına qadağa qoyulub.

“Rusiyadan gələcək işsizlər ordusu sabitliyi poza bilər” məqaləsində Rusiyada baş verən böhranın orada işləyən yüz minlərlə azərbaycanlının ölkəyə qayıtma ehtimalını yaratdığını diqqətə gətirir.

Bizim Yol 

“Quba hava limanı ilə bağlı sirr açıldı” məqaləsində deyilir ki, aeroportun tikintisi Rusiyanın etirazı nəticısində dayandırılmayıb. Amma məqalədə aeroportun tikintisinin nə vaxt bərpa ediləcəyi bəlli deyil.

Ekspress

Xəzər dənizi üzərindən uzunluğu 2,6 kilometr olan “Bakı buxtası dəniz körpüsü” layihəsini həyata keçirmək istəyən Cənubi Koreyanın “Dong Soung Engineering” şirkəti öz təklifindən imtina edib. Bakı Layihə İnstitutu isə körpü əvəzinə sualtı tunelin çəkilməsini təklif edir. Tunelin uzunluğu  3,6 kilometr olacaq.  Mütəxəssislər körpünün çəkilməsini 1,5-1,8 milyard, tunelin çəkilməsini 3 milyard manat dəyərləndirır.