Mətbuat İcmalı - 23.08.12

Rəsmi və iqtidar qəzetlərin birinci səhifələrində prezident Əliyevin Xüsusi Dövlət Mühafizə Xidmətinin qulluqçularının mükafatlandırılması barədə sərəncamı, İlham Əliyevin Qırğızıstanda üç cildlik kitabının çapı və ölkədə müsbət inkişaf mövzusunda məqalələr dərc edib. 

Müstəqil və müxalifətyönümlü qəzetlər Tehran sammitində Azərbaycanı kimin təmsil edəcəyi, Saakaşvilinin Rusiya-Gürcüstan müharibəsi barədə dedikləri, banklarda vəziyyət, Rusiyanın geosiyasi strategiyası, Bişkekdə Türkdilli dövlətlərin sammiti, hakim ailənin seçki hazırlığı, hakimiyyətdaxili münasibətlər barədə məqalələri baş yazı kimi dərc edib. 

Müstəqil və müxalifət qəzetləri Əbülfəz Elçibəyin ölüm günü müxalifətin, ziyalıların onun məzarını  ziyarətindən reportajlar və milli azadlıq hərəkatının lideri barədə xatirələrə yer verib.  

Yeni Müsavat 

İranda həbsdə olan şairlər barədə məhkəmə qərarı sentyabrın 7-də elan ediləcək. Şəhriyar Hacızadə və Fərid Hüseyn mayın 2-də həbs edilib.

Zərdab rayon Polis şöbəsində 1978-ci il təvəllüdlü Arzu Hüseynov ölüb. Soyğunçuluqda günahlandırılan Hüseynovun xəstəliyi ilə bağlı vəfat etdiyi bildirilir.     

“Elçibəyi Ankaraya aparan özəl təyyarənin sahibi danışdı” məqaləsində eks-prezident Əbülfəz Elçibəyin zəhərlənməsi faktı ilə bağlı Bakı şəhər prokurorluğunda qaldırılan cinayət işi ətrafında araşdırma aparılıb. “Ankaraya gələndə həkimlərimiz xərçəngin onun orqanizmində 3 il öncə yarandığını müəyyən etmişdi”, - deyə Ankara Dövlət Xəstəxanasının müdiri Mühiddin Çətin qəzetə bildirib. 

Prezident Administrasiyasının şöbə müdiri Əli Həsənov Əbülfəz Elçibəyin zəhərlənməsi ilə bağlı qaldırılan cinayət işinə münasibət bildirərkən deyib ki, Əbülfəz Elçibəy adi vətəndaş deyil. “O, qanunla status almış keçmiş prezidentdir. Bu baxımdan onun xəstəliyi ilə bağlı səslənmiş istənilən fikir prokurorluqda araşdırılmalıdır”. 

Əli Həsənov “Müasir Müsavat” Partiyasının sədri Hafiz Hacıyevin Elçibəyin zəhərlənməsi ilə bağlı prokurorluğa müraciət etməsini normal qarşılayıb. “Hafiz Hacıyev normal bir vətəndaşdır”. 

“Bağ evini Elçibəyə verən keçmiş məmurdan ilginc açıqlamalar” məqaləsində Dövlət Neft Şirkətinin Dəniz-neft İnşaat Trestinin Nəqliyyat İdarəsinin keçmiş rəisi Rafiq Ağayevin bağ evini 1997-ci ildə Əbülfəz Elçibəy Kələkidən qayıtdıqdan sonra ona verdiyi deyilir. “Getdim gördüm uçuq-sökük balaca bir daxma var. Əbülfəz bəy o daxmanın qarşısındakı köhnə dəmir çarpayıda uzanmışdı. Ayaqları şişmişdi, ayaqqabıları ayağına olmurdu. Onun səhhətində ciddi problemlər var idi”. 

O, bağ evini Elçibəyə verdikdən sonra işdən azad ediblər. 6 gün həbsdə saxlayıblar. “Elçibəylə yaxın olmağıma və bağ evimi ona verdiyimə görə heç zaman peşman olmamışam”.        

Əli Kərimlinin həbsdə olan qaynı Elnur Seyidovun həyatı təhlükədədir. Vəkil Əsabəli Mustafayev deyib ki, Elnur Seyidovun  müalicə müəssisəsinə keçirilməsi ilə bağlı verdiyi vəsatət təmin edilməyib. 

AXCP Gənclər Təşkilatının sədri Əbülfəz Qurbanlı siyasətdən getdiyini bəyan edib. O, siyasətdən getməsinin səbəbləri ilə bağlı əlavə izahat verməyib. Xəbəri sosial şəbəkədəki statusunda yayıb. 

Vergilər naziri Fazil Məmmədovun mavini Sahir Məmmədxanov “Arif-50” firmasının rəhbəri Arif Qasımovun külli miqdarda pulunu mənimsəyib. Sahibkar pulunun Eurovision adı ilə mənimsənildiyini bildirib. 

Azərbaycan prezidenti Tehranda keçiriləcək Qoşulmayanlar Hərəkatının samitində iştirak etməyəcək. Onun sammitdə iştirakı bu günədək diplomatik kanallarla təsdiqlənməyib. 

Avqustun 19-da Təbrizin Traxtor futbol komandasının “Neft” komandası ilə oyununda tribunadakı vətəndaşlar İran əleyhinə şüarlar səsləndirib. Milli fəallar İran hökumətini Azərbaycan türklərinə qarşı soyqırım siyasəti yürütməkdə günahlandırıb. “Rəsmi Tehran vətəndaşların zəlzələ bölgəsinə yardım təşəbbüslərini boğur”. 

İran avqustun 31-də viza rejimini bərpa etdiyindən bu ölkənin Bakıdakı konsulluğu qarşısında böyük növbələr yaranıb. 

“Generalların savaşında yeni epizod” məqaləsində bildirilir ki, Müdafiə Nazirliyi orduda əsgər ölümlərinə maraqlı izahat tapıb. “Nazirin yaxın çevrəsində hesab edirlər ki, rəqibləri Əbiyevin mövqeyini zəiflətmək üçün qəsdən orduya “xəstə və psixoloji cəhətdən hazırlığı olmayan” gəncləri salır... 3 milyardlıq hərbi büdcəni xərcləmək uğrunda mübarizə qızışır”. 

Zeynəb Xanlarovanın adam güllələyən qohumu azadlığa buraxılıb. Daşqın Nəsirovun azad olunması üçün milyon yarım rüşvət ödənilməsi söhbəti gəzir. 

“Abutalıbovun fasad korrupsiyası” məqaləsində deyilir ki, Bakıda binaların fasadlarının ağardılması kimi mənası bir layihəyə 138 milyon manat xərclənib. “Bu 2011-ci ildə bütövlükdə aqrar sektora ayrılan investisiyaların həcmindən 2 dəfə çoxdur”. 

Naxçıvanda 3 saylı hərbi şəhərciyin sakinləri zorla evlərindən deportasiya edilir. Naxçıvan MR Ali Məclisinin sədri Vasif Talıbovun adından sakinlərə deyilib ki, “kim müqavimət göstərsə dəlixanaya salınacaq”. 

Qəzet Naxçıvan rəhbərliyinin qanunsuz hərəkətləri ilə bağlı “Naxçıvanda irinləyən çiban-xan rejimi” adlı daha bir məqalə dərc edib. 

Nəqliyyat naziri Ziya Məmmədovun nəzarət etdiyi Bakı Avtovağzal Kompleksində dələduzlar sahibkarların obyektlərini eyni vaxtda bir neçə nəfərə satıb. “Ticarətçilər qan ağlayır” . 

Azadlıq 

AXCP sədri Əli Kərimlinin mühafizəçisi hədələnir. Bəhruz Həsənov bir müddət əvvəl həbs edilmişdi. “Demək olar ki, hər yerdə məni izləyirlər. Açıq şəkildə deyirlər ki, düz yolda deyilsən”, - deyə Bəhruz Həsənov bildirib. 

Qəzetdə AXCP sədri Əli Kərimliyə dəstək yazıları və Elçibəyin zəhərlənməsi faktı ilə bağlı cinayət işini pisləyən çoxsaylı ictimai-siyasi xadimlərin mövqeyi əks olunub.

Elçibəyin kürəkəni Aqil Səmədbəyli Türkiyəyə köçüb. 

““Yeni Azərbaycan” qəzeti İbrahimbəyovdan üzr istəməli idi” balıqlı müsahibədə Ziyalılar Forumunun təsisçilərində olan Cəmil Həsənli deyib ki, 48 milyard dollar vəsaiti oğurlanan bir ölkədə söz demək elə də asan məsələ deyil. 

“Paşayevlər seçki ilə bağlı toplandı” məqaləsində bildirilir ki, 2013-cü illlə bağlı planların müzakirə olunduğu yığıncaqda eks-prezident Ayaz Mütəllibov Hafiz Paşayevlə yanaşı əyləşib. 

“Ölkədəki narazılıq vulkan kimi püskürəcək” başlıqlı müsahibəsində Ziyalılar Forumunun təsisçilərindən olan Eldar Namazov deyib ki, hakimiyyət ictimai rəyi udmağın mümkün olmadığını artıq başa düşür. “2013-cü il yaxınlaşdıqca şər-böhtan kampaniyası daha da artacaq”. 

Heydər Əliyev Mərkəzinin yaxınlığında Heydər Əliyev prospekti 77-də yerləşən bina bir il öncə yüksək səviyyədə təmir edilsə də, bu günlərdə bütövlükdə uçurdulub. Binanın sökülməsi ya Heydər Əliyev Mərkəzinin təhlükəsizliyi, ya da mərkəzinin ərazisini genişləndirilməsi məqsədi daşıdığı bildirilir. 

Ekspress 

Bakının 13 prospektində təmir-tikinti işləri ilə bağlı nəqliyyatın hərəkəti məhdudlaşdırılıb. Paytaxta uzun tıxaclar yaranır, avtomobillərin hərəkəti çətinləşib. 

“Asbest şifer geri “qayıtdı” məqaləsində deyilir ki, bir qədər əvvəl istehsalına və idxalına qadağa qoyulmuş asbest şiferlərin satışına qoyulan məhdudiyyət iyul ayında aradan qaldırılıb. Qadağa qərarı asbest şiferlərin insan orqanizminə ziyanlı olması ilə bağlı qəbul edilmişdi. 

Bakı Xəbər 

2012-ci ilin ilk yarısında ölkə iqtisadiyyatına 10 milyard 824,3 milyon manat kredit qoyulub. Ümumi kreditlərin 87 faizi, 9 milyard 436,1 manat Bakı şəhərinin payına düşür.