Mətbuat-Monitorinq 01.10.14

Rəsmi qəzetlər Milli Məclisin öz işinə başlamasına dair xəbərləri, dövlət başçısı İlham Əliyevin təhsil işçilərinin bir qrupunun fəxri adlar və “Tərəqqi” medalı ilə təltif etməsi haqda sərəncamlarının mətnlərini ilk səhifələrdə yerləşdiriblər.

“Azadlıq” qəzeti bu günlərdə Azərbaycanla bağlı kəskin tənqidi qətnamə qəbul edən Avropa Parlamentinin Milli Məclisdə tənqid olunmasını ilk səhifəyə çıxararaq bu tənqidləri “Avropa Parlamentinə hücum” kimi dəyərləndirir.

Dövlət başçısı İlham Əliyevə müraciət göndərən NİDA-çılar bağışlanmaları üçün yox, “azadlıqda vətənə daha çox fayda verəcəkləri” üçün əfv olunmalarını istəyiblər.

Həbsdə olan QHT rəhbəri Anar Məmmədli Vaslav Havel mükafatını almasını “bütün həbsdə olan siyasi məhbuslara mənəvi dəstək” kimi qiymətləndirib.

Tanınmış analitik Tomas de-Vall dövlət başçısı İlham Əliyevi tabeliyində olanlara tam nəzarət edə bilməməkdə suçlayır.

Milli Şura ölkədə siyasi əsaslı həbslərə etiraz olaraq oktyabrın 12-də aksiya keçirməyi nəzərdə tutur, yer ayrılması üçün Bakı meriyasına müracuət olunub.

Maliyyə monitorinqi xidməti keçən il Azərbaycanda ümumi həcmi 114 milyon manat olan 603 şübhəli əməliyyatın qeydə alındığı haqda məlumat yayıb.

Ekspertlər məhsul azlığı ilə bağlı ölkə bazarlarında qiymətlərin daha da artacağı haqda bəyanat ssələndibilər.

“Ekspress”  bu yaxınlarda Avropa Parlamentinin Azərbaycanla bağlı tənqidi qətnamə qəbul etdiyinə görə Milli Məclisin bəyanat qəbul etməsini önə verərək bunu “qətnaməyə qarşı bəyanat” adlandırır.

Qəzetin yazdığına görə, insan hüquq və azadlıqlarını pozduqlarına görə 2013-cü ildə 202 polis əməkdaşı daxili orqanlardan qovulub.

“Exo”  ölkədə peşəkarların 40%-nin iş yerlərini sosial şəbəkələr vasitəsilə tapmasını önə çəkərək bu faktı “işə düzəlmək məsələsində sosial şəbəkələrin rolunun artması” kimi dəyərləndirir.

“Novoe Vremya” alman və fransız şirkətlərinin TAP qaz kəməri çəkilişi layihəsini tərk etmələrini “iqtisadiyyatla geosiyasət arasında seçim” sayaraq ilk plana çıxarıb.

Xəzər hövzəsilə bağlı Xəzəryanı ölkələrin dövlət başçılarının sammitinin nəticələrini qəzet “mümkün risk və təhlükələrin dəf edilməsi” kimi dəyərləndirir.

“Bizim yol”  Milli Məclisin iclasında Avropa Parlamentinin, Avropa insan haqları qurumlarının kəskin tənqid olunmasını ilk səhifədə yerləşdirib.

Qəzet qanunvericiliyə dəyişiklik nəticəsində partiyaların üzərinə MSK-ya maliyyə hesabatı vermək məsuliyyəti qoyulduğuna, deputat İlyas İsamyılovun isə MSK-nın belə bir səlahiyyəti olmamasına diqqət çəkərək bunu qanunsuzluq sayır. 

Parlamentin önündə aksiya keçirən şəhid ailələri sığorta pullarını hələ də ala bilmədiklərini nəzərə çatdırıblar.

“Yeni Müsavat”  rus politoloqlara istinadən İŞİD-in Azərbaycanda hakimiyyəti dəyişmək istəməsi iddiasını ön səhifəyə çəkib.

Bu yaxınlarda Azərbaycanla bağlı kəskin tənqidi qətnaməyə görə Avropa Parlamentinin Milli Məclisdə sərt ittiham edilməsini qəzet “Milli Məclisin Avropaya müharibə elan etməsi” kimi dəyərləndirir.

Qəzet Şəkidən Bakıya gətirilən siyasi məhbuslar Tofiq Yaqublu və İlqar Məmmədovun hansı təcridxanada saxlandıqları barədə ailələrinə  informasiya verimədiyini nəzərə çatdırır.

Monitorinq qrupu Qurban bayramında əfv olacağı haqda bəyanat səsləndirərək siyahını Əfv Komissiyasına təqdim etdiklərini bildirib.

Xəzəryanı ölkələrin dövlət başçları sammitinin nəticələrinə toxunan qəzet sammitin Xəzərin sərvətlərinin bölünməsinə başqa ölkələri buraxmamağa razılaşdıqlarını, amma bu sərvəti öz aralarında bölmək barədə razılaşa bilmədiklərini nəzərə çatdırır.