Mətbuat-Monitorinq 01.12.15

Rəsmi qəzetlər dövlət başçısı İlham Əliyevin Belarusa səfəri haqda yazıları ilk səhifələrdə yerləşdiriblər.

“Azərbaycan” qəzeti Nardaranda baş verən hadisələrə dair “Nardaran Azərbaycan reallığına qaytarılmalıdır”, “Milli Şura “Nardaran terrorçuları” ilə həmrəydir” adlı məqalələr, Lənkəran və Füzuli rayon ictimaiyyətinin Nardaran hadisələrini pisləməsini günahkarların cəzalandırılması tələbli mövqeləri dərc edib. 

“Xalq” qəzeti də eyni məzmunlu yazılar dərc edib.     

“Azadlıq” qəzeti “MTN işi” fonunda MTN generalı Akif Çovdarovun iş adamı Roman Səfərovun başına tapança dirəyərək 1 milyon dollar tələb etməsi haqda açıqlamasını manjetə çıxarıb.

İş adamı Ramil Hüseynov dövlət başçısı İlham Əliyevə bank məmurlarının onu intihar həddinə çatdırması haqda müraciət ünvanlayıb.

Vaxtı keçmiş kreditlərə görə bankın öncə cərimə pulunu, sonra faizləri, yalnız bundan sonra kreditin əsas hissəsini sildiyi üçün ekspertlər müştərilərə vaxtı keçmiş kreditləri ödəməmək çağırışı ediblər.

İslam Partiyasının keçmiş sədri Elçin Manafov MTN tərəfindən saxlanılaraq bir neçə saat sorğu-suala məruz qalıb.

Şabran rayonunun “Stansiya” adlı ərazisində vəhabilərə qarşı əməliyyat keçirilib, əməliyyatın Nardaran hadisələri ilə bağlı olduğu deyilib, hər hansı həbs aparılmayıb.

Nardaran hadisələrini ölkədə yaşanan dərin sosial-iqtisadi böhran kontekstində təhlil edən qəzet bu hadisələri “hakimiyyətin cəmiyyətdə xof yaratmaq istəməsi” kimi dəyərləndirir.

Silsilə cinayətlərə görə 2005-ci ildə həbs edilərək ömürlük cəza alan Hacı Məmmədovun “MTN işi” fonunda bəzi sirləri açmaq istəməsi bəyanatına hüquqşünaslar “bu iqtidarın dövründə bu işin araşdırılacağının inandırıcı görünmür” cavabını veriblər. 

Qəzet Nəqliyyat Nazirliyinin dövlət avtomobil nəqliyyatı və yükdaşımalar xidməti sistemində ciddi ixtisarlar aparılacağını nəzərə çatdırır.   

“Ekspress” Qarabağ cəbhəsində əsgərin şəhid olması, Rusiyanın Türkiyəyə iqtisadi sanksiyaları haqda xəbərləri ön plana çıxarıb.

“Novoe Vremya”  Çin, Türkiyə, Qazaxıstan, Azərbaycan və Gürcüstanın Rusiyadan yan keçməklə yüklərin Avropaya daşınması ilə bağlı konsorsium yaratmasını “Çinin Qafqaz geosiyasətinə qoşulması” kimi diqqət mərkəzinə çəkib.

“Bizim yol”  ekspertlərə isnadən ABŞ Federal Ehtiyat Fondunun dekabrın 18-də keçiriləcək toplantısından sonra “manatın taleyinin müəyyən ediləcəyi” barədə proqnozu ilk səhifədə yerləşdirib.

Nardaran hadisələrində İranın əlinin olması haqda iddialara səfir Möhsün Pakayin “İran indiyədək Azərbaycana qarşı çıxan heç bir təşkilatı dəstəkləməyib” cavabını verib.

“Yeni Müsavat”  ev dustağı edilən keçmiş MTN şefi Eldar Mahmudovun dövlət bağında saxlanması haqda xəbəri ilk səhifəyə çıxarıb.

“MTN işi” ilə bağlı yazan qəzet iş adamlarının qanunsuz saxlanmaları və dindirilmələrində iştirak edən “Akula Akif” ləqəbli Akif Mustafayevin MTN şefi Eldar Mahmudov vəzifədən azad olunduqdan bir gün sonra ölkəni tərk etməsini xüsusi olaraq nəzərə çatdırır.