Mətbuat-Monitorinq 02-03.11.14

Rəsmi qəzetlər dövlət başçısı İlham Əliyevin bəzi qanunların tətbiqi, bəzi qanunlara dəyişikliklərlə bağlı imzaladığı fərmanların mətnlərini ilk səhifələrdə dərc ediblər. Bundan əlavə, bu qəzetlər səhifələrinə aktual olmayan məqalələr yerləşdirməklə fərqləniblər.

“Azadlıq” qəzeti gömrük sistemində Gürcüstandan mal gətirilməsində sərf olunan hər 6 dollardan ancaq 1 dolların rəsmiləşdirilməsini, xəz-dəri idxalının isə tamamilə gizlədilməsini “gömrükdə misli görünməmiş korrupsiya” sayaraq ilk səhifəyə çıxarıb.

Siyasi məhbus Murad Ədilov vəkili ilə görüşdə həbsdə əsassız saxlandığını deyib, digər siyasi məhbus İntiqam Əliyevin boynunda duzlaşma və bel yırtığı xəstəlikləri aşkar edilib.

Ölkənin tanınmış hüquqşünasrları Milli Şuranın ölkədə siyasi məhbus problemilə bağlı noyabrın 10-na təyin etdiyi mitinqi “zəruri addım sayaraq” xalqı bu mitinqdə iştiraka səsləyiblər.

Naxçıvandakı durumu ciddi tənqid edən Babək rayon sakini Qadir Quliyev iki gündür ki, polisin təzyiqlərinə məruz qaldığı haqda mətbuata açıqlama verib.

“Yeni Müsavat”  Fransa rəhbərliyi ilə Parisdə görüşdə istər Azərbaycan, istərsə də   Türkiyə dövlət rəhbərlərinin “erməni soyqırımı”məsələsinə sərt reaksiyalarını önə çıxararaq bunu Azərbaycan və Türkiyənin “hücum diplomatiyası”nı seçməsi kimi dəyərləndirir.

Qəzet “Azərsu”, “Azəryolservis” şirkətləri və Bakı meriyasını “söküntü-təmir” adı ilə 2 milyard 250 milyon manatlıq dövlət investitsyasını məniməsəməkdə ittiham edir və bu üç quruma “üç muşketyor” ironiyası ifadə edir.

Hüquq müdafiəçisi Bəxtiyar Məmmədov daş karxanalarında “daş mafiyası”nın ildə dövlət büdcəsindən 900 milyon manat oğurladığını bəyan edərək hüquq-mühafizə orqanlarından bu durumun araşdırılmasını tələb edir.

Deputat Vahid Əhmədov 2015-ci ildə hökumətin tərkibində dəyişikliklərin  olacağını bəyan edib  və Azərbaycanın müstəqilliyinə xələl gətirəcək müqavilələrə qoşulmamaq çağırışı edib.