Mətbuat-Monitorinq 02-03.12.12

Rəsmi qəzetlər dövlət başçısı İlham Əliyevin yeni təyin edilən xarici ölkə səfirlərinin etimadnamələrini qəbul etməsi, bir sıra qanun və rəhbər sənədlərə dəyişikliklər barədə sərəncamlarının mətnlərini dərc ediblər. 

“Azadlıq” qəzeti mülk məsələsində adı hallanan spiker Oqtay Əsədovun kürəkəninin İngiltərəyə qaçmasından yazır. 

Nazir Natiq Əliyev şərti “milyarderlər ittifaqı” ilə əlaqələrinə görə rəsmi Bakı ilə münaqişə durumunda olan iş adamı İsgəndər Xəlilovla məxfi görüş keçirib. 

Bi neçə gün öncə RF prezidenti V.Putinlə prezident İlham Əliyev arasındakı telefon danışığına toxunan qəzet RF prezidentinin rəsmi Bakıdan MDB Gömrük İttifaqına qoşulmasını istədiyini bildirir. 

Bakının “20-ci sahə” deyilən ərazisində torpaq sürüşməsi baş verib. 

PA-nın “daxili mətbəxi”nə bələd olan jurnalist Mahal İsmayıloğlu Pamiz Mehdiyevə müavinlər təyin olunmasını “onun istefasına hazırlıq” adlandırıb. 

AXCP sədri Əli Kərimli müxalifət qüvvələrinin 2013-cü il seçkilərilə bağlı strategiyasını “ölkənin bir sülalə hakimiyyətindən xilasında maraqlı olan bütün qüvvələrin bir araya gəlməsi” şəklində ifadə edib. 

Keçmiş siyasi məhbus Fəxrəddin Bağırovun qızı Milana Bağırlı və həyat yoldaşı təzyiqlər üzündən ölkəni tərk etməyə məcbur olublar. 

“Yeni Müsavat”  oliqarxların ölkə torpaqlarını qarış-qarış aldıqlarını yazaraq nəqliyyat naziri Ziya Məmmədovun Qubada iki dağ aldığını yazır. 

Adi yol qəzasına görə istintaq müddətində həbsə alınan gənc müsavatçı Nigar Yaqublunun buraxılmamasını şərhçilər siyasi motivlərin olması ilə əlaqələndirirlər. 

Keçmiş deputat Gülər Əhmədovanı “rüşvət olayı”na görə ciddi tənqidə məruz qoyan YAP icra katibi Əli Əhmədova keçmiş deputat “mən alıb aparıb kiməsə vermişəm, sən alıb cibinə qoymusan” ittihamını səsləndirib. 

Gənclər qurumları təmsilçiləri İctimai Palatanın 10 dekabr aksiyasına xüsusi hazırlaşmaları haqda açıqlama veriblər.

PA ictimai-siyasi şöbəsinin müdiri Əli Həsənov PA-dakı son kadr təyinatlarını “kurasiya işinin səmərəliliyinin artırılması” kimi şərh edib. 

Rəsmi Bakı tərəfindən  narazılıqla qarşılanan “milyarderlər ittifaqı” haqda politoloq Rasim Ağayev “onların arasında iqtidara qarşı inqilab edəcək şəxs görmürəm” şərhini verib.

“Bakı Xəbər” ekspertlərə istinadən Xəzərdə neft hasilatının əvvəlki illərlə müqayisədə yalnız 2014-2015-ci illərdə arta biləcəyini proqnozlaşdırır. 

Qəzet özəlləşdirmə ərəfəsində Beynəlxalq Bankın reytinqinin aşağı salınmasını əcnəbilərlə reytinq agentliyinin gizli işbirliyi kimi dəyərləndirir. 

İndiyə qədər taleyi sual altında olan Qəbələ PLS-lə bağlı ekspertlər “yaxın 10 gündə bu stansiyanın RF-ə ən azı 3 il müddətinə icarəyə veriləcəyi”ni açıqlayıblar.