Ekspertlər və siyasətçilər Prezident Administrasiyasında təyinatlar barədə

Bir sıra partiya liderləri və ekspertlər Prezident Administrasiyasına dünənki təyinatları şərh edərkən bildiriblər ki, bu, hökumətdə gələcək dəyişikliklərdən və 74 yaşlı Ramiz Mehdiyevin postdan getməsinin mümkünlüyü fonunda hakim rejimin sabitliyi saxlamaq cəhdindən xəbər verir. 

Demokrat Partiyasının sədri Sərdar Cəlaloğluna görə, bu təyinatlarla rejim indiki status-kvo-nu saxlamaq mövqeyini nümayiş etdirib. Heç bir halda ölkədə demokratiyanın inkişafına xidmət etmir. Onun sözlərinə görə, mövcud iqtidar bununla “effektli idarəetmə pilləsi” yaratmaq cəhdi göstərib. 

ADP sədri əlavə bir idarəetmə pilləsinin yaradılmasını rüşvətin artmasına, vətəndaşların hüquq və azadlıqlarının daha çox tapdanmasına xidmət edəcəyini vurğulayıb. 

Açıq Cəmiyyət Partiyasının sədri Sülhəddin Əkbər bu təyinatları PA-da köklü dəyişikliklərə hazırlıq kimi dəyərləndirib. ACP sədri bu təyinatlarda PA ictimai-siyasi şöbəsinin müdiri Əli Həsənovun adının keçməməsinin diqqət çəkdiyini xatırladıb. 

“Şərq-Qərb” Araşdırmalar Mərkəzinin rəhbəri Ərəstun Oruclu diqqəti ona yönəldib ki, kadr təyinatları prezident İlham Əliyevin Vladimir Putinlə telefon söhbətindən sonra baş verdi. Ekspert xatırladıb ki, Gürcüstan prezidenti Mixail Saakaşvili də demişdi ki, əsas vəzifələrə konkret adamların təyin edilməsi ilə bağlı Putindən ona “məsləhət” daxil olmuşdu. 

Lakin Ə.Oruclu hesab etmir ki, İ.Əliyevin təyin etdiyi kadrlar Putinin görmək istədiyi adamlardır. Əksinə. 

Onun fikrincə, bu təyinatlar Ramiz Mehdiyevin mövqeyini zəiflədəcək. Belə ki, indi onun səlahiyyətləri dörd müavin arasında bölünüb, özü də pensiyaya hazırlaşır.

Məhərrəm Əliyevə gəlincə, vəzifəsindən asılı olmayaraq, “o, çox nüfuzlu adamdır”.

Ə.Oruclu həmçinin diqqəti DİN strukturunda kadr dəyişikliklərinə yönəldib ki, burada da üç idarənin rəisləri dəyişdirilib. İnterpol Milli Bürosunun rəisi Sahib Mirzəyevin Sumqayıt Şəhər Polis İdarəsinin rəisi postuna keçirilməsi xüsusi diqqət cəlb edir. 

Prezident Administrasiyasına və hökumətə yaxın mənbələr Turan-a bildiriblər ki, Ramiz Mehdiyevin istefaya göndərilməsi hazırlanır. Onun yerinə iki iddialı var – Zeynal Nağdəliyev və Prezident Administrasiyasının hüquq-mühafizə orqanları ilə iş şöbəsinin müdiri Fuad Ələsgərov.

Öz növbəsində Prezident Administrasiyası rəhbərinin yeni müavinlərindən biri Əli Əsədov Artur Rasizadə getdikdən sonra baş nazir postunu tutmalıdır.-02/05/06B-