Mətbuat-Monitorinq 03.05.13

Rəsmi qəzetlər dövlət başçısı İlhjam Əliyevin qəbulları haqda yazıblar. 

Bundan əlavə, dövlət başçısı Qobustan mərkəzi xəstəxanasının yeni binasının  tikintisi üçün ilkin olaraq 1 milyon manat ayrılması haqda sərəncam imzalayıb. 

“Azadlıq” qəzeti PA rəhbəri Ramiz Mehdiyevin İran səfərinə önəm verərək manjetə çıxarıb. Səfəri “qalmaqallı” sayan qəzet yazır ki, rəsmi Bakı R.Mehdiyevin Qərb əleyhinə bəyanatını təkzib edib, İran tərəf isə onun yeni qalmaqallı bəyanatını yayib. Qəzet bu səfəri həm də “R.Mehdiyev və komandasının qeyri-ciddi duruma düşməsi” adlandırır. Politoloq Hikmət Hacızadə isə Bakının eyni vaxtda İrana və ABŞ-a nümayəndə heyəti göndərməsini “xarici siyasətdə nizamsızlıq” adlandırır. 

Hüquqşünaslar yeni amnistiya aktının tətbiq olunduğu halda çox az məhbusa şamil ediləcəyini bildiriblər. 

İsmayıllı sakinləri 26 yanvar hadisələri zamanı həbs edilən şəxslərlə bağlı dövlət başçısı İlham Əliyevə “ya günahsızları azad edin, ya da bizi də həbsə alın” müraciətini ünvanlayıblar. 

İranda həbsə alınan Azərbaycan ədəbiyyatşünası Xatirə Xalidin taleyi barədə hələ də hər hansı informasiya yoxdur. 

Ekspertlər dövlət başçısı İlham Əliyevin “2018-ci ilə kimi ölkədə “iqtisadi, sosial, infrastruktur problemi qalmayacaq” bəyanatını ciddi  saymadıqlarını bildiriblər.

“Zerkalo” Qərbin Azərbaycanda demokratiya tələblərini rəsmi Bakının kəskin tənqid etməsinə “Hətta Ermənistan öz səhifələrində öyrənərək demokratiyanı öz hakim siyasi elitasının maraqlarına uyğunlaşdırır” cavabı ilə iqtidarı düşünməyə çağırır.  

Avropa komissarı (Aİ naziri) Füle Azərbaycana səfər gəlib, çex diplomatı rəsmi Bakının Brüssel qarşısında götürdüyü öhdəliklərin yerinə yetirilməsinin səviyyəsini yoxlayacaq.

“Ekspress” yazır ki, Bakı metropolitenin rəhbəri Tağı Əhmədov Bakıda hər 900 metrə bir metrostansiyasının tikiləcəyini bildirib.

“Exo” xeyriyyə məqsədilə əhalidən hər gün 10  miyon manatdan 50 milyon manata kimi vəsait cəlb etməyin mümkünlüyünü bildirərək belə fürsətin əldən verilməsinə “niyə ölkədə xeyriyyə fondları yoxdur?” sualı ünvanlayır.

“Bizim yol” yol kənarında tikilən ev və obyektlərin vətəndaşların öz hesabına sökdürüləcəyini, Nəqliyyat Nazirliyinə belə səlahiyyət verildiyini yazaraq “Bakının hər yerində kütləvi söküntülərin olacağı” barədə xəbərdarlıq edir. 

Xaçmaz sakini Nadirşah İbrahimov oğlu Samir İbrahimovu qətlə yetirənləri həbsə almaq üçün rayon polisinin ailədən pul tələb etdiyini bildirib.

“Yeni Müsavat” keçmiş rektor Elşad Abdullayevlə bağlı məsələni ilk səhifəyə çıxaırb. Keçmiş rektor rəsmi Bakını onu “Sevinc Babayeva kimi öldürmək” istəyində ittiham edib və bu günədək 11 belə cəhdin olduğunu bəyan edib.  

Rəsmi Bakı fəaliyyətini ciddiləşdirən şərti “milyarderlər ittifaqı”nın rəhbəri, baş nazirin keçmiş birinci müavini Abbas Abbasovu təhqirə rəvac verib. 

Ofşor zonalarının sirlərinin 5 Avropa ölkəsinə verilməsi haqda Britaniyanın  offşor zonaları ilə razılıq əldə edilib. 

Politoloq və hüquqşünaslar tətbiq olunması gözlənilən amnisiya aktının “siyasi məhbuslara şamil edilməyəcəyi şərhini veriblər.