Mətbuat-Monitorinq 03.07.14

Rəsmi və iqtidaryönlü qəzetlər dövlət başçısı İlham Əliyevin Qusar rayonunun Qusar-İmamqulukənd-Çuxuroba avtomobil yolunun tikintisilə bağlı 3 milyon manat vəsaitin ayrılması haqda sərəncam imzalaması, bəzi qanunlara dəyişikliklərin mətnləri dərc ediliblər.

“Azadlıq” qəzeti Qərbin rəsmi Bakıdan demokratiya çağırışlarında prinsipiallığının iqtidarı çətin duruma salmasını ilk səhifəyə çıxarıb.

ABŞ Helsinki Komissiyasının həmsədri Kristofor Smit həbsdə olan QHT rəhbəri Anar Məmmədlinin atası Asəf Məmmədli ilə görüşüb.

Milli Elmlər Akademiyasında ixtisarlar ola biləcəyini yazan qəzet məlumatlı mənbələrə istinadən əməkdaşların sayının 2-3 min nəfər azalacağını qeyd edir.

AXCP sədri Əli Kərimli rəsmi Bakının təzyiqilə ATƏT PA-nın üzvü Kartenlə görüşünə izn verilməməsini “hökumətin ona münasibətinin bir elementi” sayıb.

Danimarka deputatı AXCP sədrilə görüşə izn verilməməsini “hökumətin Əi Kərimlini “yaxşı tanımasının nəticəsi” kimi dəyərləndirib.

Siyasi xadimlər rəsmi Bakının təzyiqilə AXCP sədri Əli Kərimlinin ATƏT deputatı ilə görüşünə icazə verilməməsini “iqtidarın Əli Kərimliyə münasibətini avropalı deputatların öz gözlərilə görməsi” kimi dəyərləndiriblər.

Rəsmi Bakının ölkədə siyasi məhbus olmasını inkar etməsinə ATƏT deputatı Liv Honderm “hökumət həbsdə olanlara nə ad istəsə qoya bilər, amma biz bilirik ki, onların arasında QHT əməkdaşları, İnternet fəalları, müxalif partiya üzvləri var” kimi mövqe ifadə edib.

Qəzet buraxılış imtahanlarında məzunların əksəriyyətinin “2” və “3” qiymət almasını “ölkə təhsilinin düşdüyü bataqlıq” adlandırırlar.

Bakıda “tıxac” problemini aradan qaldırmaq üçün Nəqliyyat Nazilriyinin rayonlardan gələn avtomobillərin paytaxta buraxılmaması haqda qərarını qəzet əsassız sayaraq bunu ironiya ilə “analoqu olmayan qərar” adlandırır.

“Ekspress”  ATƏT PA-nın sessiyasının Bakıda keçirilməsini “Bakıda Qərb-Rusiya çəkişməsi” kimi dəyərləndirir və rəsmi Bakının ATƏT PA-nın Bakı Bəyannaməsinin 4 bəndindən narazı qaldığını nəzərə çatdırır.

Daxili İşlər Nazirliyi son 10 ildə 3 min cinayətkar qrupun zərərsizləşdirildiyini, bu dövrdə axtarışda olan 37 mindən çox şəxsin tutulduğunu nəzərə çatdırıb.

“Exo”  ABŞ Mərkəzi Kəşfiyyat İdarəsinin (MKİ) Azərbaycan hökuməti haqda kəşfiyyat məlumatı toplamağa başladığını yazır, ekspertlər isə kəşfiyyat məlumatlarının nə ilə bağlı olmasını müəyyənləşdirməyi əsas məsələ sayır.

Qəzet ekspertlərə istinadən ölkədə vaxtlı keçən amma qaytarılmayan kreditlərin ümumi kredit portfelinin 10%-ni təşkil etdiyini bildirir.

Qəzet diqqəti Ukraynanın “Maydan” fəallarından olmuş Yusif Mirişovun sonrakı taleyindən bir xəbər olmaması üzərinə çəkir.

“Novoe Vremya”  ATƏT PA-nın qəbul etdiyi Bakı Bəyannaməsinə narazılığını “Bəyannamənin formulasına nə qədər diqqət yetirsən də vəziyyət yaxşılaşmayacaq” mövqeyilə ifadə edir.

“Bizim yol”  Elmlər Akademiyasında 3 minə yaxın alimin ixtisara salınacağı haqda xəbəri ilk səhifəyə çıxarıb.

Qəzet yazır ki, fəaliyyətləri dayandırılan türk liseyləri şagirdlərinin valideynləri övladlarının yerləşdirildikləri məktəblərdə təhsil səviyyəsindən narazılıqlarını bildirirlər.

“Yeni Müsavat” ın iddiasına görə, rəsmi Bakı rəsmi Ankara və Tehranla Bakıdan olan müxalifətçilər bu ölkələrə gəldikdə “onların nəzarətə götürülməsi, qeydə alınması” ilə bağlı gizli saziş imzalayıb.     

Azad Demokratlar Partiyası təsis qurultayını iyulun 6-da Vətəndaş Həmrəyliyi Partiyasının akt zalında keçirəcəyini bildirir.

Qəzet iyulun 1-dən Bakıda yalnız xanımlara xidmət göstərən taksilərin fəaliyyətə başlayacağını bildirir.

Krım Tatar Məclisinin sədri Refat Çubarov Krımda Rusiya ilə birləşməkdən məmnun olanların sayının azalması haqda bəyanat səsləndirib.

“Abşeron” otelinin nümayəndəsi AXCP sədri Əli Kərimlinin  otelə buraxılmamasını onlara verilən siyahıda AXCP sədrinin adının olmaması ilə izah edib.