Mətbuat-Monitorinq 06-07.07.14

Rəsmi qəzetlər Azərbaycanın bir çox beynəlxalq əhəmiyyətli tədbirlərə ev sahibliyi etməsi mövzusunu ilk səhifəyə çıxarıb. Bundan əlavə, bu qəzetlərdə dövlət başçısının Biləsuvar rayonunda Günəşli-Ağayrı-İsmətli-Aranlı-Çinarlı-Əliabad  avtomobil yolunun tikintisilə bağlı 2,8 milyon manatın ayırlması haqda sərəncamının mətnini ilk səhifələrə yerləşdiriblər.

“Azadlıq” qəzeti Qərbin təzyiqlərilə üz-üzə qalan rəsmi Bakının vəziyyətdən çıxmaq üçün lobbi təşkilatlarına üz tutması xəbərini önə verərək bunu “Əliyevlərin lobbi axtarışı” kimi dəyərləndirir.

Hüquq müdafiəçisi Leyla Yunus onlara aid sənədləri prokurorluq qaytarmayana kimi istintaqa getməyəcəyini deyib və evinə basqın ola biləcəyi barədə xəbərdarlıq edib.

Binəqədidəki məscid tikintisilə bağlı iki aydır ki, mənzillərinə elektrik, qaz, su verilməyən qaçqınlarla meriya arasında qalmaqal yaranıb.

5 il azadlıqdan məhrum edilən siyasi fəal Ömər Məmmədov Şüvəlandakı təcridxanada təzyiqlərə məruz qalır, buna səbəb kimi gənc fəalın məhkəmədə söylədiyi “son söz” göstərilir. 

Vəhabi təriqətindən olan bir şəxsin Sabirabad rayonunda bir neçə vətəndaş tərəfindən saqqalının qırxılmasını ekspertlər “ölkədə qorxulu tendensiya” və məzhəbarası qarşdurmaların anonsu kimi dəyərləndiriblər və  rəsmi qurumların bu hadisəyə reaksiya verməməsini normal saymayıblar.  

Azərbaycan vətəndaşı olan şəxsin başqa dövlətin vətəndaşlığını aldığı halda iki il həbs oluna biləcəyilə bağlı faktın qanunda əksini tapmasını ekspertlər “biabırçı hal” adlandırıblar.

“Yeni Müsavat” Azərbaycanın məzhəb davasına sürüklədilməsi haqda iddiaları ön plana çıxarıb və hakimiyyətə “bu günədək siyasi diskussiyalar müxalifət partiyalarının ziyalı liderlərilə gedirdi, indi isə saqqalkəsənlərlə danışmaq zorunda qala bilər” xəbərdarlığını edib. 

Sədri Müsavat Partiyasının keçmiş Məclis sədri olan Azad Demokratlar Partiyası (Az.DP) iyulun 6-da Vətəndaş Həmrəyliyi Partiyasının ofisində təsis qurultayını keçirib.

Azərbaycanda vətəndaşlara xidməti müasir şəkildə yerinə yetirən ASAN xidmətlər qurumunun fəaliyyətini hakimiyyətdəki  Rusiyaya bağlı şəbəkənin bəyənmədiyini və bu xidmətə müqavimət göstərdiyini iddia edir.