Mətbuat-Monitorinq 07.01.14

Rəsmi qəzetlər dövlət başçısı İlham Əliyevin əhalinin ekoloji baxımdan təmiz su ilə təminatının yaxşılaşdırılması üçün Ekologiya və Təbii Sərvətlər Nazirliyinə 5 milyon manat ayırması, Abid Şərifovun “Şöhrət” ordenilə təltif olunması haqda sərəncamlarının mətnlərini ilk səhifələrdə yerləşdiriblər. 

“Azadlıq” qəzeti ölkədə sosial durumun ağırlaşdığı vaxtda ARDNŞ-nin Türkiyədə 75 milyon dollarlıq mülk almasını ilk plana çəkərək “bu “səxavət nəyə hesablanıb” sualını verir.

ABŞ-ın “The Hiffington Post” qəzeti 2014-cü ilin dekabrında Azərbaycandakı həbslər barədə yazaraq ölkəni “Absurdstan” adlandırıb. Qəzet jurnalist Xədicə İsmayılın həbsinə səbəb olan Tural Mustafayevin ona qarşı ərizəsini geri götürmək istədikdən bu yana xəbər olmamasına diqqət çəkir.

Eks-deputat Gültəkin Hacıbəyli yanvarın 12-də Vaşinqtonda Azərbaycanla bağlı gözlənilən dinləmələri “ABŞ-ın son zamanlar Azərbaycana sərgilədiyi siyasətin davamı” kimi dəyərləndirib.

Avropa İttifaqı Azərbaycanda “Azadlıq” radiosunun bağlanmasına “Azərbaycanın götürdüyü beynəlxalq öhdəlikləri pozması” etirazını ifadə edib.

Evlərə görə vergi qaydaları dəyişib. Belə ki, 30 kv.metrdən yuxarı mənzil sahəsinin hər 1 kv. metrinə görə 28-60 qəpik arasında dəyişən əlavə əmsal tətbiq edilir. Ekspertlər bunu “böyük ölçülü mənzillərə tələbin azalacağı” kimi dəyərləndirirlər.

Deputat Vahid Əhmədov neftin qiyməti 60 dollar səviyyəsində qaldığı halda büdcəyə və Neft Fondunun büdcəsinə problem yaradacağı barədə bəyanat səsləndirib.

Ekspertlər qarşıdakı aylarda ciddi bahalaşma dalğasının gözlənidiyini qeyd edərək ət və süd məhsullarının qiymətlərində artım olacağını bildirirlər.

“Ekspress”  neftin dəyərinin 50 dollardan aşağı endiyini önə çəkərək bunu “qiymətin azalması, riskin artması” kimi dəyərləndirir.

“Exo”  ölkədə qida məhsullarının təhlükəsizliyi haqda qanunvericilik qaydasında sənəd qəbul olunmamasını diqqət mərkəzinə çəkib.

Neftin qiymətinin enməsilə bağlı 2015-ci ili dövlət büdcəsi üçün ağır il sayan ekspertlər may ayında büdcəyə bir də baxıla biləcəyini qeyd edirlər.

“Novoe Vremya” Avropa İttifaqının rəsmi Bakını ciddi tənqidə məruz qoymasına “Aİ Bakını tənqid edir, bəs günahkar kimdir” sualını verərək Aİ-ni demokratiya tələbində ardıcıl və ciddi olmamaqda ittiham edir.

“Bizim yol” Bakının mənzil bazarında durğunluğun yaranmasını, alıcı azalsa da qiymətlərin enmədiyini ilk səhifəyə çəkib və bu fakta “hər şey bahalaşır, evlər niyə ucuzlaşsın ki?” ironiyalı mövqe ifadə edir.

“Yeni Müsavat” ABŞ-ın Azərbaycan səfirinin xüsusi tapşırıqla gəlməsi iddiaaını ilk səhifəyə çəkərək bunu “Azərbaycan uğrunda Rusiya-Amerika” rəqabətinin yeni mərhələyə daxil olması kimi dəyərləndirir.

Azərbaycanın dövlət bayrağı ilə şəkil çəkdirdiklərinə görə Güney Azərbaycanın 4 milli fəalının hər birinə 22 aylıq həbs cəzası verilib.