Mətbuat-Monitorinq 08.09.12

Rəsmi qəzetlər dövlət başçısı İlham Əliyevin NATO-nun baş katibi Anders Rasmusseni qəbul etməsini ilk səhifələrə çıxarıblar. Bəzi qanunlara dəyişikliklər bu qəzetlərdə əksini tapıb.  

“Azadlıq” qəzeti dayana bilmək təhlükəsilə bağlı oxuculara dəstək kampaniyası müraciəti edib, Azərbaycan üzrə Beynəlxalq Tərəfdaşlıq Qrupu rəsmi Bakını bu sahədə təcili addımlar atmağa çağırıb. 

PA ictimai-siyasi şöbəsinin müdiri Əli Həsənovun mətbuat yayımı sahəsində hökumətin cəhdlər göstərməsi ilə bağlı bəyanatına media mənsubları “Ə.Həsənovun qeyri-səmimi danışması, hökumətin durumu yaxşılaşdırmağa yox, pisləşdirməyə cəhd etməsi” ittihamı səsləndiriblər.   

Maliyyə nazirinin fəlakət zonaları üçün maliyyə vəsaitlərinin ayrıldığını, fövqəladə hallar nazirinin bunu inkar etməsini qəzet “iki nazirin maliyyə toqquşması” kimi dəyərləndirir. 

İctimai Palata təmsilçiləri İlham Əliyev prezidentliyə namizədliyini 3-cü dəfə irəli sürdüyü halda bunun demokratik inqilaba səbəb olacağı xəbərdarlığı ediblər.  

Qəzet Cənubi Qafqaza səfər edən ATƏT-in 19 səfirinin Azərbaycan müxalifətilə görüş keçirmək üçün müraciət etdiyini bildirir. 

“Zerkalo” qəzetinə şərhində Kornegi Fondunun əməkdaşı Azərbaycan zabiti Ramil Səfərovun azadlığa buraxılması ilə bağlı yaxın perspektivdə Ermənistan dövlət başçısının tərsliyi üzündən Azərbaycan və Ermənistan dövlət başçılarının görüşünün baş tutmayacağını bildirir. 

“Ekspress” qəzeti gənclərin aqrar sahədəki ixtisasları seçməməsi üzündən bu sahədə ali məktəblərə ayrılan tələbə yerlərinin çoxunun boş qaldığını yazır.   

“Exo” qəzeti ekspertlərə isnadən ölkə vətəndaşlarının aldıqları qida məhsullarının 10%-nin zibil qutularına atıldığını yazır. 

“Novoe Vremya” qəzeti NATO baş katibinin dövlət başçısı İlham Əliyevə islahatların davam etdirilməsi tövsiyəsinə “olmayan islahatlar necə davam etdirilsin?” mövqeyi ifadə edir. 

“Bizim yol” qəzeti yazır ki, Xətai rayonundakı 88 saylı məktəbin müəllim və valideynləri məktəbin “Zəkalar liseyi”nə verilməsinə etiraz olaraq PA önündə etiraz aksiyası keçiriblər. 

“Yeni Müsavat” qəzeti yazır ki, ASALA erməni-terror təşkilatının Azərbaycanı terrorla hədələməsinə cavab olaraq ictimai nəqliyyatda, metropolitendə mühafizə tədbirləri gücləndirilib. 

Avtomobillərin texniki baxışdan keçirilməsinin korrupsiya mənbəyi olduğunu ifadə edən bəzi QHT-lər bunun ləğvi üçün dövlət başçısına müraciət ünvanlayıblar. 

Qəzetin yazdığına görə, “Azəryolservis”in başçısı Cavid Qurbanovun sürücüsünün radikal dindarları maliyyələşdirməkdə ittiham edildiyini yazan qəzet onun ölkədən qaçdığını bildirir.