Mətbuat-Monitorinq 09.01.13

Rəsmi qəzetlər dövlət başçısı İlham Əliyevin Mingəçevir şəhərinin sosial-iqtisadi inkişafı üçün prezidentin Ehtiyat Fondundan 2 milyon manat vəsaitin ayrılması haqda sərəncamının mətnini dərc ediblər. 

“Azadlıq” qəzeti ötən ilin yayından ölkənin ictimai gündəmində dominant olan “Gülərgeyt”mövzusuna yenə də önəm verir. “Deputatlıq rüşvəti” videosunda adı şahid kimi keçən Sevinc Babayevanın PA-nın şöbə müdiri Novruz Məmmədova məxsus binadan ev aldığını və ölümündən bir ay öncə evinin əlindən alındığını ilk plana çıxarır.   

“Gülərgeyt” məsələsilə mövqeyi zəifləyən PA-nın rəhbəri Ramiz Mehdiyevin kurasiyasında olan YAP-ın onun yeni müavini Əli Əsədovun kurasiyasına keçməsi ilə partiyada “yeni ilə köhnənin mübarizəsi”nin dərinləşdiyi bildirilir. 

Qəzet ekspertlərə istinadən müdafiə naziri Səfər Əbiyevi hərbçilərin sosial təminatını yaxşılaşdıracaq qanunun qəbuluna mane olmaqda ittiham edib.

“Kür” Vətəndaş Qərargahı Fövqəladə Hallar Nazirliyinin Qax-Balakən zəlzələ bölgəsində  2984 ev və 22 məktəb tikib istifadəyə verməsi barədə bəyanatını “necə olur ki, zəlzələdən ötən 6 ayda cəmi 682, son 40 gündə isə 1292 ev tikilir?” sualı ilə şübhə altına alır. 

“Ekspress”. PA-nın şöbə müdiri Əli Həsənov vətəndaş cəmiyyəti institutlarının 2013-cü il seçkilərində hakimiyyətə yeni adamların gələcəyi bəyanatlarına “iqtidar daxilində hər hansı dəyişklik gözləmək əbəsdir” kimi açıqlama verib.

1995-ci ildən dövlət qeydiyyatı ləğv edilən İslam Partiyasının rəhbərliyi əgər partiyanın adı qeydiyyat üçün problemdirsə, onu dəyişmək üçün hökumətlə müəyyən danışıqlar aparmağa hazır olduğunu bəyan edib. Qəzet buna “AİP adını dəyişir?” mövqeyini ifadə edib.           

“Exo”. Ekspertlər bu il ölkədə inflyasiyanın 9% olacağını proqnozlaşdırırlar. Qəzet bu faktı ”2013-cü ildə qiymət artımının başlanması” kimi dəyərləndirir. 

“Novoe Vremya”  keçmiş rektor Elşad Abdullayevin yaydığı videoları “ölkənin siyasi sistemini silkələməsi” kimi dəyərləndirir. 

Rəsmi Bakının ölkədə demokratik islahatlara mane olmasına baxmayaraq, Avropa Birliyinin ölkədə demokratikləşmə ilə bağlı layihələrə vəsait ayırmasına qəzet “layihələr kömək edəcəkmi?” münasibətini ifadə edir. 

“Bizim yol”. 2012-ci ilin 1 mart Quba olayları ilə bağlı həbsə alınan jurnalistlər məhkəmə prosesində “bandotdel”də işgəncələrə məruz qalmaları ilə bağlı faktlar açıqlayıblar.  

“Yeni Müsavat”. Yaydığı videolarla yaydan bu yana ölkənin ictimai gündəmində dominantlıq edən keçmiş rektor Elşad Abdullayevin “əlimizdə çox videolar var, əsas videoları seçkidən az öncə açıqlayacağıq” bəyanatı ilə çıxış edib.

“Gülərgeyt” məsələsində əsas şahidlərdən olmuş mərhum Sevinc Babayevanın oğlu Ayxan Məmmədov “keçmiş deputat Gülər Əhmədovanı da öldürə bilərlər” xəbərdarlığı ilə çıxış edib.    

Tanınmış ziyalı Rüstəm İbrahimbəyovun ölkədə böyük ictimai hərəkatın  yaranmağa başlaması haqda bəyanatına birmənalı olmayan münasibətə ictimai fəallar “hazırlıq işləri yekunlaşandan sonra geniş açqılamalar veriləcək” mövqeyini səsləndiriblər.