Mətbuat-Monitorinq 09.01.15

Rəsmi qəzetlər dövlət başçısı İlham Əliyevin Salyan rayonunun Çuxanlı-Gəncəli-Piatman-Parça Xələc-Seyidan avtomobil yolunun tikintisilə bağlı 3 milyon manatın ayrılması haqda sərəncamını ilk səhifəyə yerləşdiriblər. 

“Azadlıq” qəzeti “Nyu York Times” qəzetinin Əliyev hökumətinin Rusiyaya meyllənməsi haqda yazısını manjetə çəkərək bunu Azərbaycanın Vaşinqtonla düşmənçilik yolu tutması kimi dəyərləndirməsini də diqqətə çatdırır.

Qəzetə görə, rəsmi Bakının son vaxtlar ABŞ-ı tənqid etməsi Makkeyn İnstitutunun direktoru Devid Kramerin Azərbaycana sanksiya tələbindən yaxasını qurtarmaq səylərilə bağlıdır.

Nyu-Yorkda yerləşən Jurnalistləri Müdafiə Komitəsi rəsmi Bakını repressiya və mediaya basqılara son qoymağa çağırıb.

Vəkil Elçin Qəmbər həbsdə olan hüquq müdafiəçisi Leyla Yunusun səhhətinin yaxşılaşması haqda səslənən iddiaları əsassız adlandırıb.

2014-cü ilin martından hesabları bağlanan “Qanun” nəşriyyatının hesabları açılmayıb, Vergilər Nazirliyi ilə məhkəmə çəkişməsi isə davam edir.

Əfv sərəncamı ilə azadlığa çıxan tanınmış vəkil Qurban Məmmədov 14 saylı həbsxanada məhkumlara edilən  işgəncələr barədə müsahibə verib.

ABŞ-ı daim Azərbaycanın milli maraqlarına zidd siyasətdə ittiham edən PA ictimai-siyasi şöbəsinin müdiri Əli Həsənov “Bloomberg” jurnalına müsahibəsində ABŞ-la əlaqələrin milli maraqlar baxımından da üst-üstə düşməsi bəyanatına qəzet “rəsmi Bakı ABŞ önündə geri çəkilir?” təəccübünü ifadə edib.

Qəzet Naxçıvan rəhbəri Vasif Talıbovun dövlət qulluqçularının kollektiv şəkildə muzeylərə getməsi haqda sərəncamını “əcaib” adlandırır. 

Parisdə “islam dini” adı ilə törədilən terrordan sonra Fransada məscidlərə hücumlar başlayıb.

“Ekspress”  Bakının “Sahil” qəsəbəsində iki qardaşın güllələnməsi və neftin ucuzlaşması ilə bağlı Neft Fondunun 6-9 milyard arasında maliyyə vəsaiti itirəcəyi  haqda xəbəri önə çəkib.

Parisin “Charlie Hebdo” jurnalına basıqının nəticələrinə toxunan ekspertlər bu faktı “Qərblə Şərq arasında qarşıdurmanın dərinləşəcəyi” kimi şərh ediblər. 

“Exo”  2015-ci ildə Azərbaycan manatının sabit qalacağı ilə bağlı xəbəri ilk plana çəkib.

“Novoe Vremya”  Parisdəki terror aktını diqqət mərkəzinə çəkərək fakta “Parisdə terror: təxribatçılar canlanıb” münasibətini ifadə edir.

“Bizim yol”  qar yaşması ilə nəqliyyatın hərəkətində problemin yaranmasını ilk səhifəyə çıxararaq bunu “Bakının ilk qara təslim olması” adlandırır.

Qəzet “Sevil Massivi”ndə ev tikintisi adı ilə korrupsiyaya yol verdiyinə görə bələdiyyə sədrliyindən qovulan şəxsin oğlunun bələdiyyə sədri postunu  tutduğunu nəzərə çatdırır.

“Yeni Müsavat” Azərbaycanda vaş verən iki intihar hadisəsini və Paris terrorunun icraçılarından olan şəxsin saxlanmasını ilk səhifəyə çıxarıb.

Qəzet 2015-ci ildə siyasi partiyalar üçün 2,5 milyon manat vəsaitin ayrılmasının nəzərdə tutulduğunu qeyd edir.