Mətbuat-Monitorinq 09.01.16

Rəsmi qəzetlər ölkədə yaşanan maliyyə böhranı haqqında heç nə yazmırlar. Bu qəzetlər dövlət başçısı İham Əliyevin İmişlidə yol çəkilişinə 1,1 milyon manat ayırması haqda sərəncamının mətnini ilk səhifəyə çıxarıblar.  

“Azərbaycan” qəzeti isə “dövlətə xəyanət” adı ilə həbsə alınan Nardaran ağsaqqallarından Natiq Kərimovu müxalifətin müdafiə etməsinə “xarici kəşfiyyat agentlərinin müdafiəsi” kimi yanaşır. 

“Azadlıq” qəzeti  dollar qıtlığı ilə bağlı məsələni önə çəkərək bunu “manatın daha sürətlə batması” kimi manjetə çıxarıb. Devalvasiyanın bütün ölkə həyatını iflic etdiyini deyən Milli Şuranın sədri Cəmil Həsənli hökumətin bir il öncəki yekəxanalığından əsar-əlamətin belə qalmadğına diqqət çəkir. Ekspertlər isə devalvasiya nəticəsində vətəndaşların banklardakı əmanətlərinin təhlükə altına düşdüyünü bəyan edirlər.

Qəzet ölkədə insan haqları məsələsinə toxunaraq həbsdə olan jurnalist Xədicə İsmayılla görüşən vəkillərə icazə məktubunun müddətinin bitməsi bəhanəsilə görüş verilməməsi səyləri, icazə veriləndə isə Avropa məhkəməsilə bağlı kommunikasiya sənədlərini içəri keçirməyə qoyulmadığını yazır.

Milli Şuranın sədri Cəmil Həsənli ABŞ Konqresinə təklif edilən “Azərbaycanda Demokratiya Aktı” qanun layihəsinə “Bu akt Azərbaycan hökumətinin repressiyalarının nəticəsidir” şərhini verib.

“Ekspress” valyutadəyişmə məntəqələrinin mart-aprel aylarında bağlanacağını yazaraq bunun dollar bazarında “xaos“a yol verilməməsi üçün edildiyini bildirir.

“Novoe Vremya”  “böhran öz caynaqları ilə hər şeyi əhatəsinə alır” deyə ölkədə böhranın get-gedə dərinləşməsini nəzərə çatdırılır.

“Bizim yol”  Beynəlxalq Valyuta Fondunun rəhbəri Laqardın neftin qiymətinin hələ uzun müddət aşağı olacağı bəyanatını neft ölkəsi kimi Azərbaycanda böhranın hələ uzun zamana davam edəcəyi kimi  dəyərləndirir.

Ekspert Rövşən Ağayev isə dolların bahalaşması fonunda ailə büdcəsinin aylıq kəsirinin 400-500 manat təşkil edəcəyi bəyanatını səsləndirib.

Qəzet manatın ucuzlaşmasının ali təhsil məktəblərində təhsil haqqının dollarla ödənilməsi  düşüncəsi yaratdığı, ictimai rəyin buna əks olduğunu vurğulayır.

“Yeni Müsavat”  dolların 2 manat nisbətinə yaxın bahalaşmasını “üçüncü manat zəlzələsi” sayır, dollar bazarında xaos yaranmasına səbəb kimi banklara valyuta məzənnəsini sərbəst müəyyən etmək qərarının olduğunu göstərir.

Ekspert Vüqar Bayramlı hesab edir ki, indi yaşanan maliyyə böhranından çıxmaq üçün limit çərçivəsində borclanmaya getmək məqsədəuyğundur.

İndiki maliyyə böhranı fonunda deputat Əli Məsimlinin qəzetə “ABŞ dolların hədsiz bahalaşmasının, Azərbaycan isə manatın həddən artıq ucuzlaşmasının qarşısını almağa çalışır” açıqlaması maraq kəsb edir.