Mətbuat-Monitorinq 10.01.14

Rəsmi qəzetlər dövlət başçısı İlham Əliyevin yanvarın 9-da  Nazirlər Kabinetinin ilin yekunlarına dair keçirdiyi iclası haqda xəbərləri ilk səhifələrə çıxarıblar. 

“Azadlıq” qəzeti Qarabağ qazisi Zaur Həsənlinin intiharına səbəb olan deputat, Həmkarlar Konfederasiyasının başçısı Səttar Mehbalıyevə münasibətdə PA-dakı iki qruplaşmanın üz-üzə gəlməsini “Administrasiyada Mehbalıyev qarşıdurması” adlandıraraq ilk səhifəyə çıxarıb.

1993-cü il qiyamının başçısı, “qara polkovnik” Surət Hüseynov Qarabağ müharibəsi əlillərinə yardım məqsədilə “Qazilər Fondu” təsis edib.

Müsavat Partiyasının müxalif qüvvələrin Milli Şurasından çıxmasına şərh verən vətəndaş cəmiyyəti institutlarının təmsilçiləri daha çox tənqidi mövqe sərgiləyiblər.

Milli Şura rəhbərliyi ölkədə dəyişikliklər istəyən, partiya mənsubiyyəti olmayan tanınmış şəxslərin qurumda təmsil olunmalarına geniş yer verməyi nəzərdə tutur.

“Ekspress”  yazır ki, MTRŞ sədri Nuşirəvan Məhərrəmli özəl telekanalları özlərinə yaxın adamlardan ibarət Bədii şuralar yaratmaqda ittiham edib.

Qəzet ekspertlərə istinadən elektrik enerjisinin 66%, qazın isə 50% bahalaşacağını yazır.

Hüquq-mühafizə orqanları Şirvan şəhərində orta məktəbə yaxın bir ərzaq mağazasında nartkotik maddə satışını aşkarlayıb.

“Novoe Vremya”  Avropa beynəlxalq qurumlarının Bakı ofislərinə növbəti dəfə yeni rəhbərlərin təyin edilməsinə, amma ofislərin demokratiya sahəsində səmərəli fəaliyyətinin olmamasına “Avropanın yeni səfirlərindən nə gözləmək olar?” sualı ilə tənqidi münasibət ifadə edir.

Qəzet ölkədə müxalifətdaxili gərginliyin yaşanmasına “Azərbaycan müxalifəti, sakit yat!” ironiyasını ifadə edir.

“Bizim yol” qəzeti kommersiya banklarının ipoteka kreditinə qadağa qoymasını önə çəkərək bu addımın minlərlə gənc ailə ilə banklar arasında narazılığa səbəb olduğunu bildirir. 

Qəzet yazar Rafiq Tağının qatilinin tapılmaması üzündən cinayət işinin bağlanmasını ironiya ilə jurnalist Elmar Hüseynov və general Rail Rzayev kimi bu qatilin də “qeybə çəkilməsi” adlandırır.

“Yeni Müsavat” Müsavat Partiyası Milli Şuranı tərk etdikdən sonra mətbuat və sosial şəbəkələrdə Müsavat və AXCP fəallarının qarşılıqlı ittihamlarını “AXCP-nin Müsavata müharibə elan etməsi” sayaraq manjetə çəkib. 

Qarabaq qazisi Zaur Həsənlinin faciəvi ölümünə etiraz olaraq “Qaziləri yandırma” aksiyasında iştiraka görə inzibati və cərimə cəzası alan gənclər barələrində cıxarılan qərarı əsassız sayaraq cəriməni ödəməkdən imtina ediblər.