Mətbuat-Monitorinq 10.08.15

Rəsmi qəzetlər dövlət başçısı İlham Əliyevin Siyəzən-Məşrif avtomobil yolunun açılışında iştirak etməsini, “Qalaaltı” müalicə-istirahət kompleksinin açılışdakı nitqinin mətnini ilk səhifələrdə yerləşdiriblər.

“Azadlıq” qəzeti jurnalist Rasim Əliyevin qətlə yetirilməsini “Azərbaycanda daha bir jurnalist öldürüldü” sərlövhəsilə manjetə çıxarıb. Bununla yanaşı qəzet jurnalistin ölümünə səbəb olan fiziki zorakılıq və ondan sonrakı hadisələrə dair geniş məqalə ilə çıxış edib.

Azərbaycandakı repressiyanı gündəmə gətirən ABŞ-ın “The Washington Post” qəzeti İlham Əliyevi “azad söz və insan haqları boş şeydir” davranışında ittiham edir.

Həbsdə olan Arif və Leyla Yunusların qızı Dinara Yunus valideynlərinə uzunmüddətli həbs hökmü tələbini “ölüm hökmü” adlandırır.

“Front Line” Defenders” təşkilatı rəsmi Bakıya Leyla və Arif Yunusları məhkəmədə incitməyə son qoymaq çağırışı edib. Ağstafa rayon polisi AXCP rayon təşkilatının konfransının keçirilməsinə imkan verməyərək tədbiri dağıdıb.

Milli Şuranın üzvü, vəkil Namizəd Səfərov rəsmi Bakının açıq fikir ifadə edənlərlə düşmən kimi davranmasını ölkədə gərgin və təhlükəli siyasi mühitin formalaşması kimi dəyərləndirir.   

Qocaman vəkil Arif Şəmədov ayağının müalicəsi üçün 3-4 min manatın tapılmadığı halda dövlətin 48 milyard vəsaitinin offşorlarda yerləşdirməsini “vətənə xəyanət” adlandırır. 

MTRŞ-nin bayağı televerilişiləri efirdən yığışdıracağı haqda bəyanatına qəzet “sizin bayağı olmayan verilişiniz varmı?” sualı ilə mövqeyini ifadə edir.

Qəzet nəhəng neft istehsalçılarına isnadən hazırda neftin taleyini 1985-ci ildə 10 dollara enməsindən ağır böhran gözlədiyini bildirir.   

Əmlak bazarındakı durğunluğa toxunan qəzet tikinti sektorunun çökməsinin isşizlər ordusu yaradacağı barədə xəbərdarlıq edir.         

“Yeni Müsavat”  Rusiyanın Ermənistana Gürcüstandan quru yolu açmasını ilk səhifəyə çıxararaq bunu “Azərbaycana və Türkiyəyə qarşı hiylə planı” adlandırır.

Jurnalist Rasim Əliyevin paylaşdığı statusa görə futbolçu Cavid Hüseynovun qohumları tərəfindən döyüldüyünü və sonradan öldüyünü çatdırır, bununla yanaşı qəzet hadisə ilə bağlı genişhəcmli məqalə dərc edib.

Vəkil Adəm Məmmədov “Mingəçevir-İzolt”-un rəhbəri Mehman Mehdiyevin götürdüyü 30 milyon manat kreditin 18 milyon manatını qaytardığını, qalan borcu üstələyən girovu olduğu üçün həbsdə saxlanmasını qanunsuz hesab edir.

Vəkil Aslan İsmayılov Xəzər dənizi sahillərinin çəpərlənməsini məmurların acgözlüyü, harınlığı, qudurğanlığı kimi dəyərləndirir.

Neft Fondunun Moskvadakı əmlakının dəyərsizləşdiyini yazan qəzet buna səbəb kimi Rusiyaya tətbiq etdiyi sanksiyaların əmlak bazarında yaratdığı ucuzlaşmanı  göstərir.