Mətbuat-Monitorinq 11.07.14

Rəsmi qəzetlər dövlət başçısı İlham Əliyevin sədrliyi ilə Nazirlər Kabinetinin 2014-cü ilin I yarısının sosial-iqtisadi nəticələrinə dair iclas keçirməsi haqda xəbərləri ilk səhifələrə yerləşdiriblər. 

“Azadlıq” qəzeti Britaniya mediasının İlham Əliyevi “despot” adlandırması və Əliyevlə əlaqələrə görə şahzadə Endryünün tənqidə məruz qalmasını manjetə çıxarıb.

QHT-lərin Həyəcan Şəbəkəsi iqtidarın QHT-lərə təzyiqləri barədə açıqlama verərək ölkədə fəaliyyət göstərən 3 min QHT-dən yarısının Maliyyə Nazirliyinin sanksiyalarına məruz qaldığını iddia edir və bunu həm də hökumətin ölkədə QHT fəaliyyətinə münasibətinin göstəricisi adlandırır.

Qəzet Neftçilərin Hüquqlarını Müdafiə Komitəsinin, eləcə də qurumun sədri Mirvari Qəhrəmanlının şəxsi hesabına həbs qoyulduğunu nəzərə çatdırır.

Rəsmi Bakının İctimai-Siyasi Universitetin fəaliyyətinə xitam verdiyini yazan qəzet eyni taleyi Bakı Biznes, Asiya və Təfəkkür universitetlərini də gözlədiyini nəzərə çatdırır.

Ölkənin mənzil bazarındakı durumu dəyərləndirən ekspertlər evlərin bahalaşmasının daha 8 il davam edəcəyi bəyanatını səsləndiriblər.

“Ekspress”  Böyük Britaniyanın energetika nazirinin “Azərbaycanın lider rolu Avropanın Rusiya qazından az asılı olmasına kömək edir” bəyanatını  Qərbin Rusiya maneəsini aşacağı kimi dəyərləndirir.

Yol polisi sistemində 20-yə qədər yol polisinin vəzifəsindən azad edildiyini yazan qəzet bunu “yol polisində təmizləmə” adlandırır.

“Exo” ekspertlərə istinadən ilk növbədə təəccübə səbəb olacaq “kənd təsərrüfatı naxırlarının çoxsaylı olmasının yer üzü örtüyünü dağıtması” kimi açıqlama verir.

“Novoe Vremya”  Böyük Britaniyanın Azərbaycanla birgə həyata keçirdiyi enerji layhələrini təhlil edərək buna “Böyük Britaniyanın Azərbaycanı 100 il geriyə atması” şərhini verir.

İqtidarın neçə illərdir QHT-ləri nəzarətə almaq üçün təzyiqlərə məruz qoymasına baxmayaraq yalnız bu günlərdə QHT-lərin Həyəcan Şəbəkəsi yaratmasına qəzet “QHT-lər həyəcan təbili çalırlar, ancaq niyə indi?” reaksiyasını verir.

“Bizim yol”  Böyük Britaniya energetika nazirinin Azərbaycanı İranla möhkəm əlaqələr qurmağa çağırmasını ilk səhifəyə çəkib.

“Yeni Müsavat”  Azərbaycanın “Qərb yoxsa Rusiya” seçimi önündə qalmasına “Bakı geosiyasi yol ayrıcında” münasibətini önə çəkib.

Həbsdə olan NİDAçı gənclərdən rəsmi Bakının etiraf ərizələri almasını gənclər qurumları “iqtidarın gənclərin gözünü qorxutmaq” istəməsi sayıblar.

Baş nazirin keçmiş müavini Abbas Abbasovun Moskvada “SSRİ yaranmasını” dəstəkləməsini qəzet “Kremlin azərbaycanlı “ağır artilleriya”nı işə salması”  adlandırır.

ABŞ səfirlərinin “işğalda olan ərazilərdən 7 rayonun Azərbaycana qaytarılması” bəyanatı səsləndirmələrinə qəzet “Qarabağ probleminin həllilə bağlı geriyədönməz proseslərin başlaması” şərhini verir.