Mətbuat-Monitorinq 12.10.13

Rəsmi və iqtidaryönlü qəzetlər dövlət başçısı İlham Əliyevin yenidən öz postunda qalması ilə bağlı dünya dövlətləri rəhbərlərindən gələn təbrikləri ilk səhifələrində yerləşdirirlər. 

Müstəqil və müxalif mətbuatın, eləcə də Avropa qurumlarının seçkilərin azad, demokratik olmaması mövqeyinə qarşı bu qəzetlər öz səhifələrinə əks mövqeli çoxsaylı yazılar yerləşdiriblər. 

“Azadlıq” qəzeti prezident seçkilərinin nəticələrinə münasibətdə baş verən hadisələri diqqət mərkəzində saxlayır. 

Beynəlxalq qurumların seçkinin nəticələrinə təniqdi yanaşmasını iqtidarın etirazla qarşılamasını qəzet “Əliyevin Qərblə qarşıdurma yolu tutması” kimi şərh edir. 

“Freedom House” hüquq təşkilatının rəhbəri Devid Kremer “Azərbaycanda baş verən olayların hakimiyyətin legitimliyini şübhə altına aldığı” bəyanatı verib. 

Siyasi ekspertlər prezident seçkilərinin nəticələrini “hakimiyyətin özü üçün legitimlik problemi yaratması” kimi dəyərləndiriblər. 

Qəzet Demokratik Qüvvələrin Milli Şurasının bu gün mitinq keçirməsini manjetə çıxararaq, liderlərin xalqı aksiyada iştiraka çağırdıqlarını qeyd edir. 

Hüquq müdafiə qurumları ölkə müxalifətçilərinin Bakı mitinqinə qatıla bilməmələri üçün təzyiqlərə məruz qaldıqlarını bəyan edirlər.

Milli Şuranın prezidentliyə namizədi Cəmil Həsənlinin Seçki Qərargahı səsvermə prosesindəki pozuntularla bağlı Mərkəzi Seçki Komissiyasına 840 akt təqdim edib. 

“Zerkalo” qəzeti iqtidarı tənqidə görə müstəqil jurnalistləri cəzalandıran Mətbuat Şurasının prezident seçkilərinin nəticələrinə mənfi rəyə görə ATƏT seçki missiyasını təhqir edən hökumətyönlü jurnalistləri cəzalandırmaq istəməməsini ilk səhifəyə çıxarıb. 

Mətbuat Şurasının üzvü, QHT rəhbəri və mətbuata aidiyatı olmayan Müşfiq Ələsgərli isə missiyaya “özləri günahkardır” mövqeyi ifadə edib.

“Ekspress” qəzeti ABŞ Dövlət Departamentinin Azərbaycanda prezident seçkilərinə mənfi rəyiniə Azərbaycan XİN-in “bu, hörmətsizlikdir” mövqeyini ön səhifəyə çıxarıb. 

Həbsdə olan keçmiş nazir Fərhad Əliyev İlham Əliyevə səs verib və YAP sədrinin müavini Əli Əhmədov açıqlamasında onun azad olunmasını mümkün sayıb. 

“Exo” qəzeti ölkədə kompüter “pirat”çılığının 87% səviyyəsində olduğunu bildirir. 

Ekspertlərə isnadən qonşu ölkələrlə müqayisədə Azərbaycanda avtomobillərin qiymətinin 10-20% baha olduğunu yazan qəzet, yaxın 2-3 ildə bu qiymətlərin daha 5-10% artacağı proqnozu verir.

“Novoe Vremya” qəzeti ATƏT/DTİHB-in prezident seçkilərinin nəticələrinə mənfi rəyinə cavabda hökumətyönlü mətbuat mənsublarının missiyanı təhqir etmələrini “bu qurum əleyhinə iqtidarın kütləvi birliyi” kimi dəyərləndirir.

“Bizim yol” qəzeti ABŞ Dövlət Departamenti və ATƏT/DTİHB-in prezident seçkiləri ilə bağlı rəyinin rəsmi Bakıda hiddət doğurması mövzusunu önə çəkib. 

Azərbaycanda prezident seçkilərilə bağlı Avropa qurumlarının dəyərləndirmələrindəki fərqləri “New York Times” “aqressiv lobbiçiliyin nəticəsi” adlandırır. 

“Yeni Müsavat” qəzeti bu gün Milli Şuranın Bakıda mitinq keçirməsi, liderlərin xalqı mitinqə çağırması və mitinq komitəsi üzvlərinin Bakı polisinə çağırılması xəbərini ilk səhifəyə çıxarıb. 

Müsavat Partiyası başqanı İsa Qəmbər prezident seçkilərinin nəticələrinin saxtalaşdırılması ilə bağlı “rəsmi Bakı bunu aradan qaldırmaq üçün təcili addımılar barədə düşünməlidir” bəyanatı səsləndirib.

Milli Şuranın prezidentliyə namizədi Cəmil Həsənli bu seçkilərin “iqtidarın “saxta müxalifət” layihəsini də alt-üst etməsi” kimi qiymətləndirib.  

Ölkənin əsas gəlir yeri olan neft gəlirlərinin azalması ilə büdcə gəlilərinin 1 milyard, neft fondu transferlərinin 2 milyard, fondun investisiya xərclərinin 4 milyard manat azalmasını qəzet “hökumətin qara günlərinin başlaması” adlandırır. 

Həbsdə olan ruhani Taleh Bağırzadənin cinayət işində şahid kimi keçən Kamran Seyidov sosial şəbəkələrdə yayılan son məktubunda bu günlərdə intihar etməsinə səbəb kimi bu ilin aprelində “bandotdel”də ondan dindarlar əleyhinə ifadə alınmasını göstərir.