Mətbuat-Monitorinq 13.12.14

Rəsmi qəzetlər  mərhum dövlət başçısı Heydər Əliyevin vəfatının 11-ci ildönümü ilə bağlı xəbərləri ilk səhifələrə yerləşdiriblər.

“Azadlıq” qəzeti Azərbaycanda son vaxtlar ictimai-siyasi fəalların həbsilə bağlı “The Vaşinqton Post” qəzetinin rəsmi Bakıya qarşı “qəti tədbirlər” çağırışı etməsini manjetə çıxarıb.  

Dövlət başçısı İlham Əliyev bir media qurumu bir ildə iki dəfə məhkəmə cəzası aldığı halda bağlanması üçün məhkəməyə müraciət edilə bilməsinə dair KİV haqqında qanuna dəyişikliyi nəzərdə tutan layihəni parlamentə göndərib. Keçmiş deputat Rizvan Cəbiyev KİV haqqında qanuna dəyişikliyi yolverilməz sayıb.

Qəzet həbsdə olan hüquq müdafiəçiləri Leyla Yunus, İntiqam Əliyev, ictimai-siyasi fəallar Sirac Kərimov, Orxan Əyyubzadənin səhhətində problemlərin olduğunu yazır.

Almaniyanın “Deutshe Velle” nəşri jurnalist Xədicə İsmayılovanın hakim Əliyevlər ailəsinin biznesini araşdırdığına görə həbsə alındığını bildirir.

ARDNŞ-nin inkar etməsinə baxmayaraq, Neftçilərin Hüquqlarını Müdafiə Komitəsinin sədri Mirvari Qəhrəmanlı neft sənayesi sistemində ciddi ixtisarların gözlənildiyini yazır.

Balakənli ingilis dili müəllimi Məhəmməd Qarakişiyev ABŞ-ın “Varkey GEMS” Fondunun təsis etdiyi “Dünya Müəllimi Mükafatı”nın 50 finalçısı arasındadır, qalib olduğu halda 1 milyon dollar mükafat alacaq

 “Ekspress” Azərbaycanın öz nüvə sektorunu yaratmasını “milli nüvə...” adı ilk səhifəyə çəkib.

Qəzet AMAY Şirkətlər Qrupunun prezidenti Abdulla Abdullayevin istintaqının tamamlanmasını və həbs müddətinin daha iki ay uzadılmasını nəzərə çatdırır.

“Novoe Vremya”  Penitensiar Xidmətin rəisi Mədət Quliyevin Bakının mərkəzindəki həbsxanaların şəhər kənarına köçürüləcəyi haqda bəyanatını diqqət mərkəzinə çəkib.

“Bizim yol”  dünya bazarında neftin ucuzlaşması ilə bağlı Azərbaycandan başqa əksər ölkələrin yanacağın qiymətini ucuzlaşdırmasını ilk plana çıxarıb.

Vəkil Yalçın İmanov hüquqlarını müdafiə etdiyi jurnalist Xədicə İsmayılova ilə görüşə getdikdə görüşdən öncə və sonra üzərində yoxlamanın aparılması kimi qanunsuzluqla üzləşdiyini bildirib.

“Yeni Müsavat”  İŞİD terror qruplaşmasının Azərbaycana soxulmaq istəməsi və son vaxtlar ölkədəki radikal qruplaşmaların fəallaşması, yaxın aylarda onlara qarşı əməliyyatların genişlənəcəyi iddiasını ilk səhifəyə çıxarıb.

Qəzet Gəncədə və digərs yerlərdə elementar sosial tələbli vətəndaş etirazlarını hansısa məmurların “üsyan məşqləri” sayır və “ABŞ bunun mərkəzində dayana bilərmi?” sualı ilə bu etirazlara görə Vaşinqtonu şübhə altına almaq istəyir.

Torpaq münaqişəsi əsasında Gəncədə icra başçısına və polislərə xəsarət yetirilməsinə ekspetlər “sabah nazir və komitə sədrlərinin də başlarının yarılacağı”   barədə xəbərdarlıq edib.   

“Borçalı” İctimai Birliyinin sədri Zəlimxan Məmmədli “dövləti təhdid etmə” adı ilə Gürcüstana girişinə yasaq qoyulmasını absurd sayaraq bunu Gürcüstanda hakimiyyətə korrupsioner bir qrupun gəlişilə izah edib.