Mətbuat-Monitorinq 14.11.14

Rəsmi qəzetlər İran prezidenti Həsən Ruhaninin Azərbaycana səfəri çərçivəsində Bakıda İran-Azərbaycan biznes forumunun keçirilməsi haqda xəbərləri ilk səhifələrdə yerləşdiriblər.

Bundan əlavə, bu qəzetlər Zığ Gəmi Təmiri Zavodunun tikintisi ilə bağlı Xəzər Dəniz Gəmiçiliyi QSC-yə 10 milyon manatın ayrılması haqda sərəncamın mətnini dərc ediblər.

“Azadlıq” qəzeti Britaniya mediasının İlham Əliyevi despot adlandırmasını və  İ.Əliyevlə görüşə gəldiyi üçün şahzadə Endryünü tənqid etməsini ilk səhifəyə çıxarıb.

Osloda Azərbaycandan olan siyasi məhbuslara “Saxarov” mükafatının təqdimatı mərasimində təşkilatçılar insan haqları sahəsində “Azərbaycanda hadisələrin yanlış istiqamətdə inkişaf etməsi” barədə bəyanat səsləndiriblər.

Qəzet yazır ki, evi hədə-qorxu yolu ilə əlındən alınan Nina Baskakova Bakıdan qaçırılaraq Adıgey respublikasında saxlandığını, Adıgeydə polis rəisi olan Aleksandr Yuriyeviç bunun Azərbaycanıl bağlı belə 20-ci hadisə olduğunu deyir, hazırda Nəsimi Rayon Prokurorluğunda bununla bağlı araşdırma gedir.

Dünya bazarında neftin get-gedə ucuzlaşmaqda olması ilə bağlı ekspetlər Azərbaycanda Neft Fondunun hesabına yaradılan müvəqqəti iş yerlərinin bağlanacağı barədə xəbərdarlıq ediblər.

Naxçıvanda artıq insan hüquqları siyasi yox, məişət müstəvisində də daralır, belə ki, küçə və parklarda gənclərin cüt gəzintilərinə qeyri-rəsmi qadağa qoyulub.

“Ekspress”  dövlət başçısı İlham Əliyevin İran prezidenti Həsən Ruhani ilə görüşündə “heç bir kənar qüvvə aramıza girə bilməz” mövqeyini önə çəkib.

Avropa ilə ticarət əlaqələrində İranın Azərbaycandan tranzit kimi istfadə etmək niyyətini qəzet “İranı Bakı vasitəsilə Avropaya çıxmaq səyi” adlandırır.

Dünya bazarında neftin qiymətinin 80 dollara endiyini yazan qəzet ilin sonuna kimi 70 dollara enəcəyini bildirir.

“Exo” Azərbaycanda hər il “kölgə iqtisadiyyatının payına 35 milyard manatın düşdüyünü yazaraq bunu ÜDM-in 60%-i adlandırır.

“Novoe Vremya”  Uels şahzadəsi Endryünün Bakı səfərinin təmənnalı bizneslə bağlı olmasını ilk plana çıxararaq “Neft kəməri çağırır?” ironiyasını ifadə edir.

“Bizim yol”  Bayıl və “20-ci sahə” ərazisində 3 minə yaxın evin söküləcəyini ilk səhifədə yerləşdirib.

Mətbuat Şurasının sədri Əflatun Amaşov erməni hərbi helikopterinin vurulması anının medianın əlinə düşməsinə “təəccüb” ifadə edib və “araşdırılması”nın vacibliyini bildirib.

Həbsdə olan AMAY Şirkətlər qrupunun prezidenti Abdulla Abdullayevin həbsini və ona qarşı ittihamları vəkili Əkbər Bağırov əsassız adlandırıb.

Bazarda satılan yağların çoxunun insan üçün dəhşətli dərəcədə təhlükəli olduğunu yazan qəzet yağ inhisarçılarını əhaliyə düşmən kəsilməkdə ittiham edir.

“Yeni Müsavat”  qoşunların təmas xəttində erməni hərbi helokopterinin vurulmasını “İrəvana döyüş xəbərdarılığı” kimi dəyərləndirərək diqqət mərkəzinə çəkib.

Qəzet “Sədərək” Ticarət Mərkəzinin rəhbəri Yusif Qədimbəylinin siyasi oyunlarda və vəhabilərlə iş birliyində olmasının üzə çıxdığını yazaraq buna görə mərkəz sahibinin problrem yaşadığını iddia edir.

Qəzetin iddiasına görə, Binəqədi rayonunda müxalifətçilərin bələdiyyə seçkilərinə qatılmamaları üçün rayon rəhbərliyi şantaja əl atır.