Mətbuat-Monitorinq 15.06.15

Rəsmi qəzetlər Avropa Oyunlarının açılışı mərasimi haqda yazı və fotoları ilk səhifələrdə yerləşdiriblər. Bundan əlavə, bu qəzetlər səhifələrinin əksəriyyətini bu oyunların təbliğinə həsr edən məqalələrə veriblər.

“Azadlıq” qəzeti “Atletlər kəndində” idmançıların yol qəzasına düşmələri haqda yayılan videonun nazir Ziya Məmmədov və Bakı Şəhər İcra Hakimiyyətinin başçısı Hacıbala Abutalıbovu rəsmi Bakının hədəfinə gətirməsi iddiasını manjetə çıxarıb. Qəzet bu qəzaya görə Nəqliyyat Nazirliyinin 10-a qədər işçini cəzalandırmasını “nazir Ziya Məmmədovun özünü sığortalamaq səyi” hesab edir.

Avropa Oyunlarının maliyyə baxımından Azərbaycan üçün “tam iflas”la uğradığını yazan qəzet yeganə təsəllinin ölkə idmançlarının qazanacaqları medallar olduğunu yada salır.   

Qəzet bəzi beynəlxalq media qurumlarının Avropa Oyunlarının Azərbaycanda keçirilməsini Patrik Hikkin “ölkə mafiyası ilə sövdələşməsinin nəticəsi” sayır.    

Qəzet 6 il həbs cəzası alan AXCP-nin gənc fəalı Elvin Abdullayevin yaxınlarına isnadən onun Bakı təcridxanasında dözülməz şəraitdə saxlandığını bildirir.

“U-2” rok qrupunun aparıcı ifaçısı Bono Monreal konsertində Azərbaycanda həbsdə olan Anar Məmmədli, Xədicə İsmayıl, Rəsul Cəfərov, Leyla Yunus və İntiqam Əliyevin adlarını çəkərək “bizim bu dostlar fikirlərini ifadə etdiklərinə görə bu dəmir barmaqlıqlar arxasındadırlar” bəyanatını səsləndirib.

Həbsdə olan keçmiş səhiyyə naziri Əli İnsanovun həbsxanada fiziki baxımdan məhv edilməsi planı barədə  “Azərbaycan saatı”na xəbər verən mənbə bu haqda əsaslı informasiyaya malik olduğunu iddia edib.

“Yeni Müsavat” qəzetinin Milli Şuranı “Kreml layihəsi” adlandırması təhqirinə qurum sədri Cəmil Həsənli “Yeni Müsavat” qəzetinin iqtidara “Səs” qəzeti kimi yox, “Səs” əxlaqlı, amma müsavatçı kimi görünməsinin lazım olması” bəyanatı səsləndirib.

“Yeni Müsavat”  Avropa Oyunları çərçivəsində Azərbaycan, Türkiyə və  Rusiya prezidentlərinin Bakı görüşünün Ermənistan əleyhinə iş birliyinə dönəcəyi ehtimalını “Ermənistanı xofda saxlayan Bakı görüşü” adı ilə ilk səhifəyə çıxarıb.

Bundan əlavə, qəzet bu görüşə “Qarabağ üçün Bakı-Ankara-Moskva formatı yaranır?” kimi qeyri-ciddi mövqe ortaya qoyur.

Qəzet Neft Kəmərləri İstismarı İdarəsinin keçmiş rəisi Rizvan Vahabovun Ermənistana neft satması kimi detalların üzə çıxdığını nəzərə çatdırır.

Bakıda  “Atletlər kəndi”ndə yol qəzasına düşən Avstriya idmançısının durumu haqda danışan Milli Olimpiya Komtəsinin təmsilçisi əməliyyatdan sonra idmançının artıq özünə gəldiyini bəyan edib.

Ruisya-Azərbaycan münasibətləri haqda şərh verən politoloq Ərəstun Oruclu Azərbaycanın “Qərb cinahı” boş olduğu üçün Rusiyanın Azərbaycana istədiyi kimi davranacağı barədə xəbərdarlıq edib.