Mətbuat-Monitorinq 15.09.12

Rəsmi qəzetlər dövlət başçısı İlham Əliyevin XIV London Paralimpiya Oyunlarında iştirak etmiş Azərbaycan komandasını qəbul etməsi, komanda üzvlərini dövlət mükafatları ilə təltif etməsi, bir sıra məktəblərin açılışında iştirakı haqda yazırlar. Bununla yanaşı, bu qəzetlər dövlət başçısının bir sıra mədəniyyət xadimlərinə fəxri adlar verilməsilə bağlı sərəncamının mətni dərc ediblər. 

“Azadlıq” qəzeti Rusiyanın siyasi partiya başçılarından Jirinovskinin “Ermənistan xüsusi xidmət orqanları azərbaycanlıların cavabını verməlidir” bəyanatını “Azərbaycana qarşı terror çağırışı” kimi dəyərləndirir. 

1918-ci il sentyabrın 15-də Qafqaz İslam Ordusu Bakını rus-erməni hərbi birliklərindən azad edib. Türkiyənin Azərbaycan səfirliyi bu günün bayram olması təklifi səsləndirib, rəsmi Bakı hələ buna cavab verməyib.

Qəzet AXCP sədri Əli Kərimlinin əmisi oğlu İnqilab Kərimovun son vaxtlar intensiv izləndiyini yazaraq, bunu onun həbsinə hazırlıq sayır.

ABŞ-islam aləmi düşmənçiliyinə səbəb olan “Müsəlmanların məsumiyyəti” filminin nümayiş etdirilməsini politoloq Vəfa Quluzadə “ABŞ-ın Yaxın Şərq siyasətinin kimisə qəzəbləndirməsi” kimi şərh edib. 

“Zerkalo” qəzeti 1918-20-ci illər Azərbaycan cümhuriyyətinin baş naziri olmuş Əlimərdanbəy Topçubaşov haqqında şəxsi arxivindəki sənədlərdən ibarət kitabın nəşr olunduğunu nəzərə çatdırır. 

“Ekspress” qəzeti ABŞ konqresmeni Rorabaherin konqresə “Bölünmüş Azərbaycan xalqının öz müqəddəratını təyin etmək hüququ” adlı sənəd təqdim etməsini ilk səhifəyə çıxarıb. 

“Ayna” qəzeti son illərdə lombardların sayının 3 dəfə artdığını yazaraq, ekspertlərin bu məqamı “iqtisadi durumun yaxşı olmaması” kimi şərh etdiyini bildirir. 

Məişət zorakılıqlarına diqqət çəkən qəzet təhlillərə isnadən cinayətkarların 70-80%-nin məhz belə ailələrdə böyüdüklərini iddia edir. 

“Exo” qəzeti ölkədə bir qanunla vəzifəli şəxslərin gəlir bəyannaməsi verməli olduğunu, digər qanunla bu haqda informasiya verilməsinin qadağan olunması kimi ziddiyyətə diqqət çəkərək, buna “məmurların gəlirləri haqda bəyannaməni kim görəcək?” münasibəti ifadə edir. 

“Novoe Vremya” qəzeti ABŞ konqresmenlərindən birinin Konqresə “parçalanmış Azərbaycan”la bağlı sənəd təqdim etməsini “İranın paçalanması ABŞ üçün yeni sərsəm ideyadır?” mövqeyi bildirir. 

“Bizim yol” qəzet RF siyasətçisi Jirinovskinin Ermənistan xüsusi xidmət orqanlarını Azərbaycana qarşı hərəkətə keçməyə səsləməsini “Rusiyada Azərbaycana terror çağırışları” adlandırır. 

Qəzet dinc əhaliyə terroru haqlı sayan xristianların sayının belə düşünən müsəlmanlardan çox olduğunu yazaraq, bunu “Qərbin “islam mifi”nin dağılması” kimi şərh edir.

Qəzet sentyabrın 13-də ölkə yollarındakı yol qəzalarında 9 nəfərin öldüyünü, 10 nəfərin yaralandığını yazır. 

“Yeni Müsavat” qəzeti ABŞ konqresinin respublikaçı üzvünün Bakıya səfərdən sonra “Bütöv Azərbaycan” qətnaməsini Konqresə təqdim etdiyini yazır və bunu “Güney Azərbaycan türklərini güdaza vermək” sayır. 

1995-ci ilin mart hadisələrinə görə 1996-cı ildə ömürlük həbs cəzası alan keçmiş OMON-çu Arif Kazımov ailə həyatı qurub, bu, ölkə həyatında ilk belə hadisədir. 

Son vaxtlar humanitar sahələrə gənc kadrların təyinatına diqqət çəkən qəzet bunu 2013-cü il seçkilərindən sonra “İlham Əliyevin yeni iqtidar komandası” sayır. 

Türkiyə baş naziri Erdoğanın Azərbaycan səfərində ciddi sənədlərə imza atılmadığı üçün ekspertlər şərhlərində səfəri “faydasız” sayıblar.