Gec də olsa, ehtiram ifadə olundu...

Cümə günü Salyan şəhərində 1918-ci ilin yayında Azərbaycan torpaqlarını rus-erməni hərbi birliklərindən azad edən Qafqaz İslam Ordusunun (QİO) əsgərlərinə abidə qoyulub. Bu xəbər Turan-a Salyanda fəaliyyət göstərən “Demokratiyaya Yardım” ictimai birliyindən daxil olub.

1918-ci ilin yazından Azərbaycanda kütləvi qətliyamlar törədən erməni daşnakları iki gəmi vasitəsilə Xəzər dənizindən Kür çayına çıxaraq sahil boyu ərazidə yaşayan insanlara amansız divan tutub. Salyan rayonunun Kürqaraqaşlı kəndi yaxınlığında QİO əsgərlərilə daşnaklar arasında şiddətli döyüş olub. Ermənilərin bir gəmisi batırılıb, canlı qüvvəsi əhəmiyyətli itkiyə məruz qalıb. Bundan sonra sağ qalan ermənilər digər gəmi vasitəsilə qaçıblar. Bu döyüşlərdə azərbaycanlı əsgərlərlə yanaşı, dörd türk əsgəri və bir türk zabiti də həlak olub. Yerli əhali onları o zaman ehtiramla Salyan şəhər qəbiristanlığında dəfn edib. Sovet illərində hər cür yasaqlara baxmayaraq, salyanlılar şəhid türk əsgərlərinin məzarlarını itməyə qoymayıb. Onların şücaəti barədə gizli də olsa gənclərə danışıblar. 

2012-ci il sentyabrın 14-də isə türk iş adamlarının dəstəyilə Salyanda şəhid türk əsgərlərinin şərəfinə inşa edilən abidə açılıb. Dörd şəhid cənazəsi çıxarılaraq abidənin ətrafında basdırılıb. Şəhid türk zabiti isə Ərəbqardaşbəyli kəndində Azərbaycan əsgəri ilə bir məzarda dəfn olunduğu üçün buraya gətirilməyib.

Abidənin açılışında Salyan rayon ictimaiyyəti ilə yanaşı, Türkiyənin Bakıdakı səfiri Hulusu Kılıç və səfirlik əməkdaşları iştirak ediblər. -05D-