Jurnalist Avropa Məhkəməsinə müraciət edəcək

Cümə günü Bakı Apellyasiya Məhkəməsi “Turan”ın fotomüxbiri Etimad Budaqovun şikayətinin əsassız olması haqda qərar  çıxarıb.

E.Budaqov 2012-ci ilin aprel ayında Şəmsi Bədəlbəyli küçəsində aparılan söküntü işlərilə bağlı çəkiliş aparıb. Hadisə yerində Bakı meriyasının əməkdaşı Zülfəli İsmayılov və ətrafındakı adamların zorakılığına məruz qalıb, dəyəri 1200 manatdan çox olan aparat sındırılıb. Bundan sonra fotoreportyor fakt üzrə cinayət işi başlanması üçün Nəsimi rayon polis idarəsinin 21 saylı polis bölməsinə müraciət edib. Amma idarənin təhqiqatçısı Şahin Fərhadov E.Budaqova qarşı hərəkətdə cinayət tərkibi olmadığını əsas gətirərək, cinayət işi başlamaqdan imtina edib. Bu imtinaya etiraz olaraq E.Budaqov Nəsimi rayon məhkəməsində iddia qaldırıb. Bu il sentyabrın 3-də Nəsimi rayon məhkəməsində keçirilən prosesdə hakim təhqiqatçının cinayət işi başlamamaqda haqlı olması qərarı çıxarıb. 

Bundan sonra E.Budaqov Nəsimi rayon məhkəməsinin qərarından Apellyasiya şikayəti verib. Sentyabrın 14-də keçirilən prosesdə isə Apellyasiya Məhkəməsi Nəsimi rayon məhkəməsinin qərarını qüvvədə saxlayıb. 

Bundan irəli gələrək, iddiaçı E.Budaqov yaxın günlərdə Avropa İnsan Haqları məhkəməsinə müraciət edəcəyinin bildirib. -05C-