Mətbuat-Monitorinq 16-17.09.12

Rəsmi qəzetlər dövlət başçısı İlham Əliyevin 18 saylı məktəbin açılışında iştirakı haqda yazır. Bundan əlavə, bu qəzetlərdə ali məktəblərə ən yüksək balla daxil olmuş tələbələrə prezident təqaüdünü verilməsi haqda sərəncamın mətni dərc edilib. 

“Azadlıq” qəzeti BDU-nun yataqxanalarında məskunlaşan 3 minə yaxın köçkün ailəsinin yaxın bir ayda köçürülməsinə başlanacağını  yazır. Qəzet daxili işlər nazirinin məktəb açılışında iştirakını ölkənin məmurlar arasında bölüşdürülməsinin əcaib  nümunəsi adlandırıb. 

Müsəlmanlarla xristian dövlətlər arasında ciddi qarşıdurmaya səbəb olan “Müsəlmanların məsumiyyəti” filmini təxribat adlandıran qəzet bu qarşıdurmaların artıq Avropaya sıçradığını nəzərə çatdırır. 

AXCP-nin sədr müavini Fuad Süleymanlı ölkə daxili siyasətin inkişafına “2013-də ya hakimiyyət dəyişəcək, ya da ölkədə siyasi böhran baş verəcək” proqnozu ilə yanaşıb. 

Qəzet yazır ki, ABŞ Konqresinə Güney Azərbaycanla bağlı qətnamə təqdim edən konqresmen Dana Rohrabaher BBC-yə şərhində bildirib ki, məqsədi İranda azərbaycanlıların haqlarını tanımağa yardım etməkdir. 

“Yeni Müsavat”.  “Binə” ticarət mərkəzinə iki gün elektrik enerjisi verilməyib. Buna görə generatorlardan istifadə edilib və generatorlardan çıxan zəhərli qazlar yüzlərlə adamı zəhərləyib, cinayət işi başlanıb. 

İran erməniləri Azərbaycan zabiti Ramil Səfərovun əleyhinə izdhamlı aksiya keçiriblər. Rəsmi Tehran isə türkdilli obyektlərin adlarını dəyişdirir. 

Ağcabədi rayon icra başçısının müavini Rövşən Əhmədov rayon sakini Ramiz Səfərovu bıçaqlayıb. Rayonda aksiya başlayacaq. 

“Bakı Xəbər” ABŞ konqresmeninin Cənubi Azərbaycanla bağlı Konresə təqdim etdiyi qətnaməni “Cənubi Azərbaycanın müstəqillik ideyasının ABŞ-da yeni dövrü” adlandırır.